《Fungsanh Yen Ceiq》 geiqsij, Cing- ciuz Gvanghsi sam bi （bi 1877） Fungsanh Bouxhek (Bouxgun) Bouxdoj （Bouxcuengh）cengnauh, nauh le haujlai nanz, song baih cungj miz vunz siengdai, doeklaeng ginggvaq diuzgaij, cij ndaej bingzdingh. Dwkdaengz Cunghvaz Yinzminz Gunghozgoz laebbaenz, Bouxcuengh、Bouxgun、Yauzcuz Fungsanh Yen daengj minzcuz baedauq cij hainduj cingqciengz, gyoengqvunz doxaeu, giet baenz lauxdoengz, doxhuz caemhyouq, caencingq saedyienh minzcuz daih yungzhab daih doxgiet.

Gou couh youq ndaw yienhsingz Fungsanh hwnjban, daj ranz daengz danhvei caenh miz goengleix gyae, gou ciengzseiz byaij roen bae hwnjban. Byaij youq gwnz roen, gou ciengzciengz yawjraen vunzlai gak minzcuz Fungsanh doxhuz caemhyouq, gig raeujsim.

Bi 2019, Fungsanh daengx yienh ndaej duet mauhgungz liux. “Cienzmienh guhbaenz aen biengz siujgangh, aen minzcuz ndeu cungj mbouj ndaej noix” gij vahsenhconz yienhda neix couh venj youq gwnz Giuznazmaj ndawyienh, gig saenq- hwnj sim vunz. Youq Fungsanh aen singz iq neix, diuz Giuznazmaj dwg gij cotsim roenloh, ngoenznaengz gou cungj byaij gvaq diuz giuz neix. Baihgwnz Dah- gyauzyinh con bya ndonj gamj riuzvakvak, henzhamq geij godauz va hai hoengz- gywggywg, caeuq “rinyungz daih’it, aen singz conghgamj” geij cihsaw hung gaek youq gwnz dat Conhlungznganz lwenqmyanzmyanz haenx doxciuq; baihlaj, roeg- raemx guh’angq, raemx- nywj mwncup; gizgyae, gij fwj hausak lumj faiq geujheux Byavwnzbiz、Yayungzbauj, aen singz bya iq gyaeundei neix youh hainduj ngoenz moq ndeu.

Gvaq Giuznazmaj couhdwg diuz Daihloh Yangzgvanh, henzdah ndaem miz gomanghgoj caeuq goreiz, heusausau、mwncupcup， dangj dwk seiqhenz raemh- fwdfwd. Vunzlai maij youq neix youzbyaij、doiqfwen、guh’angq. Daegbied dwg seizhah, haetromh vunzlai couh naengh rim laj gofaex lo. Gizneix bang ndeu, gizhaenx bang ndeu, singfwen giz hwnj giz roengz. Canghfwen Bouxgun、Bouxcuengh、Yauzcuz ndawbiengz doxcomz youq itheij, gyoengqde haujlai cungj rox gangj geij cungj vah minzcuz, ndaej aeu vah mbouj doengz bae doiqfwen. Mboujguenj dwg “diuh va’ngaeux” Boux- gun, roxnaeuz dwg “nizhahliuh” Boux- cuengh, roxnaeuz dwg “saivahbingj” Yauz- cuz, gij diuh fwen yenzswnghdai neix rwenzru ndeidingq, baezbaez byaij gvaq, gou cungj dingq dwk simmaez bae.

Aen siujgih gou youq haenx, baiz monzmienh laj laeuz miz “Aen Diemq Buh Minzcuz Cangmeij”. Aen de cienmonz gai gij ndangdaenj minzcuz aeu baengzdoj bonjdieg guh baenz he, mehlauxbanj dwg boux lauxsae ngamq duiyouh ndeu. Hwnj- ban roengzban byaij gvaq, gou ciengzseiz dingqnyi de caij aen cibuh yienghdazdaz. Miz baez ndeu, de caeuq gou naeuz, gij doz raiz laiyiengh gwnz ndangdaenj minzcuz, geiq miz lizsij vwnzva、fungsug sibgvenq、ginglig ndwenngoenz gak minzcuz, couh lumj “daej minzcuz lizsij youq gwnz ndang” nei, de gig siengj ciepcienz ndei gij dinfwngz cienzdoengj neix. De lij naeuz, gij buh iq、haizva、gaendukgyaeuj Bouxgun Bouxcuengh daengj yied daeuj yied doxlumj lo, cij miz ndangdaenj Yauzromj lij ce gij yienghsik daegbied gyaeundei de. Gou ciengzseiz yawjraen baenzgyoengq mehbaj youq ndawdiemq de langhbaij buhvaq minzcuz, lij dangciengz ciengq geij coenz fwen, ingj doujyinh cienz hwnj gwnzvangj bae, sim’angq dangqmaz.

Gaxgonq, mwh bae hwnjban, gwnzgai vunz baebae dauqdauq, ciengzseiz ndaej dingqnyi gij Vahgun bonjdieg yaem naekgywg, Vah Yauzcuz sing daemqdet unqnem, Vahcuengh daiq sing deihfueng. Gaenriengz Vahbujdungh bujgiz, seizneix gwnz gai Fungsanh, gyoengqvunz cungj gangj Vahbujdungh liux, lienz goenglaux mehlaux caet betcib bi haenx cungj aeu Vahbujdungh caeuq lwgnyez gangjvah. Neix cungfaen daejyienh le gak minzcuz baedauq doxgyau doxyungz, vahgangj caemh doxyungz hwngfat.

Seizneix Fungsanh miz haujlai gyaranz cungj dwg lai aen minzcuz gapbaenz, lumj daeggo doengzdangz gyae gou, daxboh de dwg Bouxcuengh, daxmeh de dwg Bouxgun, mehyah de dwg Yauzcuz, lwgbawx de dwg Mulaujcuz, hoeng ranz de cungj doxhuz doxndei, vuenyungz raixcaix.