吴美群 著 妲 娜 译

Daihgya ganjgaenj bae baiz raemx, caemhcaiq dawz go’gyaj aeu ganj dauqcungz cap roengz naz, guh le baenz ngoenz, cij dauqcungz ndaem ndei gij gyaj fouz gwnz raemx haenx. Loz Cuimeij naiq- nueknuek byaij daengz gyaeujnaz, couh naengh dwk mbouj siengj ndwn hwnjdaeuj, de baeg lai lo, ndang baeg、 sim naet. Yawj go’gyaj ndaej dauqcungz ndaem ndei, de cix ndaej soeng gaemz heiq ndeu.

Gvaqlaeng, Loz Cuimeij caeuq gyoengq gisuz- yenz ndaw gunghswh, youh hwnq caeux dauq laep saeqsim guenjleix naz guhyiengh.

Naeksim roengzrengz guh cungj aeundaej baenzgoeng, guh naz guhyiengh doeksat ndaej daengz soucingz ndei. Riengzhaeux henjrwgrwg naekgywggywg, youq laj ndit yap rongh lwenq- myanmyan, hawj vunz sim’angq dangqmaz.

Gyoengq vunzmbanj simfug lo, cungj gag nyienh iugouz dajndaem.

Youq Loz Cuimeij caeuq gyoengq boux gisuzyenz ndaw gunghswh naihsim cijdauj baihlaj, ndaw mbanj laebbaenz le hozcozse, daengx mbanj cungj ndaem haeuxfusih haeux ndei neix, caemhcaiq ndaej daengz soucingz ndei.

Vihliux baujcwng caeuq vunzmbanj ciengzgeiz doxgap, Loz Cuimeij hengzguh aen cwzloz “aen cunh ndeu——yiengh huq ndeu——aen yienh ndeu——diuz lienh ndeu——aen suen ndeu”, riengzlaeng youq daengx yienh 67 aen mbanj laebhwnj le 67 aen densangh fuzvucan.

Loz Cuimeij dingjguh daj “it canj” haidaeuz guh hwnj, aeu “nungz”guh goek, dawz gij nungz- canjbinj doenghbaez lingzsanq gaicawx haenx guh hab biucinj、gveihmoz bae ginghyingz, doenggvaq saedhengz cungj ginghyingz vunqsik “hulenzvangj + nungzyez dinghdan + gihdi + ranz gungzhoj”, caeuq sam cien haj bak hoh ranz gungzhoj doxgap, fazcanj gij densangh banggungz dingh dan canjnieb haeuxfusih、haeuxyangznah、 makbwzyanghgoj、makmizhouzdauz simnding、raetmoegngaex ndaem haenx. Ranz gungzhoj hawj diegdeih ok goengrengz, densangh giyez laebdaeb daezhawj gisuz fuzvu, gunghswh yungh lai cungj denswj sanghvu gaicawx soujduenh, daezsang nungzcanjbinj riuzdoeng suzdu caeuq dohgvangq, guhbaenz swnghcanj gunghawj gaiok diuz lienh fuzvu ndeu, caencingq gaijgez ranz gungzhoj giepnoix cienzngaenz、giepnoix gisuz、giepnoix lohsiu daengj gij vwndiz haedsim neix.

Goekhuq miz baujcwng le, Loz Cuimeij youh doengh fwngz hai lohsiu.

Guh hong banggungz, bang de hai ok le diuz lohsiu ceiq daih’it. 2017 nienz ndwencieng haemhgonq, ndaw yienh cujciz 60 boux daiqdaeuz baenzfouq bae daengz Sinhcin Si Fuzdenz Gih ngonzyawj hagsib. Loz Cuimeij cadawz aen gihvei neix, daiq gij nungzcanjbinj miz daegsaek gunghswh swhgeij haenx bae lo. Youq Sinhcin, miz haujlai vunz ndaw gunghswh gig haengj doengh gij huqgwn daj ndaw bya ndaw rungh daeuj neix. Miz mbangj danhvei, haidaeuz cij dwg goq naj daeuj cawx di ndwi, doeklaeng ciemhciemh couh baenz boux hekcawx doekdingh lo.

Bae Sinhcin ngonzyawj baezneix, daejheiq Loz Cuimeij daezswng lo, de gamj caeuq gyoengq hek gunghswh hung damzbuenq, doiq aen cauhmoq siugai fuengsik de, de engqgya miz saenqsim lo.

“Gij densangh cauxnieb conzdungj, dwg cungj cingzgvang sien dajndaem gvaqlaeng siugai, aiq miz okyienh cungj cingzgvang gunghawj lai gvaqbouh haenx. Hoeng aen gunghswh raeuz yungh aen vunqik ‘hulenzvangj + nungzyez dinghdan + gihdi + ranz gungzhoj’ neix, gaengawq bouxhek aeuyungh bae dajndaem gij canjbinj doxgven de. Gaej nyinhnaeuz, baengh dinghdan haenx doxgaiq gai bae mbouj bae, raeuz seizneix nyaengq dinghdan bouxhek cungj nyaengq mbouj gvaqdaeuj.” Loz Cuimeij miznaj dwk naeuz.

Baengh cungj vunqsik neix, Loz Cuimeij caeuq Sinhcin aen giyez hung ndeu ciemdingh le mbaw dinghdan cien fanh maenz.

2017 nienz daengz 2020 nienz, Loz Cuimeij ciep gyoengq bouxhek Sinhcin dinghdan mauhgvaq 30 fanh mbaw, siugai soqngeg dabdaengz 3000 fanh maenz.

seiq

Gwn raemx mbouj lumz boux vat mboq.

Loz Cuimeij cauhnieb baenzfouq le, mbouj lumz bauqdap sevei, de daiqdoengh vunzlai doengzcaez fatcaiz.

Cungh Hijyungz dwg Lozcwngz Vangzginh Cin Vangzginh Segih Mbanjsinhveiz ranz gungzhoj ndeu, daengx ranz miz haj boux vunz, baengh seiq moux reihnaz ndaw bya gvaq saedceij. Buen daengz dieg anceiq le, de boux gaenq haj cib lai bi neix, youq yienhsingz ra hong lai baez cungj bungq ding. Rox daengz gij cingzgvang nanz Cungh Hijyungz le, Loz Cuimeij hawj de youq ndaw cauhsi lajvangj guh hong houginz gonq. Geiz sawqyungh daengz le, daez de guh boux cujcangj cujsengmoq ndaw cauhsi. Seizneix, Cungh Hijyungz ndwen miz song cien lai maenz souhaeuj.

Cungh Hijyungz angq naeuz: “Ndwenndwen miz ngaenz haeuj daeh, roxnyinh saedceij miz maqmuengh lo, gvaqlaeng gou dajsuenq ciep daxboh okdaeuj youq.”

Mungz Suhminj dwg boux daiqdaeuz baenzfouq Lozcwngz Yen Vaizginz Cin Lunzdung Cunh, ndaej daengz Loz Cuimeij caeuq gyoengq boux gisuzyenz gunghswh bangcoh le, de daiq daengx mbanj mehmbwk ndaem le bak lai moux makbwzyanghgoj, caemhcaiq doenggvaq densangh bingzdaiz guh gai huq, souhaeuj demgya boix ndeu doxhwnj, ndaej saedyienh aen muzbyauh daengx mbanj mehmbwk youq bakdou ranz guh hong couh ndaej ngaenz haenx.（5）

大家赶紧排水，并将秧苗一蔸一蔸重新插下田，累了整整一天，才重新插好那些漂浮的秧苗。疲惫不堪的罗翠美走到田头，便坐着不想起来，她太累了，身累、心累。看着重新插好的秧田，她终于松了一口气。

之后，罗翠美和公司技术人员又起早贪黑精心管护着示范田。

功夫不负有心人，示范田终于获得了好收成。金黄的沉甸甸的稻穗，在阳光的照射下闪烁着诱人的光芒，令人赏心悦目。

村民们服了，都自愿要求种植。

在罗翠美及公司技术人员的耐心指导下，村里成立了合作社，全村都种植了富硒优质稻并获得了好收成。

为了保证与村民长期合作，罗翠美实施“一村一品一县一链一园”策略，相继在全县六十七个村庄建立了六十七个电商服务站。

罗翠美坚持从“一产”做起，以“农”为本，将过去零散的农产品种植进行标准化、规模化经营，通过实施“互联网+订单农业+基地+贫困户”的经营模式，与三千五百户贫困户合作发展富硒大米、本地糯玉米、百香果、红心猕猴桃、黑木耳等电商扶贫订单产业。贫困户出土地出劳动力，电商企业提供跟踪技术服务，公司运用多种电子商务营销手段，提高农产品的流通速度和广度，完成产供销一条龙服务，真正解决贫困户缺资金、缺技术、缺销路等核心问题。

稳定了货源，罗翠美又着手打开销路。

扶贫工作的开展帮助她打开了最初的销路。2017年春节前夕，县里组织六十名致富带头人到深圳市福田区参观学习。罗翠美抓住这一机会，带去了自己公司的特色农产品。在深圳，不少公司白领很喜欢这些来自大山的绿色食材。一些单位刚开始只是礼貌性地购买，渐渐地便成了固定的客户。

深圳之行，提升了罗翠美与大型客户谈判的底气，更坚定了她创新销售方式的信心。

“传统的电商创业，属于先种植后销售，有可能出现供过于求的情况。而我们公司采用‘互联网+订单农业+基地+贫困户’的模式，根据客户需求种植相关产品。别以为依靠订单产品销量上不去，我们现在忙客户的订单都忙不过来。”罗翠美自豪地说。

凭借这种模式，罗翠美与深圳一家大企业签下了一千万元的订单。2017年至2020年，罗翠美承接深圳客户订单超 过三十万宗，销售额达三千万元。

四

吃水不忘挖井人。罗翠美创业致富后，不忘回馈社会带动群众共同致富。

钟喜荣是罗城黄金镇黄金社区新维屯建档立卡贫困户，全家五口人靠仅有的四亩山区耕地维持生活。搬至安置点后，年过五旬的她在县城找工作屡屡碰壁。了解到钟喜荣的困难情况，罗翠美首先让她在线下超市从事后勤工作。试用期满后，将其提升为超市生鲜组组长。现在，钟喜荣每月有两千余元收入。

钟喜荣说：“收入逐步稳定，对生活也是充满了希望，下一步打算把老父亲也一起接出来住。”

蒙书敏是罗城怀群镇伦洞村的致富带头人，在罗翠美及公司技术人员的帮助下，她带领全村留守妇女种植了一百多亩的百香果，并通过电商平台进行销售，收入增加一倍以上，实现了全村留守妇女家门口就业增收的目标。