It

“Sw——sw——” Cangh Li doq sup heiq doq nyaenx in hawj gyoengq hagseng hwnjdangz.

De naj gawh ndaej geng raixcaix, hai bak mbouj ndaej, gwn ngaiz hix dwg gienh saeh hojsouh ndeu. “Caen dwgcaengz, gou itdingh cawz mwngz bae cij ndaej!” De daj ndawsim maenj naeuz.

Diuz heujgungx hawj de nyaenx in haujlai bi lo. Bingzseiz baez mbouj louzsim gwn daengz gijgwn mbouj ngamj, heiq ndat lai, nohheuj couh sikhaek foeg bongz hwnjdaeuj, in ndaej de gwn hix mbouj roengz ninz hix mbouj ndaek, hojsouh baenz haujlai ngoenz.

Lwg daihngeih Cangh Li ngamq ndaej roek ndwen lai, de couh mbouj miz geijlai cij bwnq gwn lo. Vihliux hawj lwgningq miz cij gwn gaeuq、gwn ndei, de couh gwn haujlai gijgwn ndaej bouj ndang, ndigah mboengqneix conghhoz youh in, heujgungx youh gawhngoetngoet lo. Baez aj bak cat heuj roxnaeuz gwn doxgaiq, couh in ndaej raemxda yaek conh bae, simfanz youh hojsouh.

De nyaenx geij aen singhgiz le, couh siengj hawj lwg iq gekcij bae, yienzhaeuh ndaejbienh couh cawz aen “cadan dinghseiz” neix bae.

Ngeih

Gig mbouj yungzheih cij nyaenx ndaej daengz dwkgaj roengzban, Cangh Li sikhaek gwih hwnj denceh, ganjvaiq buet bae yihyen ra canghywheuj. Byawz rox ra geij boux canghyw yawj le cungj naeuz heuj de cingq fazyenz, aeu gwn geij ngoenz ywsiuyenz gonq, siu foeg yw ndei le cij ndaej ciemz diuz heujgungx neix okdaeuj. Lij naeuz diuz heujgungx neix maj youq baihndaw lai, gij ragheuj youh cap ndaej laeg, guj gig nanz ciemz okdaeuj bw. Dingq canghyw baenzneix gangj, Cangh Li daengx ndang naenggaeq daengj liux bae. Gaxgonq dingq vunz gangj, ciemz heujgungx gig in gig mazfanz, yawj hwnjdaeuj caen mbouj gyaj.

Cangh Li gwn gij ywsiuyenz le, gvaq geij ngoenz najgvaz siu foeg lo. Diuz heujgungx hawj Cangh Li simfanz hozndat haenx hix lauxsaed haujlai lo.

Cangh Li roengzban le couh bae cunz gai, ra gij canghywheuj ndei baengzyoux doi hawj de.

De gietdingh youq “Goujgyangh Lijsi” gizde ciemz heuj, cujyau dwg aenvih Lij canghyw caz yawj heuj de le naeuz, diuz heujgungx neix, geij faen cung couh ciemz ndaej ok. Yawj aen siengq gagsaenq dwddwd de, Cangh Li guj de gisuz wngdang mbouj loek.

Sam

“Mwngz gungh miz sam diuz heujgungx, yaek ciemz liux bae lwi?” Lij canghyw cam naeuz, “ciemz naed ndeu aeu bak betcib maenz ngaenz. Danghnaeuz youq gou gizneix ciemz sam diuz bae, cij aeu gyau di cienzdingh gonq, doeklaeng baez ciemz diuz couh gyau baez ngaenz ndeu, baenzneix suenq roengzdaeuj ciemz diuz ngamq sai samcib maenz ndwi lo.”

“Gou vanzlij ciemz baihgvaz diuz neix bae gonq ba.”

Cangh Li guh lauxsae, ndawsim ndaw uk cungj niemh gij saeh sonhag caeuq gyoengq hagseng. De mbouj siengj aenvih ciemz heuj nguh de hawj hagseng hwnjdangz.

Caiqgangj, cawzliux baihgvaz diuz heujgungx daegbied minjganj ciengzseiz fazyenz, daengz seizneix gizyawz geij diuz hix mbouj miz maz gazngaih.

“Ndei, yienghneix couh ciemz diuz ndeu gonq, bak betcib maenz ngaenz, dwg lwi? ”Lij canghyw cam.

“W.” Cangh Li siengj vaiqdi baema dawz lwg.

Lij canghyw guh ndei cunjbei le, cimyawj gij heuj Cangh Li, naeuz:“Lauxbanj, mwngz wnggai mauhgvaq bi ndeu mbouj swiq heuj luba? Yawj hwnjdaeuj caeuq naj gyaeundei mwngz gig mbouj doxboiq bw! Mboujnex, swnhbienh swiq baez heuj ndeu ba? Bak hajcib maenz ndwi.”

Cangh Li miz geij diuz heuj maj mbouj bingz, yungzheih loengh uq, de mbouj ndei eiqsei naeuz:“Ndaej, yienghneix couh swiq lo.”

Swiq heuj seiz, Lij canghyw youh raen Cangh Li miz sam diuz heuj miz congh iq aeu coihbouj.

De genyi Cangh Li swnhbienh bouj lo, mbouj- nex gvaqlaeng heuj couh deng vaih caez. Caiq gangj bouj ndei le, conghbak engq seuq lo.

Cangh Li roxnyinh miz dauhleix, de ndawsim gag siengj: Gya hwnj swiq heuj caeuq bouj heuj liux sai bae roek bak samcib maenz, guh gijneix hix mbouj lai nanz, yienghneix couh bouj ba.

Yienghneix, songde doxyaeng ndei, gietdingh yungh cungj caizliuh ceiqndei daeuj bouj heuj.

Gij gisuz Lij canghyw caen ndei, daihgaiq gvaqbae aen cungdaeuz ndeu, swiq heuj caeuq bouj heuj cungj suglienh guh ndei lo.

Seiq

Ciep roengzdaeuj aeu ciemz heuj lo.

Lij canghyw daj ywmaz roengz goek heuj bae le, cij fwt roxsingj naeuz:“O, dahnuengx, caen doiq mbouj hwnj bw, haxbaenh gij yw boujheuj gyaqcienz gou naeuz loek lo, gij caizliuh neix dwg cingouj, gij saek caeuq heuj caen mbouj ca geijlai. Ndigah mwngz bouj sam aen congh heuj iq neix, moix diuz bak betcib maenz, gungh haj bak seiqcib maenz ngaenz cij deng. Mwngz yawj, song yiengh caizliuh mbouj doxdoengz, gyaqcienz hix mbouj doxdoengz bw. Dwg gou mbouj haeujsim, geiq loek gij gyaqcienz caizliuh lo, mwngz yawj seizneix raeuz baenzlawz guh cij ndei ne?” De gangj sat lij dawz song cungj caizliuh lumj yazgau, caenx ok di ndeu hawj Cangh Li guh doxbeij.

“Ai, Lij canghyw, raeuz haxbaenh gaenq gangj ndei aeu yungh gij caizliuh ceiq ndei bouj heuj, bak maenz diuz ndeu lo. Seizneix mwngz youh luenh hwnjgyaq, neix mbouj dwg yaeuh vunz ha?” Cangh Li heiqgaenj foedfoed, daengx da yawj Lij canghyw.

Cangh Li hainduj cij siengj ciemz diuz heujgungx ndeu, seizneix dauq deng boux canghyw neix baez dem baez yaeuh guh neix guh de, gaenq sai bae boengj ngaenz lo! De yied siengj yied ndatheiq.

“Mwngz hawj bak maenz diuz ndeu mbouj baenz bw, gij gyaqcienz aeu huq ca ndaej lai, gou deng caembonj lo. Seizneix gawqyienz gaenq bouj ndei le, raeuz cungj doiq yamq ndeu, gou couh suenq mwngz diuz ndeu bak hajcib maenz ngaenz, gungh seiq bak hajcib maenz, baenz lwi? Mboujnex, gou cijndei dawz caizliuh bouj ndei neix yaek okdaeuj, caiq yungh gij caizliuh bak maenz diuz de bouj hawj mwngz, yienghneix mwngz couh mbouj yungh bouj cienz lo. Dwg gou lujlaj, gij huq ndei haenx couhsuenq gou gag yungh sai lo.” Lij canghyw baij ok gij yiengh deng gwn vei caemhcaiq youh gig hojlienz okdaeuj.

Gangj sat couh siengj yaengx faggeb yaek gij caizliuh gaenq bouj ndei haenx okdaeuj.

“Caj yaep ndeu! Gou naemj yaephe. ”Cangh Li naeuz.

De naemj: Haxbaenh de couh siengj aeu gij caizliuh cingouj bengz neix daeuj bang gou bouj heuj lo, seizneix hawj de yaek okdaeuj le caiq lingh cuengq caizliuh roengzbae, mboujdan gou deng coih, caemhcaiq loengh mbouj ndei…… Hai, suenq lo, heuj ndei couh baenz, gwn di vei hix mbouj youqgaenj lo.”

De caiq baez yawj coh rogdou, mbwn gaenq fuemx, vanzlij cagaenj ciemz heuj, vaiqdi baema daiq lwg ba.

Haj

“Suenq lo, mbouj miz seizgan vuenh lo, ciemz heuj ba. Mboujgvaq, saeh neix couhdwg baenzneix dingh lo, danghnaeuz gyaqcienz caiq miz bienq, gou couh yaek ra gij bumwnz doxgven haenx douzsu mwngz bw!” Cangh Li miz leix sing haenq naeuz.

“Baenz lo! Docih dahnuengx aek gvangq daihliengh. Gou mieng: Danghnaeuz gyaqcienz caiq bienq, gou couh mienx ngaenz mwngz yw heuj bae!” Lij canghyw ngaekgyaeuj gungj hwet, angqvauvau hainduj bang Cangh Li ciemz heuj.

(1)