108. Cam:

Haj meh lwg caemh mbonq,

Daemj naj gyonj gyaeuj ndeu,

Doengz ninz youh doengz ndiu,

Doxiu cunz dieg gvangq.

Hoiz:

Haj lwg din ndaw haiz,

Bingzbaiz youq caezcup,

Caez byaij caez yietbaeg,

Mbouj saek lwg doeklaeng.

109. Cam:

Faiq lawz hai hausak,

Nanz gap daemj baenz baengz?

Daengngoenz okdaeuj daengz,

De cix yungz baenz raemx.

Hoiz:

Mbwn roengz siet hausak,

Nanz gap daemj baenz baengz.

Daengngoenz okdaeuj daengz,

De cix yungz baenz raemx.

110. Cam:

Baizdoih bae gyaegyae,

Beng sienq caez doxrangh,

Bouxboux soengz sohsang,

Lumj nangx baek gyangmbwn.

Hoiz:

Denganj haem sohsang,

Lumj nangx baek gyangmbwn,

Dienhsienq beng gvaq gwnz,

Bouxboux ndwn maenhndwt.

111. Cam:

Song boux daj gijmaz,

Ndi raen naj caeuq vunz,

Gag boux gag mbiengj mbwn,

Gangj coenzcoenz cingcuj.

Hoiz:

Song boux daj dienhvah,

Ndi raen naj caeuq vunz,

Gag boux gag mbiengj mbwn,

Coenzcoenz nyi seuqsat.

（15）