原文（Hoh saw daj Cinz Cunghsiz《Gvaq Cieng, Gij Sing Bauq Ranzmbanj Saedyienh Aen Loq》 aeu）：

我突然明白过来，农民圆了千百年的梦——吃饱了！就是在这一年里，土地下户给农民自己作务，一年便获得缸溢囤满的丰收，从年头到年尾只吃纯粹的麦子面馍了，农民说是天天都在过年。这炮声在中国灞河两岸此起彼伏经久不息地爆响着，是不再为吃饭发愁的农民发自心底的欢呼。

译文：

1

Gou sawqmwh roxyiuj lo, boux- guhnaz saedyienh le gij loqsiengj baenz cien bak bi de——gwn imq lo! Couhdwg youq bineix, faen naz faen reih roengz gak ranz gak hoh, hawj bouxguhnaz gag ndaem gag sou, bi ndeu couh ndaej fungsou gang roenx cang muenx, daj nienzdaeuz daengz nienzdaej caenh gwn gij mienhbau mbameg cingh lo, boux- guhnaz gangjnaeuz ngoenzngoenz cungj dwg gvaq cieng. Gij sing bauq youq song mbiengj haenz Dahbahoz Cungguek yiengj dwk goksagsag, lienzdaemh mboujduenh、naihnanz mbouj dingz. Neix dwg gij angqhemq bouxguhnaz daj ndawsim fat ok, gyoengqde mbouj caiq vih gwnhaeux youheiq lo.

（上林县 Cinz Yez/覃 悦）

2

Gou foedfwd mingzbeg gvaqdaeuj, aen loqsiengj beksingq siengj gwn imq muengh le ciencien fanhfanh bi de ndaej saedyienh lo! Couhdwg youq ndaw bineix, beksingq ndaej swhgeij guh diegdeih baihlaj, bineix ndawcang haeux rim yaek boed bae, daj bi’nduj daengz bi’byai cungj dwg gwn mba megmienz lo, beksingq naeuz ngoenzngoenz cungj dwg gvaq cieng. Gij sing bauq neix youq song henz Dahbahoz Cungguek raq sang gvaq raq, sing yiengj goksat, nanznanz cungj mbouj dingz, dwg gij angqhemq beksingq mbouj caiq vih gwn mbouj imq simnyap.

（平果市 Banh Haijvah/潘海花）

3

Gou sawqmwh roxdaengz, boux- guhnaz saedyienh le aenloq cien bak bi haenx——gwn imq lo! Couhdwg youq bineix, reihnaz faen roengz hoh, bouxguhnaz gag dajndaem, gijhaeux bi ndeu couh ndaej doi baenzbyoz baenzdong, baenzbi cungj dwg gwn mbamienh haeuxmeg cengh, boux- guhnaz naeuz ngoenzngoenz doengj dwg gvaq cieng. Gij sing bauq gizneix dingz gizhaenx yiengj, youq song henz ga Dahbahoz Cungguek dwk- humxhumx cuengq mbouj dingz, dwg gij singhemq vuenyungz ndawsim bouxguhnaz: Mbouj hoj vih gwn haeux youheiq lo.

（武鸣区 Mwiraiz/霜 露）

4

Gou sawqmwh mingzbeg gvaq- daeuj, vunzlai saedyienh gij loqsiengj cien bak bi——gwn imq lo! Couhdwg youq bi neix, saedhengz faen naz daengz ranz, hawj nungzminz hawj bonjfaenh guhhong, bi ndeu couh gang rim cang rim, daj goek bi daengz rieng bi cungj ndaej gwn haeuxmeg saw lo. Nungzminz naeuz ngoenzngoenz cungj dwg gvaq cieng. Gij sing bauq neix youq song hamq Dahbahoz Cungguek giz hwnj giz roengz, nanznanz mbouj dingz, dwg gij singhemq ndawsim nungzminz, gyoengqde mbouj caiq vih gwn haeux youheiq lo.

（青秀区 Lij Yanghlenz/李香莲）

5

Gou fwt roxnyinh gvaqdaeuj, nungzminz saedyienh aen loq cien bak bi——ndaej gwn imq lo! Couhdwg youq ndaw bineix, reihnaz baen daengz ranz hawj nungzminz swhgeij gag leix le, bi he couh ndaej mbung rim gang roenx. Daengx bi daj goek daengz byai cungj dwg gwn mba megmienh cinghseuq, nungzminz naeuz ngoenzngoenz cungj ndaej gvaq cieng. Gij sing bauq neix youq Dahbahoz Cungguek song haenz dek dwk, mwnqneix dingz mwnqwnq yiengj, nanznanz mbouj dingz, dwg gij sim’angq gyoengq nungzminz mbouj caiq you dung iek le daj ndawsim hemq okdaeuj.

（平果市 Loz Ginhhungz/罗金宏）