Dwen daengz bouxbing doiqvuj Lij Vujgyangz, de youq Gvangjsih Bozbwz Yen Dunghbingz Cin Hojgyaz Cunh dwg boux vunz mizmingz ndeu. 1978 nienz 1 nyied, de bae dangbing, 1983 nienz 1 nyied doiqvuj. Ginggvaq ginhdui muzlienh, de bienqbaenz boux vunz miz dangrap、miz cwzyin ndeu, budui aen luzdiet hungloet neix, hawj de bienq ndaej giengiengz、 mbouj lau dwgrengz. 1983 nienz doiqvuj le, Lij Vujgyangz bae Gvangjdungh guhhong, baengh gij cingsaenz gwnhoj naihhaemz、gamj roemx gamj buek youq ndaw budui lienh baenz haenx, de gig vaiq couh cauh ok benq diendeih swhgeij. Baez ndeu, de maranz damqcaen, raen miz benq diegfwz gvangqlangh ndeu, de naemj, gij gyadaej bonjfaenh nanwt lo, baenzlawz cijndaej coengh vunzmbanj duetgungz baenzfouq ne? Lij Vuj- gyangz raen lai rox lai, couh daj benq dieg neix yawjraen seizgei, ndawsim miz aen siengjfap daihdamj ndeu, yaek dawz gij diegdeih swhyenz lajmbanj buenzcingj hwnjdaeuj……Riengzlaeng, de mbouj yaemhywx saekdi, dauqma ranzmbanj cauhnieb, dazyinx vunzmbanj caez byaij hwnj diuz roen baenzmiz.

Naeuz guh couh guh! Lij Vujgyangz ma daengz ranzmbanj le, mbouj dingz mbouj deq, baengh gij cingsaenz gamj roemx baenaj、mbouj lau saw, daiqdaeuz guhyiengh, youq ndaw naz ranz de ndaem gohaeux fouz goenghaih. De daiqlingx vunzmbanj dawz buek diegfwz ndawyangh bienq- baenz dieg ndei ndaej canh ngaenz ndeu. Seizde ndawyangh mbouj miz ngaenz, Lij Vujgyangz gag comz ngaenz gyonj guh ngaenz vunzlai, doengzseiz yinxhaeuj hanghmoeg ndei, yungh aen vunqsik sinzvanz ndaem guh youh ciengx bya, diegnaz moix moux aeu bak faenh cih bet daengz bak faenh cih cib guh daemz ciengx bya, raemx laeg cib goengfaen daengz mij ndeu, Cingmingz gaxgonq ndaem naz liux, 4 nyied gyangndwen ciengx byavahaeux、byanouq daengj doengh duz bya miz daegsaek……

“Cauhnieb itdingh yaek doiq swhgeij miz saenqsim, boux vunz miz saenqsim couh ndaej gikfat ok rengz- ndumj.” Lij Vujgyangz seizseiz yungh gij cingsaenz bouxbing ma gikleih bonjfaenh. Doenghbaez, vunzmbanj souhaeuj cungj baengh dajndaem cienzdoengj lai, dingzlai lij gvaq ndaej gungzhoj, yienznaeuz mbangjboux caemh naemj yaek cauhnieb hwngfat, hoeng cungj mbouj gamj seizbienh sawq guh. “Mbouj miz gisuz couh bae hag, mbouj rox dajciengx couh cingj vunz son.” Lij Vujgyangz naeuz, de dang gvaq bing, sojlaiz yawj ndaej gyae youh gvangq, hix gamj guh gamj sawq. De mbouj deq mbouj baengh, gag bae guh, gyoebgyonj gij dieg moix ranz hwnjdaeuj, aeu ngaenz haeuj guj、yungh dieg haeuj guj daengj dazyinx vunzmbanj caez dajndaem dajciengx.

Ndwencieng 2018 nienz, de ciucomz daengxcungq vunzmbanj caez doxyaeng geiqmaeuz hwngfat caeuq baezlaeng baenzlawz guh, guh baenz diuz loh canjnieb hwngfat “dajndaem dajciengx hab swnghdai、huqdoj baenz binjbaiz、dangdieg ok gingjndei、canjnieb aeu yungzhab” ndeu. 2018 nienz 3 nyied 8 hauh, de laebbaenz Bozbwz Yen Vangginghdangz Cung- yangj Conhyez Hozcozse, cucwz swhginh cien lingz ngeihcib fanh maenz, seizneix miz bak seiqcib hoh conhyezhu gungh caet bak betcib lai vunz gyahaeuj hozcozse, ndawde bouxbing doiqvuj miz cibroek vunz, gyoengqvunz ndaw se aeu sam bak lingz haj moux naz、 song bak roekcib moux reihndoi、 cien haj bak lai moux diegbya haeuj guj, cogeiz haeuj guj betcib lai fanh maenz. Saedhengz hanghmoeg doxdaeuj, Lij Vujgyangz daiqlingx gyoengqvunz ndaw se bingzcingj diegnaz, swnggaep gaijcauh gij hidungj baiz raemx ndawnaz, baenzneix haemq baiz raemx guenq raemx caeuq re raemxrongz, mizyauq daezsang gij leihyunghlwd diegnaz, fuengbienh dajndaem caeuq dajciengx, engq youqgaenj dwg daezsang gij rengzndumj cingjdaej dajndaem caeuq gij naengzlig fuengz caihaih, swnghcanj vanzging haemq onjdingh, vih ndaem haeux ciengx bya swnghdai cunghab dajndaem daj- ciengx dajdaej. Seizneix hozcozse ngoenz beij ngoenz ndei, guh miz diegdingzci、loekraemx biulae daengj hanghmoeg. Lij Vujgyangz mbouj miz seisim vih vunzlai、vih vunzmbanj maeuz fouqmiz, vunzmbanj gig gingqcungh de. Gyoengqde siengj senj de guh secangj, hoeng de cix baed fwngz naeuz:“Cijaeu vunzmbanj ndaej caeuxdi duetgungz, youq aen vihhong lawz cungj mbouj youq- gaenj.”

“Lij Vujgyangz daiq raeuz laebbaenz hozcozse, gwndaenj ndaej gaijndei. Doengzseiz de youh dwg boux vunz simndei hozraez ndeu, mwh raeuz bungz daengz hojnanz roxnaeuz vwndiz, de cungj haengj coengh raeuz gaijgez.” Bouxsecangj Vanggingh- dangz Cungyangj Conhyez Hozcozse Lij Cujlenz yienghneix gangj. Seizneix, hozcozse cawx doxgaiq dajndaem dajciengx hawj vunzmbanj; son gyoengqde baenzlawz dajndaem dajciengx、gyagoeng dajgai; lij son vunzmbanj gij gisuz、saenqsik、denswj sanghvu、nungzyez youqlag ngonz gingj daengj caeuq dajndaem daj- ciengx mizgven haenx.

“Dangbing laeb ceiq bauq guek- coj, maranz cauhnieb fouq vunz- mbanj.” Coglaeng, Lij Vujgyangz gig miz saenqsim, de gig miznaj lwnh gyoengq canyouj daeuj hag gingniemh haenx nyi, “Saedhengz hanghmoeg doxdaeuj, Yenveij caeuq Yen Cwng- fuj aeu cwngcwz gikcoi, cienzngaenz haenqrengz bangcoengh, gij hangznieb swnghdai dajndaem dajciengx hoz- cozse yied daeuj yied hung.” De gangj geiz daih’it hanghmoeg guh ndaej bingzonj, gihdi dingzlai dwg gij naz ndaem mbouj baenz haeux vutfwz lai bi haenx, doeklaeng aeu ma ndaem haeux ciengx bya le, cawzok vutfwz mbouj miz souhaeuj, hanghmoeg doq miz itdingh souhaeuj: Cunghab ndaem haeux ciengx bya, haeux mbouj gemjcanj, ciengx byanouq, fawh ndeu moix moux gueng swzliu、cawx doxgaiq wnq yungh bae cien maenz ngaenz; fawh ndeu canj ok bak goenggaen byanouq, goenggaen ndeu gai samcib roek maenz ngaenz, byanouq moux ndeu ndaej sam cien roek bak maenz ngaenz, moix moux canh ndaej song cien roek bak maenz ngaenz. Coglaeng aen hanghmoeg geiz daihngeih yaek aeu sojmiz reihndoi vutfwz dajndaem gohuq seizneix ndawhaw haemq noix miz、miz daegsaek deihfueng haenx, roxnaeuz ndaem goyw Gvangjsih gag miz haenx, beijlumj vagimngaenz、duhnamhfangz、gomat、mehnaeuh daengj. Caj song aen gveihva neix guh baenz le, menh yungh sam daengz haj bi, gya’gvangq gizdieg dajciengx, hwngfat swnghdai lijyouzyez, saedyienh gohyoz sinzvanz dajciengx. Doengzseiz guh daihsam、daihseiq geiz gveihva, lailai leihyungh doengh gij diuzgienh ndei Hojgyaz Suijgu、Aen Fai Hozgyangh bae hwngfat lijyouzyez, daiqdoengh vunz- mbanj Hojgyaz Cunh laebbaenz aen suen cunghab gyoebgyonj yienhdaih dajndaem dajciengx、swnghdai nungzcangh、youqlag lijyouz, dawz Hojgyaz Cunh guhbaenz aen mbanj canjnieb hwnghoengh、swnghdai habyouq、fungheiq vwnzmingz、ceih- leix mizyauq、miz gwn miz daenj moq ndeu.

“Hozcozse laebbaenz le, sou gij vunz gungzhoj guhhong, gyoengqde ndaej demsou, hix mbouj you gwndaenj lo.” Golij ndawmbanj naeuz, “Mwh hozcozse caengz laebbaenz, baenz mbanj reihnaz vutfwz, couhcinj ndaem doxgaiq roengzbae, ngoenzhaw hix aeu dawz bae gai, byaij baeg lai mbouj gangj, gai mbouj gai ndaej bae cungj mbouj rox. Seizneix dajndaem dajciengx dajgai cungj mbouj yungh you la…… Caen yaek docih Lij Vujgyangz.” Golij gangj daeuj gig vuenheij.

Duj va gag hai mbouj baenz cin, bak va hai liux cin rim suen. Lij Vujgyangz cauhnieb gaenxguh miz ceiqheiq, bienqbaenz boux daiqdaeuz cauhfouq lajmbanj. Gangj daengz gij saeh cauhnieb dwgrengz bonjfaenh, de danqheiq naeuz:“Bungz daengz hojnanz, gou hix siengj cuengq fwngz, hoeng hix caenh youq ndawsim daezsingj swhgeij, gou gaxgonq dwg bouxbing, mbouj ndaej hawj geu buhbing gou daenj gvaq haenx bienq mong, gou couh yungh gij cingsaenz bouxbing seizseiz iugouz bonjfaenh.” Lij Vujgyangz mbouj bienq simnduj, baengh gij simhoengh caeuq gij naengzlig cazyawj gaemdawz aen seizgei ndei hwngfat, daiqdoengh vunzmbanj caeuq gizyawz bouxbing doiqvuj dangdieg caez fouqmiz, guh baenz le aen ranzmbanj gyaeundei、canjnieb hwnghoengh、swnghdai habyouq、fungheiq vwnzmingz、ceih- leix mizyauq、miz gwn miz daenj, daj bouxbing doiqvuj bienqbaenz boux cauhnieb ndaej baenz ndeu.

Lij Vujgyangz naeuz: “Gou gijmaz cungj mbouj aeu, doenghbaez roengzrengz buekguh, cungj dwg aenvih ndiepgyaez diegseng caeuq vunzmbanj. Baezlaeng gou caemh lumj gaxgonq nei gvansim bangcoengh hwngfat hwnqguh ranzmbanj, aeu aen cienzdoengj doiqvuj mbouj doiqsaek ndei neix fugsaeh aenbiengz, yungh gingniemh cauhnieb bonjfaenh daiq- doengh engq lai bouxbing doiqvuj gag cauhnieb, dawz Hojgyaz Cunh cauh baenz aen dieggiek bouxbing doiqvuj cauhnieb guhhong ndeu, daiqdoengh gyoengqvunz seiqhenz doengzcaez fouqmiz, guh ak aen hangznieb dajndaem dajciengx swnghdai laj- mbanj.

Lij Vujgyangz gamj guh gonq、ndaej genhciz, guhyiengh hawj daih nungzminz lajmbanj moq vut gij swhsiengj gaeuq、haiguh swnghcanj gag gouq、saedyienh demsou baenzmiz, hix dwg bouxbing doiqvuj guhyiengh gag cauhnieb. Daj gwnz- ndang de, ndaej raen daih nungzminz moq gamj cauhmoq, miz sim roengzrengz gaijbienq gij yienghhoj lajmbanj, caeuq gij maq- muengh moq lajmbanj duetgungz baenzmiz.