Mehduh naemj: Danghnaeuz ndaej dawz gij reih fwz neix daeuj ndaem vagimngaenz couh ndei lo, dieg gvangq youh bingz, hix mbouj yungh sinhoj bin hwnj bya bae mbaet va. Naemj daengz neix, Mehduh angq- fwngfwng dawz gij naemjfap neix lwnh Liuz Senj nyi.

Liuz Senj dingq le, naeuz:“Mwngz aen naemjfap neix gig ndei, raeuz sien camcam gyoengq beix- nuengx ndawmbanj cij ndaej.”

Gyoengqvunz dingq le, cungj naeuz:“Dou youq rog dajgoeng goq mbouj ndaej baenzlai, bouxgeq guh di reih gyawj gaeuq gwn caemh mbouj loek lo, gij reih gyae vut fwz hix hojsik, sou song gvanbaz siengj ndaem maz couh ndaem maz.”

Dingq gyoengqvunz baenzneix gangj, Mehduh caeuq Liuz Senj angq raixcaix, gyoengqde raek cax gaemh liemz bae raemj bae gvej gij go’em gohaz mwncupcup haenx, dak geij ngoenz ndit bienq reuq bienq roz le, bog feiz he baez diemj coemh baenz daeuh. Seizneix gij reih fwz muengh bae ndoqndatndat, Mehduh caeuq Liuz Senj raen rongh di lo.

Haj

Liuz Senj aeu vaizdiet bae cae reihfwz, reih dwg cae sat lo, hoeng gij namh baenz ndaek baenz ndaek youq gizhaenx, deng aeu fag gvak bae dub soiq cij ndaej. Liuz Senj caeuq Mehduh ngoenznaengz caeuxcaeux couh hwnqcongz, gwn ngaizromh le, couh gwed gvak bae gvak reih soeng naemh. Gij reih neix vut nanz lo, gyoengqvunz langhbuengq duzcwz duzvaiz daeuj neix gwn nywj, gij namh deng cwz vaiz caij gvaq, youh net youh geng, Liuz Senj caeuq Mehduh baenz buenq ndwen cij gvak ndaej geij gaiq reih.

Liuz Senj miz di doeknaiq, naeuz:“Baenzlai nanz cij guh ndaej di neix, raeuz mbouj guh suenq lo, lingh guh yiengh hix ndaej ciengx mingh.”

Mehduh ngiengxgyaeuj yawj Liuz Senj mbat ndeu, uetuet gij hanh gwnznaj, doq gvak doq naeuz:“Guh saeh aeu miz gyaeuj miz rieng, laemxsim guh roengzbae, cungj miz ngoenz ndeu raen maqmuengh.”

Dingq Mehduh baenzneix gangj, Liuz Senj naemj: Mehyah cungj mbouj lau sinhoj, raeuz bouxsai couh wnggai engq mbouj lau lo. Naemj daengz neix, Liuz Senj daengx ndang gig miz rengz, Liuz Senj gvak daengz gyaeujreih, Mehduh lij youq baihlaeng, Liuz Senj baenq gyaeuj youh dauq caeuq Mehduh caez gvak hwnjbae……

Daengngoenz hwnj youh doek, mbwn laep youh mbwn rongh, sam ndwen gvaqbae lo, gij reih fwz neix cungj deng Liuz Senj caeuq Mehduh gvak liux lo, muengh bae gvangq- luemluem、bingzrwdrwd, gyoengq vunzmbanj miz di anj lo.

Cingj reih ndaej le, Mehduh caeuq Luz Senj couh naemj ra miuz vagimngaenz daeuj ndaem. Seizneix gizgiz cungj miz miuz vagimngaenz gai, Mehduh nyinhnaeuz gij miuz haenx mbouj dwg maj youq ndawbya, ndawbya gij vagimngaenz haenx dwg cwxseng, cienq baenz raemxcaz feih hom diemz, vunz ndoet le cingsaenz sangj, doiq ndangdaej ndei.

Naemj daengz couh bae guh, Liuz Senj caeuq Mehduh ngoenznaengz guh hongranz ndaej le, couh aemq loz hwnjbae vat gud go miuz vagimngaenz.

Vat gud go vagimngaenz dwg gienh saeh gig saepsoiq he, aeu siujsim riri, mbouj hawj gij go lwg deng sieng raggoek, caiqlix raggoek lij aeu nem miz di namh, yienghneix couh yungzheih ndaem baenz.

Mehduh caeuq Liuz Senj vat gud ndaej gij go lwg vagimngaenz le, cungj mbouj ce gvaq haemh, daengz ndawreih sikhaek vat gumz ndaem roengzbae, caiq aeu raemx rwed, hawj gij raggoek go de ndoet raemx gaeuq bae.

Miz vunz riu naeuz:“Caengz raen vunz yienghneix guh gvaq, caen yousim sou dwgrengz ndwi, guhhong bamz.”

“Mbouj bae sawq baenzlawz rox guh baenz mbouj baenz? Guh yiengh- lawz cungj lau neix lau haenx, ciuh- vunz guh mbouj baenz saek yiengh.” Miz vunz yienghneix dap naeuz.

Mehduh caeuq Liuz Senj dingq gyoengqvunz baenzneix gangj le, cij dwg riuriu mbouj gangj maz.

Roek

Youh gvaq le duenh seizgan he, Mehduh caeuq Liuz Senj couh ndaem sat gij miuz vagimngaenz lo, aenvih gaxgonq ndaej soeng namh gvaq, gij miuz ndaem roengzbae mbouj nanz couh roengz rag maj mbaw oiq lo.

Vagimngaenz yied maj yied raih bae gyae, Liuz Senj caeuq Mehduh couh raemj haujlai faexcuk daeuj haem, humx baenz haujlai diuz gaq, hawj go de raih hwnjbae. Ngoenz doek ngoenz gvaqbae, gij gaeu vagimngaenz yied maj yied mwncup, baenz gaeu baenz gaeu doxsan doxheux, langh da muengh bae baenz benq baenz benq heusubsub, Mehduh caeuq Liuz Senj ndawsim diemzsisi. Gyoengq vunz- mbanj hix cungj doeksaet lo, miz vunz naeuz:“Sinhoj guhhong mbouj guh ndwi, laemxsim guh saeh, cungj guh ndaej baenz.”

Bi daihngeih seizcin daeuj daengz, rumzcin cifefe, ndit raeuj- rubrub, vagimngaenz hai va lo, saekhenj saekhau hai doh gwnz gaq, raq rumz ci daeuj, gij heiq rang swnh rumz mbin bae, mbin daengz ndawmbanj gizgiz gungxgungx, mup gaemz heiq he, hawj vunz yaek fiz.

Gij heiq va rang yinx gyoengq- vunz daeuj daengz ndawreih vagim- ngaenz, baenz benq baenz benq vagimngaenz hai va hoenghfwgfwg, hawj vunz simcingz sangj raixcaix, gyoengqde guhmuengz youq ndaw va youzbyaij, ingj siengq, sing gangj sing riu nauhnyied raixcaix. Youzbyaij、ingj siengq ndaej le, gyoengqvunz lij cawx vagimngaenz bae ma, naeuz gij vagimngaenz daj ndawbya senj daeuj ndaem, heiq hom cienq caz ndoet habbak, doiq ndangdaej ndei.

Ndawreih vagimngaenz, ngoenz- ngoenz miz vunz daeuj youzlangh, ngonz va cawx va. Boux cienz boux, gizgiz cungj rox Mbanjsoem Liuz Senj caeuq Mehduh song gvanbaz ndaem vagimngaenz, ndawsingz mizmbangj aen bouqyw lij daegdaengq daeuj dingh aeu. Mehduh caeuq Liuz Senj nyiedcingz dakdaih gyoengq bouxhek, souhaeuj hix ciemh lai lo.

Seizcou daengz lo, mbwn sang rumz sangj, ndawreih lij miz vagim- ngaenz hai, hoeng cix mbouj beij seizcin hai ndaej hoengh, vunz daeuj youzlangh engq lai, gyoengqvunz naeuz:“Seizcou daeuj neix youz engq miz yinxdaeuz, ndit mbouj nit mbouj ndat, rumz yaengyaeng ci gvaq henzrwz, gij saeh nyapnyuk hix lumz bae lo. Lij miz, raen gij najriu sou song gvanbaz, hawj vunz aen sim raeujrubrub.”

Vagimngaenz hawj Mehduh song gvanbaz demlai souhaeuj, daeglwg Liuz Senj Liuz Siujcih ndaej yw bingh lo, gangj vah hix mbouj gazgwd geijlai, byaij loh hix onj di lo. Daeglwg Mehduh Daegduh hix gauj ndaej daihhag, haeujhag ngoenzhaenx, Meh- duh dawz dab cienz na’nup he cuengq daengz gyangfwgz daeglwg bae, naeuz:“Ranz raeuz baengh ndaem vagim- ngaenz cij ndaej gvaq ndei saedceij, mwngz hix aeu ndeindei doegsaw.”

Caet

Mehduh caeuq Liuz Senj ndaem vagimngaenz gyae’gyawj cungj rox caez, ndaej ngaenz youh ndaej mingz, gyoengqvunz daengz gyawz cungj lwnh gijneix, cungj danqhaenh mbouj dingz.

Geij bi neix, binghraq lah doh gwnzbiengz, haujlai vunz mbouj miz hong guh, cungj guhdoih dauq mbanjranz, naeuz youq rog mbouj miz hong guh, lij aeu gyau ranzco, gwn yungh hix bengz, dauqranz ndaem doenghgo lij ndaej ciengx mingh.

Liuz Senj naeuz:“Sou dauqranz mbouj miz hong guh, ndawranz laux nyaeq cungj aeu gwn ngaiz yungh cienz, gaxgonq sou gij reih vut fwz haenx gou gaenq ndaem vagimngaenz, mboujyawx sou caiq dawz bae guh, ganq vagimngaenz gai aeu cienz, roxnaeuz ndaem doenghgo wnq hix ndaej.”

Gyoengqvunz dingq le, mwngz yawjyawj gou, gou muenghmuengh mwngz, cungj mbouj gangj vah, sim naemj: Gij reih haenx gyoengqde song gvanbaz gaenq ndaem vagimngaenz majhung gai ndaej cienz lo, raeuz seizneix ciep bae guh miz di mbouj hableix bw.

Raen gyoengqvunz caemrwgrwg mbouj dap vah, Mehduh hix naemj rox lo, riu naeuz:“Gyoengq beixnuengx, gij reih haenx sou cuengqsim bae guh ba, gag ganq gag guh gai ndaej geijlai va geijlai ngaenz suenq duh sou, gou lij docih sou geij bi neix hawj dou guh gij reih neix ndaem vagimngaen demlai souhhaeuj ne.”

Dingq Mehduh baenzneix naeuz, gyoengqvunz cungj riu lo, miz vunz naeuz:“Gaxgonq caezgya cungj ok rog dajgoeng hawj reihnaz vut fwz, hix nyinhnaeuz guh reihnaz mbouj dij, caeklaiq baengh sou song gvanbaz gaenx guh, caiq haifwz ndaem vagim- ngaenz, namhhenj bienq vuengzgim, seizneix dou caiq dued ma guh, saedcaih gvaq mbouj ndaej bae.”

Mehduh dingq le, riu naeuz:“Raeuz beixnuengx ndawmbanj dox- ndiep doxgyaez dox bangcoh, vuen- yungz saedceij gvaq mbouj caenh.”

Gyoengqvunz mbouj caiq bae baihrog dajgoeng lo, bouxboux netsim youq ranz ganqhoh vagimngaenz, ranzranz miz cienz haeuj daeh, ndawmbanj gizgiz rang doh vagim- ngaenz.（2 sat）