Seizgonq laj din Byacwx miz aen mbanj iq ndeu, ndawmbanj miz mehmaiqlaux ndeu, de youq aen ranzhaz iq youh gaeb youh rwix, mbouj miz saek benq reihnaz, ngoenznaengz hwnj bya bae raemj liu ma gai gvaq saedceij.

Seiznit miz ngoenz ndeu, meh- maiqlaux hwnj bya bae raemj liu, gwnzbya rumzbaek cifofo, caiq roengz mwi, nit dwk din fwngz cungj geng liux. Sawqmwh, de raen laj gofaex miz duz ngwz iq ndeu, yaek dai lo. De sim’in duz ngwz iq neix, dawz duz ngwz iq cuengq haeuj ndawrungj, duz ngwz iq ndaej heiqraeuj le couh menhmenh doenghnyepnyep. Daj seizneix hwnj, mehmaiqlaux couh souciengx duz ngwz iq neix.

Duz ngwz iq yied ciengx yied hung, gig vaiq couh bienqbaenz duz lungz iq ndeu, diuz rieng raezrang- rang, haeuj ranzhaz iq diuz rieng lij iet ok bakdou buenq ndeu. Mehmaiqlaux naeuz de, danghnaeuz mbouj raemj diuz rieng, de couh mbouj ndaej haeuj ranz lo. De gig dingqvah, hawj mehciengx gaem cax raemj gat diuz rieng. De mbouj miz rieng le, vunzmbanj couh heuh de guh Daeg- gaed.

Gvaqlaeng, Daeggaed ngoenz beij ngoenz bienq hung, aen ranzhaz iq youq mbouj roengz, mehciengx couh youq henz ranz dap aen diengzhaz hung ndeu hawj de youq. Vunzmbanj raen de youh hung youh sang, naeuz de dwg duz fangzyak ndeu, baezlaeng haih vunzmbanj dengnanh, heuh mehciengx de boenq de deuz, mbouj deuz couh dwk dai de. Mehciengx gyaez de dangq lwgcaen, daiq de senj hwnj gwnzbya bae youq, doeklaeng de bienqbaenz duz lungz hung ndeu. Mehciengx naeuz de:“lajmbwn miz haujlai vunz souhnanh, mwngz mbouj ndaej gag goq mehciengx, yaek bae gouq gyoengq beixnuengx souhnanh lajmbwn.” De sij mbouj ndaej biek mehciengx, ngeix daengz mehciengx buenqseiq sinhoj cij ciengx de hung, caengz ndaej bauqdap mehciengx, baenzlawz ndaej couh yienghneix deuz ne? Mehciengx gienqnaeuz:“Bauqdap gou dwg gienh saeh iq ndeu, gouq gyoengq beixnuengx souhnanh laj- mbwn cij dwg saeh hung, mbouj ndaej gag goq bonjfaenh, yaek ngvanh baenzlawz coengh gyoengq beixnuengx lajmbwn ndaej gvaq ndwenngoenz bingzan vuenyungz.” De dingq gij vah mehciengx, mbin hwnj gwnzmbwn bae hen diuz dah hung, bienqbaenz duz saenzlingz hen diuz dah hung, vih vunzlai lajmbwn bauj bingzan cauhfuk.

Vunzmbanj ienqhoij baezgonq guh gij saeh mbouj deng, hwnj bya bae cingj mehmaiqlaux dauq ndawmbanj. Mehmaiqlaux gaenq ndaej gyaeu bak bi lo, de yaek dai seiz, vunzmbanj cam de:“Baenzlawz heuh Daeggaed dauq?” Mehmaiqlaux naeuz Daeggaed ngoenznaengz vih vunzlai lajmbwn bingzan vuenyungz feiqheiq, gou dai lix gij saeh iq neix suenq maz ne?” Daengz ngoenz dai de, gwnzmbwn rumzhung cifoenfoen, byaj raez yienghrumrum, fwn doek raq sajcaca. Yienzlaiz dwg Daeggaed ganj dauq, dawz mehciengx soengq hwnj gwnz dingj Byacwx giengq byasaem ceiq sang bae cangq. Doeklaeng vunz bonjdeih gingqcungh mehmaiqlaux caeuq Daeggaed, cwngheuh meh- maiqlaux guh Mehlungz, cwngheuh Daeggaed guh Lwglungz, giengq byasaem cangq mehmaiqlaux couh heuhguh Byagyaeujlungz.

Lwglungz baenzneix doiq meh- ciengx miz hauqsim, gwnzmbwn goeng Nyawhdaeq rox le gig doenghsim, daengz ngoenz dai Mehlungz, couhdwg liggaeuq ngoenz sam nyied cosam, hawj de dauq Byacwx sauq moq baiq Mehlungz. Bi daengz liggaeuq ngoenz sam nyied cosam, raen gwnzmbwn byaj raezrumrum, gwnz Byacwx rumz hung fwn doek raq, vunzmbanj couh naeuz dwg Lwglungz dauq hawj Mehlungz sauqmoh lo.

Vunz bonjdeih baiqfug Mehlungz caeuq Lwglungz, moix bi daengz ngoenz liggaeuq sam nyied coam, couh ciuq gij saekhoengz、saekbieg、saek- henj、saekaeuj、saekndaem haj cungj saek duz lungz gwnzndang cimq haeuxcid naengj, yungh haeuxnaengj hajsaek baiq Mehlungz caeuq Lwg- lungz. Baiq sat Mehlungz dem Lwg- lungz le couh gyonjcomz laj din Byacwx hwnzngoenz eufwen. Cungj fungsug neix bi doek bi, gig vaiq couh cienz daengz Mbanjcuengh Vujmingz gak dieg, itcig daihdaih ciepswnj roengzdaeuj daengz seizneix. Seizneix Sam Nyied Sam Bouxcuengh hawfwen Vujmingz gij goek de, couhdwg daj neix ginggvaq cien bi bak bi lienzdaemh ciepswnj roengzdaeuj lo.