Aucaiz betcib roek bi lo, da mbouj mengz, rwz mbouj nuk.

Bingzseiz gyoengqvunz gyaeu daengz roek caetcib bi le, byaij geij yamq roen couh damz ga naet hwet in, daemh dwngx cij ndaej, hoeng Aucaiz mboujdan lienz dwngx cungj mbouj yungh, bingzseiz lij ndaej ndoet gaen baj song gaen laeujhau cij roengz reih bae guhhong, benz bya aeu fwnz couh mbouj yungh gangj lo, dawz caet betcib gaen rap mbouj youqgaenj, ndawmbanj haujlai hauxseng cungj beij mbouj hwnj de.

Aenvih Aucaiz rox gangj vahriu, caeuq vunzmbanj caemh youq gig hab ndaej daeuj, gyoengq vunzmbanj miz laeuj gwn seiz cungj maij cingj de. Ndigah yienznaeuz mwhneix gyoengq lwglan haeuj singz bae youq liux lo, de boux dog youq lajmbanj ngoezngoenz cungj dwg vaiqvued dangqmaz.

Bingzseiz gyoengq lwgnyez muengh gvaq ngoenzseng dwg vihliux ngoenzhaenx ndaej gwn dan’gauh, ciengq go ngoenzseng vaiqvued. Mwh- neix gwndaenj ndei le, haujlai haux- seng hix maij gvaq ngoenzseng, gyoengqde mbouj dwg bae ranzhaeux gwn laeuj, couhdwg bae goding ciengq go.

Gyoengq lwglan hawj bouxgeq gvaq ngoenzseng, dwg hoh de ngoenzngoenz vaiqvued, bibi gyaeu- raez.

Hoeng mbouj rox vihmaz, Aucaiz cungj mbouj maij gvaq ngoenzseng.

Ngoenzneix youh dwg ngoenzseng Aucaiz lo, haemhlwenz gyoengq lwg couh daj ndawsingz dwk dienhvah dauqma, heuh de gaj geij duz gaeq caj.

Gij gaeq lajmbanj dwg aeu haeuxyangz gueng, beij gij gaeq ndawsingz aeu swzliu gueng haenx noh haemq diemz ndeigwn. ranznden、baengzyoux suenq liux bae, aeu gaj sam seiq duz gaeq cijndaej.

Nyaengqfoedfoed daengz le lajbyongzngoenz, gij gaeq dumq ndei lo, gyoengq lwglan cij laebdaeb dauq daengz ranz.

Banhaemh caet bet diemj cung, ranznden、baengzyoux hix cungj daeuj daengz.

Gyoengqde umj bauqciengh daeuj, bumbum bambam sing yiengj gvaq liux, couh naengh haeuj congz bae gwn ngaiz gwn laeuj lo.

Ceiq nauhyied dwg aen daiz lwgnyez haenx. Gyoengqde daengj aen dan’gauh hunghung he youq gyang- daiz, biendaiz diemj le haujlai labcuk, yienzhaeuh aeu aen mauh mbouj sam mbouj seiq he daenj hawj Aucaiz.

Aucaiz ceiq mbouj maij aen mauh neix lo, daenj hwnjbae couh lumj boux fazvangz ndaw densi nei, fangz mbouj fangz, gveij mbouj gveij, di he cungj mbouj cwxcaih. De fwngz gaem aen mauh haenx couh naemj vut deuz, gyoengq lwgnyez youh aeu aen daeuj daenj hwnj gwnz gyaeuj de bae.

Mwh ciengq souj go ngoenzseng vaiqvued seiz, Aucaiz sim engq nyap, dingq hwnjdaeuj couh lumj bouxdauh nam sawdauh nei.

Go ciengq liux le, youh boq lab ndaep bae, yienzhaeuh daihgya youh dopfwngz “u u” hemq sing ndeu, gij sing neix couh lumj sing daej nei, boux mbouj rox laihnaeuz de dai liux lwglan daej de dem.

Aucaiz naemj, boq lab ndaep liux, couh lumj diuzmingh byaij daengz byai nei. Gijneix dwg hoh de ngoenzseng vaiqvued lwi? Gijneix couh lumjnaeuz hemq hawj de dai haemq vaiq.

Naemj daengz gijneix, Aucaiz ngauzngauz gyaeuj, najsaep riu mbat ndeu, hoeng gyoengq lwglan haisim, de youh mbouj ndei gangj maz.

Go cieng liux lo, ranznden caeuq baengzyoux hix heuh haj hemq roek caimax gvaq.

Mwhneix, gyoengqde gaem aen boilaeuj daengz henz Aucaiz daeuj, hoh de ngoenzseng vaiqvued, bibi gyaeuraez, yienzhaeuh bouxboux yut ok bak maenz ngaenz hawj Aucaiz.

（1）