十四届全国人大一次会议在京闭幕 习近平发表重要讲话

Sinhvazse Baekging 3 nyied 13 hauh dienh Cunghvaz Yinzminz Gunghozgoz Gaiq Cibseiq Daengx Guek Yinzminz Daibyauj Daihhoih Baez Hoih Daih’it, guh gak hangh yicwngz sat caezcup, senjok gyoengq boux gapbaenz gozgyah gihgou gaiq moq ndeindet le, 13 hauh banhaet youq Bwzgingh Yinzminz Daveidangz hai sat.

Daihhoih iuheuh, daengx guek gak cuz yinzminz aeu engqgya gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh goek, yaengx sang mbaw geiz hungmbwk yiengh sevei cujyi miz gij daegsaek Cungguek, aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj dazyinx, cienzmienh gvancez gij cingsaenz Ngeihcib Daih Dangj raeuz, gagsaenq gag’ak、souj goek cauhmoq, caezhoz gyonjrengz、ngaem gyaeuj buekguh, vih cienzmienh hwnqguh aen guekgya sevei cujyi yendaiva、cienzmienh doicaenh Cunghvaz Minzcuz fukhwng hungmbwk bae doxgiet buekguh!

Cunghgung Cunghyangh cungjsuhgi、Gozgyah cujsiz、Cunghyangh Ginhveij cujsiz Siz Ginbingz fatbiuj gangjvah youqgaenj. De naeuz, baez daihhoih neix senj gou caiq dang Cunghvaz Yinzminz Gunghozgoz cujsiz, gou caensim gyo’mbaiq gak bouxdaibyauj caeuq daengx guek yinzminz saenq gou. Yinzminz saenq gou, dwg gij rengznyoengx ceiq hung hawj gou yamqdin baenaj, hix dwg diuz rap naekgywdgywd gyangq gwnz mbaq gou. Gou laemxsim dawz ndei diuz rap youz yenfaz gyauhawj, dawz guekgya aeuyungh guh sawj- mingh, dawz gij leih’ik yinzminz guh sienqmaeg, guh faenh hong neix ndeindet bae, ok goengrengz gou liuxcaez bae, baenzbaenz mbouj cuengq diuz rapnaek yinzminz gyauhawj.

Baez hoih neix ginggvaq biujgiet, doenggvaq le aen gezyi Gaiq Cibseiq Daengx Guek Yinzda Baez Hoih Daih’it gvendaengz faenh baugau hong cwngfuj. Gezyi vixok, doiq seizdaih moq cib bi neix guek raeuz ginghci sevei hwngfat cix aeundaej yiengh cwngzciu hab geiq haeuj lizsij、miz ok gij bengwz hab geiq haeuj lizsij, baez hoih neix bingzgyaq gig sang, doiq gij hong Gozvuyen bi gvaqbae neix caeuq haj bi gvaqbae neix guh, baez hoih neix cungfaen haengjdingh, doengzeiq gij cungjdaej iugouz、cujyau muzbyauh caeuq cwngcwz byaijyiengq ginghci sevei fazcanj 2023 nienz youz baugau daezok de, gietdingh baecinj aen baugau neix.

Baez hoih neix ginggvaq biujgiet, doenggvaq le aen gietdingh gvendaengz coihgaij Fap Laebfap. Gietdingh daj 2023 nienz 3 nyied 15 hauh hainduj hengz. Guekgya cujsiz Siz Ginbingz ciem cujsizling hauh daihsam cix hawj goengbouh.

Daihhoih cizhingz cujsiz、Gaiq Cibseiq Daengx Guek Yinzda Cangzveijvei veijyenzcangj Cau Lozci cujciz hoih sat caemhcaiq gangjvah.

Lij Gyangz、Vangz Huningz、Cai Giz、Dingh Sezsiengz、Lij Hih、Hanz Cwng daengj boux- lingjdauj dangj caeuq guekgya camgya hai hoih.

Lij Gwzgyangz、Liz Cansuh、Vangh Yangz、Vangz Gizsanh daengj naengh cujsizdaiz.