Biek ranzmbanj okbae lai bi, gij bya ranzmbanj haenx goengqgoengq sang lumj yaek daemj mbwn, gij cingzgingj neix cungj youq ndaw lwgda gou, hoeng biek okbae geijcib bi, gij mingzcoh goengqbya cungj lij ndaej aeu Vahcuengh heuh okdaeuj.

Daj gou doekfag ok dungx meh daeuj, gou cawqdingh dwg boux vunz ndawbya ndawrungh. Yienznaeuz gou seng youq ndawbya, gou ndangdaej cix mbouj lumj goengqbya baenz cangq. Dingq daxmeh gangj, gou seng okciuh couh mbouj rox vihmaz daej mbouj dingz, daej ndaej naj fod naj maeq, daej ndaej nyinz bongq nyinz foeg, daej lumj yaek dai yaek lix. Daxboh cingj daeuj boux canghyw doj ndeu, cix yawj mbouj ok maz bingh, canghyw dauqbae lo, daxboh naengh youq ndawranz gwn iensei, gij hoenzien mbinngaungau ok bakdou bae. Dax- meh boemz youq gwnznaj gou daej, mbouj rox guh baenzlawz ndei. Gou ngoenz beij ngoenz byom, ngoenz- ngoenz daej daengz conghhoz hep, doeklaeng miz ngoenz ndeu, gou caiq mbouj daej lo, ndangndok menhmenh unq roengzdaeuj. Daxmeh nyinhnaeuz gou mbouj baenz vunz lo, couh hawj gou rieg dauq buhvaq moq, aeu gyoengq mbuk duk ndei gou, cuengq haeuj laj gvihfaex bae couh oksing daej hwnjdaeuj. Gij sing daej daxmeh cienz okbae, mehbaj dingq ndaejnyi lo, guhmuengz ce hong mbouj guh, couh buet daeuj ranz gou.

“Baenzlawz yiengh lo?” Mehbaj daeuj daengz henzmbonq daxmeh cam.

“Daeglwg mbouj miz lo!” Dax- meh doq daej doq vix haeuj laj gvihfaex bae naeuz.

Mehbaj umj gou ok lajgvih daeuj, de yungh fwngz dingh youq lajhoz gou, roxnyinh lij raeujremrem, mehbaj couh aeu aen geng ndeu daek di raemxraeuj guenq roengz bak gou bae. Mehbaj naeuz daxmeh:“Simj, daeglwg lij miz heiq, mwngz gaej daej lai o.” Daxmeh mbouj daej lo, gej gyungq mbuk couh menhmenh dwk got gou haeuj gyangrungj bae. Gvaq cib lai faencung, miz vunz roq haeuj dou daeuj, mehbaj bae hai dou, baez yawj, dwg Yizbohlungz ndawmbanj. Yiz- bohlungz naeuz daeuj ciq daxboh gou aeu fagbauz bae guh doengjfaex, de raen gou bingh yienghneix, ganj- muengz bae ra aen duix rwix he daeuj, aeu cax roq gij bien aen duix rwix, aeu gij meng duix bae gvej bakaek caeuq baihlaeng gou.

Mbouj geijlai nanz, gou couh daej singz ndeu ok bak, Yizbohlungz cij soeng amq heiq ndeu. Yizbohlungz naeuz, gou seng okdaeuj ndawndang miz yiengh raemxhenj ndeu, itdingh gvet hawj raemxhenj okdaeuj cij ndei. Neix dwg yiengh fuengfap doj ndawbiengz. Gvaqlaeng, Yizbohlungz bae ra gij mbaw gogoen daeuj, aeu feiz om aen lai cungdaeuz, yienzhaeuh yungh gij raemx mbaw gogoen daeuj hawj gou swiq daengx ndang, mad hawq cij daenj buhvaq. Yizbohlungz naeuz, gogoen ndaej yw vangzdanj siundat、lwedbyai baizheiq. Daj mbat de hwnj, gou couh ciemhciemh ndei hwnjdaeuj. Gvaqlaeng, daxmeh lai mbat hwnjdou bae baiqraen Yiz- bohlungz, hawj gou bae nyinh Yiz- bohlungz guh bohyae, hoeng moix mbat bae, Yizbohlungz cungj mbouj wh, gienh saeh neix hawj daxmeh cibfaen nanzgvaq.

Gogoen dwg go faexmingh gou, Yizbohlungz dwg boux vunz gouq mingh gou. Gawq vah neix daxmeh ciengzciengz caeuq gou gangj, hix dwg gawq vah daxmeh caeuq gyoengq mehmbwk gangjgoj seiz ciengz dwen daengz. Youq gou sam bi seiz, daxmeh hwnj bya bae vat gogoen ndeu, aeu daeuj ndaw reihcoj ndaem. Daxmeh demj sam diuz yieng, aeu diuz baengznding cug haeuj gogoen bae, yienghneix gogoen couh baenz go faexmingh gou lo. Daxmeh maq- muengh mingh gou lumj go faexgoen maj sang majhung, cangqcangq heiqheiq. Daj gogoen aeu daeuj ndaem liux, bilaeng couh maj ok haujlai go goen iq, aiq dwg namh laeg bwnh um, gogoen yied maj yied sang. Daxmeh naeuz gou nyi, gogoen neix mbouj ndaej hawj bouxlawz raemj.

Gou majhung le, aen suenq gogoen dwg aen dieg’angq guhcaemz gou, gou ciengzciengz caeuq hujgeiq bae laj gogoen guhcaemz, dou vat aen gumz iq oknyouh roengzbae, ciuq gij yiengh bouxlaux youq ranz cawj souh haeuxyangz, aeu faexngamh hoed guh souh. Guhcaemz mbwq lo, couh aeu mid iq daet nya gogoen daeuj, mbon geij aen congh, caiq bae rai rongzgyau daeuj nem haeuj aen congh bae, lumj aen naeuz iq boq ok gij sing mbouj sam mbouj seiq, guhcaemz daengz hanh laeyeye, naj nding naj ndat.

Yizbohlungz rox san sat、raeng、ndoengj、gei、lamz、loz、mbung daengjdaengj. Seizhaenx, Yizbohlungz mbouj suenq geq, de cungj maij youq bakdou gwnz rogcanz dajsan, rogcanz baihgvaz miz go makleiz ndeu, de ngoenzngoenz cungj ing youq lajgoek go makleiz dajsan, seizhaenx de couhdwg baengh dajsan gvaq saedceij. Mwh lij iq dou ceiq maij yawj Yizbohlungz buq faexcuk, cij raen de yungh fagcax hoemz bae daet faexcuk, moix hoh aiq miz sam meij raez, youq diuz faexcuk gyaeuj ndeu buq vang buq daengj, doeklaeng aeu song gaiq faex iq miz hub ndeu raez gaz youq gyaeuj faexcuk, yienzhaeuh yungh saencaz dok roengzbae, couh ndaejnyi faexcuk lumj cuengq bauqrengh nei “bibbib badbad” yiengj, baez yaep da, seiq gaiq faexcuk hung lumj doengzliq couh iet youq doiqnaj dou, gyoengq lwgnyez bouxboux bekfwngz hwnj- daeuj.

Seizhaenx gvaq ndaej hoj, Yiz- bohlungz gaeq caengz heuh couh haeuj ndawbya bae aeu faexcuk daeuj dajsan, banhaet ndaej gwed faexcuk ndeu dauqma, banringz couh luih duk ganq dajsan, ngoenzlaeng cij ndaej dawz hwnj haw bae gai, ndaej di ngaenz le caiq cawx haeux dauqranz. Ndigah, gangj daengz ndawbya gizlawz miz faexgoen faexcuk ceiq lai, Yizbohlungz rox ndaej cingcing cuj- cuj.

Daxboh gou gonq dwg boux canghfaex, doeklaeng de riengz Yiz- bohlungz hag dajsan. Yizbohlungz haeujsim son, daxboh hix rox san haujlai doxgaiq duksan, hoeng din- fwngz caeuq Yizbohlungz doxbeij, ca ndaej gyae lo.

Gvaqlaeng, gou okrog bae doegsaw lo, noix ndaej dauq ranz- mbanj, engqgya noix ndaej raen Yizbohlungz. Hoeng gou seizseiz siengj de youq ndawsim, engqlai siengj daengz gij “roegfaexcuk.” de soengq hawj gou haenx. Geiq ndaej gou ngamq hwnj cuhcungh seiz, yaek bae haihag haemh gonq, daxboh guh geij aen byaek ndei, heuh Yizbohlungz daeuj ranz gwn haeuxcaeuz, Yiz- bohlungz aeu duk san duzroeg ndeu soengq hawj gou. Haemhhaenx de naeuz gou:“Soengq duzroeg duk hawj mwngz, buenx mwngz byaij ok bakmbanj, buenx mwngz bae gyae doegsaw, daengz ciuh buenx youq henzndang mwngz……”

Aenvih gou gauj mbouj ndei, doekbuengj lo, gou mbouj ndaej laebdaeb doegsaw lo. Gou liz ranz okbae ra gij saedceij swhgeij, hoeng okbae couh cib lai bi cungj mbouj ndaej dauq ranzmbanj gvaq. Cig daengz miz ngoenz ndeu, gou riengz gyoengq doengzhag Luj Sin Vwnz- yozyen bae Cingjganghcanh seiz, raen gogoen rim bo rim baq, yawj bae laepcupup, go sang gvaq go, go soh gvaq go. Go ndwn youh lajgoek gogoen, cij siengj daengz Yizbohlungz. Yizbohlungz miz sam daeglwg, samcib bi doekgonq yah de couh dai lo, boux lwgdaeuz caeuq boux lwgngeih de ndaej ngeihcib lai bi seiz, song boux baenzbingh mbouj geijlai nanz couh dai lo, lw bouxlwg huk daihsam caeuq de gvaq saedceij. Gou siengj daengz neix, danq gaemz heiq raezrangrang okdaeuj, Yizbohlungz mingh baenzlai hoj.

Gvaqlaeng miz ngoenz ndeu, godaih daj dienhvah hawj gou, naeuz Yizbohlungz gaenq gvaqseiq lo. Gou baez doeksaet, couh muengzfoedfoed dauq baema. Bae daengz ranz, Yizbohlungz gaenq roengz faex lo, gou caiq mbouj ndaej raen naj de lo. Gou ndwn youq doiqnaj henzfaex Yiz- bohlungz, raemxda hoij rim gwnznaj. Gou ngeix bae ngeix dauq, buet dauqranz aeu cax bae raemj faexgoen, hawj godangz san baenz dungh. Soengq Yizbuhlungz bae bo seiz, gou dawz gij dungh hoemq youq gwnz aen moh de.

Dwg bi 2014, daengx guek hengzguh duetgungz gungganq, lwg daihsam Yizbohlungz dwg bouxgungz aeu coengh, bi 2017 cwngfuj hwnj ranz moq hawj de youq, caiq hawj vunz ndawmbanj haethaemh bae ciuqgoq de, gij ndwenngoenz doek- laeng de ngoenzngoenz lumj daeng- ngoenz hwnj mbwn ronghsagsag lo.