Geij faen cung couh ciemz ndaej diuz heujgungx haenx lo, hoeng, saeh neix gingqyienz nyaengqgaeng baenz nanz cij guh ndaej swnh, seizneix de daej riu mbouj baenz. Cangh Li doiq veihsin sauj max hai cienz seiz, yawj diuz saenqsik hai bae caet bak betcib maenz sim’in dangq- maz—— gij cienz ndaej cawx haujlai doxgaiq hawj lwgnyez lo!

Gij ngaenzhong sam cien lai maenz neix, youh aeu boiz ngaenz daigvanj cawx ranz, youh aeu cawx nyouhbenq lwgnyez, baihlaeng youh aeu gya cawx naijfwnj cijndaej, gij cienz caen mbouj naih yungh.

Byaij ok aen bouq yw heuj, Cangh Li doq lax naj gemj inndumj, doq ngiengxgyaeuj yawj aen ciubaiz “Yw Heuj Singq Lij” baez ndeu, de rox coegda lai. Caen lumj bouxlaux naeuz “Laemx roengz cij rox loh raeuz, gvaq dah cij rox laeg feuh” —— baezlaeng naeuz gyoengq caencik baengzyoux dingq, mbouj caiq daeuj gizneix yawj heuj lo!

Roek

Baez yaepda couh gvaqbae aen singhgiz lai, gij hong hawj hagseng fuzsiz engqgya gaenjcieng lo.

Ndawban Cangh Li miz doiq lwg songseng ndeu, dahsau Lij Hungz gyaez dajcang, daegmbauq Lij Gyangh gyaez dajnauh. Cangh Li gangj sam gangj seiq, songde hix mbouj miz maz gaijbienq, de ciengz vih neix gyaeuj in.

Doiq lwg songseng neix aenvih bohmeh gamguenj mbouj gaeuq, hagsib sim mbouj dingh, cinbu mbouj lai. Duenh neix fuzsiz engq gaen mbouj hwnj lo. Aeu siengj di banhfap cij ndaej.

Bingzseiz mbouj miz maz saeh daegbied roxnaeuz saeh gaenjgip, de cungj noix ra gyahcangj.

Hainduj, de anbaiz gij cozyez songde hag mbouj ndei haenx hawj daiq maranz gyagiengz lienh guh, hoeng songde bohmeh ciengzseiz gig haemh cij dauqma, mbouj miz vunz dukcoi, gij cozyez cungj guj mbouj liux, roxnaeuz guh loek lai, gij cih hix sij ndaej lumj gaeq bauz nei, hawj vunz yawj ndaej simnyap dangqmaz.

Cangh Li caen siengj dwk denva hawj gyahcangj songde baez he, youh rox gyoengq gyahcangj nyaengq hong ra cienz ciengx ranz, hix mbouj yungzheih, bingzseiz, mbouj miz maz seizgan buenx lwg, engq gaej gangj haeujsim gij hagsib gyoengq lwgnyez lo.

“Hagseng baengh lauxsae, baengz fonx baengh roemj maeq, hai, gou vanzlij ra seizgan lai son songde ba!” Vih hawj songde dawzcingq gij daidu hagsib, gij cingzcik gaen hwnjdaeuj, Cangh Li gietdingh hawj songde hai “cauq iq”, bang songde bouj hwnjdangz.

Yienghneix aen singhgiz daihngeih, Cangh Li moix haemh dajleix ndei song lwgnyez, couh cagaenj bwh go、gaij cozyez, caiq yawj gij suijbingz hagseng bwh ndei gij cozyez mbouj doxdoengz.

Ngoenz daihngeih, de siengj banhfap caenx ok seizgan, yungh roengzdangz caeuq hozdung roggoq hawj lwgsongseng neix fujdauj. Mizseiz youq ndaw gyausiz, mizseiz youq bangunghsiz. Hawj hagseng lienh gvaq le, de caiq gejgangj gij daez songde guh loek bae cij sim’onj.

Songde aenvih de naihsim sonyinx, cungj menhmenh cinbu lo, haujlai cihsiz gaxgonq hag mbouj rox ngeix mbouj doeng, seizneix cungj lwnh it rox sam lo.

Caet

Yienghneix guh saek geij ngoenz mbouj youqgaenj, hoeng, guh lai geij ngoenz le, Lij Gyangh dam guhcaemz couh mbouj haengj lo. Mwh de youq ndaw gyausiz dingq lauxsae sonyinx seiz, gyoengq doengzhag cingq youq gwnz cauhcangz dwk giuz、doxgyaep guhcaemz, angqyangz dangqmaz. Dingq gij sing riu doengzhag, de couh dungxmbouq eiqluenh, maz cungj mbouj haeuj rwz lo.

Ngoenz ndeu, Lij Gyangh cuengqhag dauqma seiz, baez raen daengz boh de, couh geqhaemz naeuz:“Daxboh, duenh neix gou youq hagdangz cungj deng lauxsae gaemhdawz, louz youq gyausiz sij cozyez, mbouj miz saekdi swyouz. Gou siengj cienj hag, ndaej lwi?” Gangj liux lij vei ndaej daejsubsub, raemxda doekbyonbyon.

Daxboh de raen daeglwg daej baenz siengsim, sim’in dangqmaz. De hix mbouj haengj lauxsae nyoegnyamx lwg iq, siengj caeuq lauxsae gangj baez ndeu cij ndaej.

Yienghneix de couh dwk denva hawj Cangh Li:“Cangh lauxsae, mwngz ndei. Gou dwg daxboh Lij Gyangh. Dingq de naeuz, duenh neix mwngz ciengzseiz louz de youq gyausiz guh cozyez, mbouj hawj de ndaej soeng dwg lwi? Yienghneix mbouj ngamj bw. Gou laihnaeuz, lwgnyez sim ndang cungj ndei cij ndaej……”

Cangh Li couh lwnh gij cingzgvang songde hawj daxboh songde dingq. Daxboh Lij Gyangh cungj doeksaet bae. De rox song lwgnyez swhgeij hagsib soqlaiz mbouj haeujsim geijlai, hoeng de siengj mbouj daengz, seizneix haujlai cihsiz gaen mbouj hwnj, caeuq gyoengq doengzhag ca haujlai, lij caeg gik dem……

“Laxlawz dwg lwg gik neix yaeuh gou lo! Docih lauxsae! Hawj mwngz dwgrengz lai lo!” Daxboh Lij Gyangh najmong naeuz.

“Canh lai lo! Daj guekgya saedhengz ‘song gemj’ cwngcwz daeuj, gou vanzlij yousim doiq lwg neix baenzlawz cij gaen ndaej hwnj. Seizneix lauxsae dauq mienx ngaenz fudauj lwg gou dem, caen habhoz lai lo.” Daxboh Lij Gyangh gag nambedbed. De daegbied docih Cangh lauxsae caenh sim son lwg de. Lai bi neix dauq, lwgnyez youq baihrog hwnj fujdaujbanh, gaenq yungh liux haujlai ngaenz, mboujnex, de hix mbouj yienghneix euqsim ngaekhek lo. Caiq gangj gaxgonq bae hwnj fujdaujbanh hix mbouj raen songde lumj duenh neix hag haeuj sim haeuj uk dem.

Haemhde, de couh daengq Lij Gyangh naeuz:“Lwg ha, Cangh lauxsae caen dwg vih mwngz ndei, mbouj ndaej caeg gik bw, aeu nyinhcaen riengz de hag, baezlaeng cij ndaej baenzcaiz.

Bet

Ngoenzde, dangz hozdung roggoq Cangh Li youq bangunghsiz youh laebdaeb fujdauj Lij Hungz caeuq Lij Gyangh. Aenvih gejgangj gij loeng ndaw cozyez songde lai, mbouj louzsim sing lingz cuengqhag, gangj sat daez le, baez yawj seizgan, cij rox gaenq cuengqhag ndaej cib lai faen cung lo.

“Gou lij caengz ciep ndaej lwgnyez, mazfanz mwngz naihsim caj yaep ndeu bw!” Doiq lwg baenz nanz cungj mbouj raen okdaeuj, gyahcangj neix gaenq caj ndaej siengj fatheiq lo. Aenvih seizneix ndaw cinjsoj de lij miz song boux hek cingq caj de dauqbae guh heuj ne! De yousim song duz “bit” “caj cawj” neix mbin deuz bae bw!

Mwh Cangh Li soengq song boux hagseng daengz bakdou hagdangz seiz, gyahcangj songde cij fwt rox: Laxlawz lauxsae moq neix couhdwg dahsau baez gonq daeuj hawj de ciemz heuj haenx!

De ndawsim baez anj, caen dwg “gwih vaiz bungq caen”! Sawqmwh, de youh gag naemj:“O! Nanzdauh lauxsae gaenq rox lwg gou dwg hagseng de, vih gij saeh ciemz heuj haenx, daegdaengq yienghneix doiq lwg gou? Yawj hwnjdaeuj baezneix caen aeu cienjhag cij ndaej lo!” Naj de mbwn hanh lo, nyaenq ndaej ganjgip daiq ndei douzgveih caeuq goujcau, goenggingq naeuz lauxsae:“Mazfanz lauxsae lo, docih mwngz!”

Cangh Li roxnyinh sing gyahcangj neix miz di sug rwz, hoeng youh siengj mbouj hwnj youq gizlawz raen naj gvaq.

De hix riunyumnyum naeuz:“Mwngz ndei! Gou couhdwg Cangh lauxsae ndwen gonq ngamq ciep ban neix. Gou rox sou nyaengq lai, cungj mbouj yungzheih. Haxbaenh mbouj louzsim yawj seizgan, ngaiznyed yaep ndeu, hawj mwngz caj nanz di lo, caen doiq mbouj gvaq ha!”

“Mbouj youqgaenj, dou docih lauxsae mbouj gib ne!” Gyahcangj neix yawj ok Cangh Li caengz nyinh ok swhgeij, sim dingh di lo, sikhaek heuh lwgnyez vaiqdi hwnj ci, luenh daj ndaw daeh mbon aeu yaekseiz daeuj hai ci, lij daiq doek mbaw doxgaiq ndeu doek roengz dieg dem.

Cangh Li gip hwnjdaeuj, siengj heuh de dingz ci. Hoeng, ci de gaenq lumj raq rumz nei mbin bongh bae gizgyae lo.

Cangh Li sijsaeq baez yawj, mbaw doxgaiq neix dwg mingzben ndeu——“Yw Heuj Singq Lij”…… De yawj aen ngaeuz bae gyae, ngauzngauz gyaeuj, riu lo.

Doeklaeng, Cangh Li vanzlij lumj doenghbaez nei laebdaeb son doiq lwg songseng neix. Songde hix yied daeuj yied cinbu, yied daeuj yied maij Cangh Li. Gij mbouj doxdoengz couhdwg moix baez cuengqhag, cungj dwg daxmeh songde daeuj ciep.

(2)