Boeksaed simsoh, roengzsim guhhong. Goengda gou heuhguh Veiz Vwnzgez, 1930 nienz seng, ngamq ndaej caethaj bi couh gvaqseiq lo. Goengda caengz duiyouh seiz, dwg yienz Gvangjsih Denyingj Fanhyiz Cibenh Cangj samgaep daujyienj, bau guh gij hong daujyienj fanhoiz denyingj vah siujsoq minzcuz. Goengda rox bien vaiqbanj Vah- cuengh、sij sawheiq, rox yienjheiq、eufwen doenghgij bonjsaeh neix. Yienznaeuz gou doekseng baenzlai nanz caengz raen gvaq goengda youq dangqnaj gou baijok gij bonjsaeh neix, hoeng gou cungj gig baiqfug gij vwnzyi dungxcaiz de.

Ndaejgeiq mwh lij iq, baez daengz hanzgyaj sujgyaj, goengda cungj iugouz daxmeh daiq gou bae Namzningz guhcaemz. Yaek naengh banci ceng mbouj geij lai cibseiq aen cungdaeuz cij daengz Namzningz, naengh dwk ngunhngwdngwd, baezbaez ngunhci ceiq noix song ngoenz cij ndaej hoizsoeng. Mwh gou ngunhfwd youq ranz, yawjraen ceiq lai couhdwg goengda gou boemz youq gwnz daiz, sij gij cihmeh lumj gyoebyaem Sawgun nei, seiz mbouj seiz lij youq bonj《Sawloih Cuengh Gun》youh naek youh na haenx guh biugeiq. Seizhaenx gou lij caengz rox Sawcuengh dwg gijmaz, moengjmoengj doengjdoengj cam goengda: “Goengda, baenz roix cihmeh lumj duhngaz neix dwg cihsaw maz ya? Baenzlawz doeg? Sij ma guh gijmaz ne?”Goengda riunyumnyum han gou naeuz:“Neix dwg cihsaw Bouxcuengh raeuz, goengda hag rox le, geiq gij fwen caeuq vahsug Dunghlanz raeuz couh haemq heih lo, cix mbouj dandan dwg bingzciengz gangj Vahcuengh couh sat lo.”“Hoeng gou seizneix yaek hag ndei Vahgun, majhung le yaek bae Baekging guhhong……Gangj Vahcuengh lai le gangj Vahgun couh cab Vahcuengh lo……” Ndwenngoenz couh baenzneix gvaqbae vaiqvit, majhung le gou mbouj ndaej saedyienh aen loqsiengj bae Baekging guhhong, hoeng gij yijyenz vwnzva minzcuz raeuz cix lumj naedceh iqet nei, caegcaeg roengzrag ndawsim gou bae.

Gaenxhong haengjguh, genhciz simgiuj. Daxmeh gou heuhguh Veiz Yiginh, 1956 nienz 1 nyied seng, seizneix ndaej roekcib seiq bi. De guh gij hong siujsoq minzcuz fanhoiz couhdwg aeu Vahcuengh boiq yaem miz seiqcib sam bi lo. Daj 1977 nienz hainduj guhhong daengz 2007 nienz duiyouh, daxmeh gungh camgya Vahcuengh fanhoiz boiqyaem guswbenh it bak samcib lai bouh, gohgyaubenh ngeihcib lai bouh. Aen sigij gonq bet goujcib nienzdaih, daxmeh caeuqfaenh fanhoiz denyingj 《Niuz Bwzsui Raeuz》《Ciuh Yiluz》, faenbied aeu ndaej “Ciengj Dwngzlungz”“Ciengj Cinmaj” gij denyingj siujsoq minzcuz daezcaiz daengx guek.

Denyingj haeuj daengz aen seizdaih soqcih gvaqlaeng, gij gisuz duzceiz boiqyaem hix vuenh baenz soqcih boiqyaem, yienghneix doiq gij ciennieb gisuz boux boiqyaem iugouz engq sang lo. Daxmeh gaenq roekcib lai bi lo, aenvih ciengzgeiz youq baihnaj denswj bingzmu guh hong lai lwgda mong liux, raek megrwz nanz lai, dujrwz baihswix de yied daeuj yied dingq mbouj ndaejnyi, hoeng ndawsim de lij gig simgyaez gij saehnieb aeu Vahcuengh caeuq denyingj boiqyaem. Caiq aenvih ndawyienh noix gij vunz rox vih denyingj siujsoq minzcuz boiqyaem haenx, caemhcaiq gunghswh caensim caen’eiq iucingj, de mbouj gangj aeu ngaenz, giendingh dauqma boiqyaem. Bungz daengz doiq goujhingz、vahdiuh caeuq yinhbinz doengz- bouh, gawqvah aeu caeuq gij neiyungz fanhoiz doiq ndaej habngamj daengj doenghgij hojnanz moq neix, de cungj mbouj lau. Dauqfanj caeuq bouxdoih caez lwnh baenzlawz daezsang gij bonjsaeh boiqyaem, faenboiq gij giek sawheiq, caemciek doxyaeng aeu gij swz lawz fanhoiz haemq ndei, youq ndaw diengzloegyaem loeg bae loeg dauq, caenhrengz yungzhab ndaej ndei singyaem caeuq yisuz. Daj 2011 nienz daxmeh dauqma guh Vahcuengh denyingj boiqyaem daengz seizneix, de caeuqfaenh caemhcaiq fanhoiz boiqyaem hajcib haj bouh guswbenh, seiq bouh gohgyaubenh. Ndawde fanhoiz boiqyaem bouh denyingj Vahcuengh 《Deihdoengh Hung Dangzsanh》aeu ndaej 2013 nienz daengx guek vah siujsoq minzcuz denyingj maenhndei ciengj bingzndei、ciengj cunghab gisuz. De caemhcaiq lij bang Minzyij Cunghsinh ndawyienh fanhoiz boiqyaem cit densi giluzbenh《Dwzcanj Dunghlanz》, vih baezlaeng fanhoiz loegguh engqlai densigi baenz gij vah siujsoq minzcuz bonjdieg miz itdingh cijdauj cozyung.

Miz vunz roxnyinh ciuhvunz dan guh gienh saeh ndeu, genjdanh caeuq bingzciengz lai, hoeng daxmeh gou yungh gij dienfaenh、hozraez、saenqniemh de roengzsim guh gij saehnieb fanhoiz boiqyaem saujsu minzcuz daengz seizneix, hawj gou daj iq youq ndaw seiqgyaiq denyingj miz sing haenx majhung, ganq ok naedceh minzcuz yijyenz.

Mbouj lumz simnduj, cij ndaej daengz byai. Gyoengqvunz ciengzseiz gangj, ciuhvunz ceiq vuenyungz couhdwg dawz saeh gyaezmaij bienqbaenz saehnieb, gij ndiepgyaez ndawsim couh lumj goekmboq nei aeu mbouj liux, rwed dwk naedceh neix hai va lo……

2010 nienz 9 nyied, gou seizheiq ndei, daj ndaw vunzcaiz genjleh, byaij hwnj aen vihhong guh minzyij, bienqbaenz boux guh hong yijyenz vwnzsw siujsoq minzcuz ndeu. Daengz 2020 nienz, gou youq gwnz vihhong neix gaenq guh ndaej bi daihcib lo, cib bi ndawde, gou aeu gij saenqniemh seizcoz、gij swhveiz seizcoz, siengj banhfap hawj gij saehnieb minzyij “hoengh hwnjdaeuj”.

Daj 2011 nienz 10 nyied daengz seizneix, gou bibi guh hozdung “gohgi denyingj Sawcuengh Vahcuengh haeuj bak mbanj, fugsaeh sevei cujyi lajmbanj moq”, bingzyaen moix bi haeuj mbanj cuengq bak ciengz denyingj Vahcuengh; 2012 nienz 6 nyied daengz seizneix, aenaen singhgiz aeu boq ok geiz 《Sinhvwnz Vahcuengh Dunghlanz》, aeu gvangjbo densi lai aeu Vahcuengh lwnhgangj, gyagiengz gij lienzhaeh dangj caeuq vunzlai; 2014 nienz 9 nyied, hoizguh densi giluzbenh banj Sawcuengh 《Gingjsaek Dunghlanz》, neix mboujdan fungfouq gij swhyenz boqcuengq bonjdieg Densidaiz, caemhcaiq guh ok le bouh daih’it Vahcuengh densi ceiq giluzbenh daengx gih; 2015 nienz 7 nyied hai aen cezmuz《Gyonjcomz Gojgaeq Vahcuengh》, hawj vunzlai yawjraen Vahcuengh densi cezmuz lai cungj lai yiengh; 2017 nienz 11 nyied, gou aeu ndaej aen mingzdaeuz Boux Senhcin Gvangjsih Bouxcuengh Swcigih Siujsoq Minzcuz Yijvwnz Gunghcoz, caemh nienzdaej, doidoengh Vujcon Cin ndawyienh ndaej senj haeuj Buek Daihngeih Aen Diemj Guhyiengh Song Vah Huzndei Lajmbanj (Sezgih) Daengx Guek, dwg gouj aen diemj guhyiengh daengx guek ndawde aen ndeu; 2018 nienz 12 nyied, gou gag guh bouh denyingj dinj《Caiq Mbouj Caj》, aeu ndaej 2018 nienz “lajmbwn daekhingz·gojgaeq denyingj dinj”——cawjdaez denyingj dinj Gvangjsih saedguh sevei cujyi haedsim gyacizgvanh sam daengj ciengj, bi de 8 nyied, gou hoiz le bouh denyingj giluzbenh《Ak Lai Lo, Guek Raeuz》, caemhcaiq laebbaenz aendonz eufwen Nizloz; 2019 nienz 5 nyied, ingj yaepveq Cuengh Gun song vah 《Gou Caeuq Aen Guekcoj Gou》, hoh laeb guek 70 hopbi, bi de 10 nyied, Vujcon Cin miznaj aeu ndaej cizdij byaujcangh yienghndei daengx guek minzcuz doxgiet baenaj, 12 nyied, gou doidoengh Vujcon Cin senj guh aen gihdi habsib hengzguh song vah miz daegsaek daengx guek.

Youq ndaw cienz caeuq swnj, miz ranz gou sam daih vunz genhciz caeuq henhoh、gagsaenq caeuq gouzra gij saehnieb minzyij vwnzva. Soujmaenh simnduj, seiqdaih doxcienz, neix couhdwg gij goj cienzswnj ranz gou.