2015 nienz 10 nyied 25 hauh gyanghaemh, cib diemj sam faen, daxboh gou binghdai.

Yaek goenqheiq seiz, de mbouj gangj gijmaz lai, cijdwg heuh daengx ranz vunz daengz henz congz, naeuz：“Coglaeng, guh vunz lij aeu sim beij sim, lai nyaenx lai nyiengh, guh saeh ndei, gwnvi couhdwg fuk……”Gangj liux, menhmenh laep da, couh dai bae lo.

Mwh okfaex, gyoengqvunz gvih rim dangqnaj dou ranz. Mbouj dandan dwg vunz ndawranz caeuq caencik baengzyoux, lij miz vunz mbanjnden, lij miz vunz buet le geijcib leix loh daeuj soengq de.

Miz haujlai vunz raemxda rihnangnang, mbangjboux lij cuengq sing daejww. Miz bouxgeq ndeu naeuz:“De dwg vunzndei ha, vunzndei ha.”

Daxboh lij lix seiz dwg bouxswhgih yangh cwngfuj. Bingzseiz, cijaeu bouxwnq swnhloh yaek dapci, de cungj hawj. Gaxgonq, goengloh youh gaeb youh noix, ci engqgya noix, hoeng aen ci de dwg ndawyangh aen gajceh iq dog. Bouxwnq miz gijmaz iugouz, de cungj caenhrengz bang.

Ndawcuj miz boux hauxseng iq ndeu, ngamq ndaej cib lai bi, bohmeh cungj mbouj youq lo, caencik mbouj nyienh souciengx. Hauxseng neix youq dadui langh vaiz ciengx mingh, daxboh couh ciengzseiz daiq de ma ranz gwn haeux. Miz baez ndeu gaj gaeq, louz song gaiq gagaeq, daxboh hawj de gaiq ndeu, gaiq ndeu hawj daegnuengx, gou couh hoznyaek lo. Daxboh naeuz:“De mbouj miz bohmeh lo, mwngz aeu sim beij sim ha.”

Gvaqlaeng, daxboh lij aeu ngaenz hawj de, soengq de bae doegsaw. Hauxseng hix cengheiq, gauj ndaej cunghconh. Guhhong le, ndaej youq ndawsingz guh lauxsae, bibi dauqma hawj daxboh baiqnienz, dang daxboh lumjbaenz boh caen nei.

Mbanjnden miz aen doih ndeu, cungj dwg vunz Mauznanzcuz. Bihaenx fwn doek hung, cungdongj ranz loemq lo. Geij boux vunz Mauznanzcuz ra daengz daxboh gou, gouz de bang rag cienhoengz, dauq coih ranz. Seizhaenx, giyouz ci mbouj miz lo, daxboh couh gag ok cienz, bang gyoengqde rag cien ndwi. Daxmeh rox le nyapnyuk lo, daxboh couh daiq daxmeh bae yawj gij ranz gyoengqde. Cij yawjraen ciengz loemq ranz lak, bouxlaux bouxiq, daengx ranz aeu baengzrwix dangj fwn. Gyoengqde saenzdwd- dwd, lumj duzroeg iq youq ndawrumz nei, hojlienz lai.

Daxboh naeuz:“Gyoengqde cungj baenz yienghneix lo, aeu sim beij sim ha, gou nyaenxsim gyoengqde souh haemzhoj ma?”

Miz ranz ndeu mbouj miz cienz cawx cien, daxboh youh ciq gij cienzhong noix de hawj gyoengqde.

Ranz caep ndei le, ranz beixnuengx Mauznanzcuz neix guh doxgaiq ndeigwn soengq daeuj ranz gou. Gvaqlaeng, moix daengz ngoenzciet hung cungj cingj daxboh gou bae guhhek, song ranz dou lumj ranz caen ndeu.

Miz ngoenz ndeu, daxboh bae gwnzhaw gai gaeq. Duz gaeq haenx naekgywggywg, youh dwg ndawranz gag ciengx, miz bouxbuenqgaeq ndeu ok gyaq cib maenz ngaenz. Daxboh cingq yaek gai, yawjraen bangxhenz miz bouxgeq Mauznanzcuz ndeu, doq yawj doq aeu dinbuh uet raemxda. Baez cam, laxlawz dwg daeglwg bouxgeq youq ndawbya raemj fwnz le, daj gizsang doek roengzdaeuj, sieng lo, ninz gwnzcongz ywsieng, siengj gwn gaeq bouj ndang, hoeng ndawranz gungzhoj cawx mbouj hwnj, vihneix siengsim dwk raemxda doek- byoegbyoeg.

Daxboh ngeix baez ndeu, daj ndaw- fwngz bouxbuenqgaeq dued dauq duz gaeq, soengq daengz ndawfwngz bouxgeq Mauz- nanzcuz. Bouxgeq naeuz mbouj miz ngaenz, daxboh naeuz:“Soengq hawj mwngz, mbouj aeu ngaenz, lwgnyez ywsieng youqgaenj.”Bouxgeq dingq le, raemxda doekswdswd. Vunz baihhenz hix cungj vih daxboh simsienh gou gamjdoengh.

Daxboh fwngz hoengq dauq ranz, daxmeh mbouj raen de ndaej cienz ma, cam dwg vih gijmaz. Daxboh gangj le gij saeh neix, youh naeuz:“Bang vunz, couhdwg bang swhgeij ha.” Daxmeh danq gaemz heiq ndeu, mbouj ndei caiq gangj de gijmaz. Aenvih doengh gij saeh lumj yienghneix, daxboh mbouj rox guh gvaq geijlai baez lo.

Bang vunz couhdwg bang swhgeij, aen dauhleix neix, mbouj geij nanz couh ndaej niemhcingq.

Daxboh youq seizciet “song ciengj”, aenvih gij saeh vat mieng, deng boux mbanjnden ndunghndwngx mbouj gangj dauhleix ndeu moeb laemx, lij deng caij geij din.

Daxboh sieng naek, ninz youq gwnzcongz. Geij boux beixnuengx Mauz- nanzcuz rox le cungj daeuj yawj de. Ndawde miz song boux hauxseng, naeuz itdingh bae ra boux ndunghndwngx nyexsaeh haenx gangj cingcuj. Hoeng daxboh mbouj hawj. Doeklaeng cij rox, bouxgeq Mauznanzcuz daxboh soengq gaeq hawj haenx, cingq dwg bohnax bouxndunghndwngx. Bouxgeq sikhaek bae ra daeglan, fak de mbat fajfwngz ndeu, youh heuh de daeuj boiz- laex.

Doeklaeng, bouxndunghndwngx haenx dingq gij vah bohnax, daeuj daengz ranz gou boizlaex, cuengq le bauqrengh, lij ok cienzyw dem.

Youq gwnz begsaeh daxboh, daengx ranz vunz Mauznanzcuz haenx cungj daenj buhhauq. Youq mbanj gou, neix couh dangq vunzcaen lo. Boux Mauznanzcuz guhdaeuz haenx doiq daxmeh gou naeuz:“Godaih couhdwg caen godaih gou, de bae lo, vunz ndawranz gou itdingh daeuj soengq de. Ciuhlaeng, gou lij nyinh de guh godaih!”

Mwh ram gouhbenj daxboh okrog, bonjlaiz aenmbwn fwn rwed rumz bongj, sawqmwh couh gvengqyakyak lo. Miz vunz gangj, neix dwg bohmbwn deng gamjdoengh lo, soengq vunzndei ne. Daxboh gvaqseiq lo, bohmbwn daej lo, hwnj bya seiz youh hawj vunz bienhleih.

Daxboh gvaqseiq ndaej geij bi lo, hoeng ndaw mbanj lij miz vunz naeuz de dwg vunzndei. Gou byaij daengz gizlawz, cungj miz vunz naeuz, neix dwg daeglwg “Huz saefouh”, doiq gou ndei dangqmaz.