It

Lajmbanj vunz ninz caeux, banhaemh gouj diemj lai cung vunz couh ninz caem lo. Geij ngoenz neix Daegduh ndang mbouj ndei, cauzyoyo mbouj haengj laepda ninz, Mehduh naengh youq henzcongz, de iet fwngz lumhlumh najbyak Daegduh, roxnyinh ndat lumj feiz coemh nei, Daegduh fatndat lo.

Daegduh bineix seiq bi, de ngamq ndaej bi ndeu seizde, daxboh couh baenzbingh gvaqseiq lo. Geij bi neix gvaqdaeuj, saeh hung saeh iq mbouj miz byawz daeuj bang Mehduh.

Gaxgonq mboujlwnh gyang- ngoenz roxnaeuz gyanghwnz, Daegduh baez fatbingh, Bohduh caeuq Mehduh cungj dwg guhdoih soengq daeglwg bae yihyen. Daj Bohduh mbouj youq le, Daegduh baenzbingh, Mehduh cijndei heuh vunzwnq haici doz bae yihyen. Yienghneix mbat song mbat mbouj miz maz, lwgnyez gaenx baenzbingh, heuh vunz bang lai le, ndawmbanj gij mehyah haenx najfonx lo, langh vah naeuz, Mehduh siengj maeuz bouxgvan vunz, mehmaiq mbouj rox guh mehmaiq, ngoenzlawz deng vunz dub cungj mbouj rox.

Dingq gij vah neix, Mehduh gag doek raemxda, raemxhaemz gag ndwnj roengz dungx. Mehduh hix naemj ra bouxsai ndeu caez gvaq, gijneix mbouj dwg bae haw cawx doihduz, siengj ra couh ra, couh yienghneix, de itcig boux ndeu caeuq daeglwg gag gvaq saedceij.

Seizneix byonghhwnz lo, vunz- mbanj ranzranz gven dou haeuj ninz, Mehduh caen mbouj rox heuh byawz soengq daeglwg bae yihyen. Sawq- mwh, de naemj hwnj Liuz Senj. Mehduh rox, youq aen mbanj neix, youq aen seiz neix, hix cij miz heuh Liuz Senj daeuj bang de.

Ngeih

Mbanjsoem miz caet aen doih, mbanj gvangq vunz lai. Mehduh haq daengz Mbanjsoem mbouj caengz roxnaj geijlai vunz. Bigvaq ndwensam, Mehduh ce Daegduh youq ranzmeh hawj daxmeh bang daiq, boux ndeu okbae dajgoeng lo.

Mehduh daeuj daengz Gvangj- dungh aen gunghcangj guh vanzgi ndeu ra hong, boux ciu hong dwg bouxsai ndaej samcib lai bi he, cik gaswix miz di gvez, diuz hoz miz di mbeuj. Da raen Mehduh daeuj, bouxsai neix riu naeuz:“Baezneix cungjsuenq ciu ndaej boux doengz mbanj he lo, gou hix dwg vunz Mbanjsoem ne.”

Mehduh miz di doeksaet, de mbouj roxnaj bouxsai neix dwg byawz, hoeng bouxsai neix dauq roxnaj Mehduh dwg byawz.

Gvaqlaeng Mehduh cij rox, bouxsai neix heuhguh Liuz Senj. Liuz Senj daj iq couh mbouj miz bohmeh, de lumj duzcwz duzvaiz langhbuengq nei, mbouj miz vunz guenj. Baez he, de bin hwnj gwnz gofaex bae, ngafaex raek lo, de doek roengz laj goek gofaex daeuj, diuz gaswix bungq deng ndaek rin hung he, raek bae lo, diuz hoziu hix deng sieng, mbouj miz cienz gibseiz yw, cij baenz yienghneix.

Liuz Senj gaenx, rox dajsuenq, de cawx aen cimienhbau he rag hek, souhaeuj mbouj lai, gaeuq gwn gaeuq yungh, lij miz di ngaenz yawz dem.

Vunz guh ndaej baenz gwn, bouxboux ceng daeuj doh, miz vunz hawj de guhmoiz. Doeklaeng Liuz Senj caeuq dahsau ndeu doxaeu lo, seng laeq lwgsai ndeu. Laeq lwgsai neix maj ndaej sam bi lai lij caengz rox byaij, gangj vah hix mbouj seuq, raemxmyaiz rihnengneng. Doeklaeng song gvanbaz dawz daeglwg bae yihyen, cij rox dwg uk gyad. Daeglwg baenz yienghneix, bouxgvan hix ndang feiq, yah Liuz Senj yied ngeix yied doeknaiq, deuz bae lo.

Mehyah lizbae, Liuz Senj aeu ganqhoh daeglwg, lij aeu guh nazreih, mbouj ndaej haici bae rag hek, gaxgonq rom ndaej di cienz haenx, hix yw daeglwg sat lo.

Liuz Senj miz daeg lauxbiuj ndeu youq Guengjdoeng banh gunghcangj, de raen Liuz Senj saedceij hoj gvaq, couh heuh Liuz Senj cuengq daeglwg hawj bohmeh cihgeij guenj, bae gaen de guhhong. Couh yienghneix, Mehduh caeuq Liuz Senj cij suenq roxnaj.

Ngoenz ndeu, dah nuengxbawx dwk dienhvah daeuj naeuz daxmeh baenzbingh haeuj yihyen, geij duz moumeh hix roengz moulwg, de boux vunz ndeu goq mbouj ndaej baenzlai, heuh Mehduh ganjvaiq dauqranz.

Guhhong ngamq ndaej di cienz, Mehduh sij mbouj ndaej lizhai gizneix, seizneix daxmeh bingh lo, de mbouj ndaej mbouj dauqranz.

Bouxgeq dangq gofaex nduk, gizneix mbouj in gizde dot. daxmeh youq yihyen cib lai ngoenz couh yw ndei, dauq bae ranz lo, Mehduh dajsuenq mbouj nanz caiq bae dajgoeng. Couh youq seizneix, geij duz moumeh caeuq gij moulwg ranzmeh sawqmwh baenz raq dai caez lo. Nuengxbawx naeuz:“Dahcej ha, dax- meh baenzbingh, seizneix moumeh moulwg cungj dai caez, mwngz caeuq Daegduh mbouj ndaej youq neix youq roengzbae lo.”

Mehduh rox nuengxbawx ndaw- vah miz vah. Dieg dou miz aen fungsug neix, naeuz lwgmbwk haq bae ranzvunz le, mbouj ndaej dauq ranzmeh youq nanz lai, lwgnyez hix mbouj ndaej youq, mboujnex ranzmeh youq mbouj onj, yienghyiengh mbouj swnhsim.

Mbouj miz banhfap, Mehduh cijndei daiq Daegduh dauq ranzgvan, mbouj caiq ndaej bae gyawz dajgoeng lo.

Sam

Ngoenzde, ndit dak gwnzndang manhsatsat, Mehduh youq ndawreih ngaemgyaeuj gvak reih. Sawqmwh, dingqnyi gizgyae miz sing yiengjhuhu, miz vunz hai vaizdiet haeuj ndaw reih de daeuj.

Mehduh ngiengxgyaeuj bae yawj, Liuz Senj gaenq dingz ndei vaizdiet, riuhehe naeuz:“Gou hix daj Guengj- doeng dauqranz lo, mbouj siengj caiq vut daeglwg youq ranz.”

Mehduh caengz dap vah, Liuz Senj youh naeuz:“Ngoenzneix ndaej- hoengq, go daeuj bang mwngz saek- seiz.”

Vaizdiet youq ndawreih baenq geij hop, mbouj geijlai nanz, benq reih Mehduh couh fan liux lo. Gij hanh daj gwnznaj Liuz Senj baenz ndik baenz ndik ringx roengzdaeuj, geu buh gwnzndang hix hanh dumzswdswd, Mehduh yawj youq ndawda, nyinh youq ndawsim.

Mehduh nyinhnaeuz Liuz Senj yienznaeuz ndangdaej mbouj suenq ndei, aen sim gig ndei, gig mizsim caeuq de caez gvaq ciuhneix.

Daxmeh Mehduh rox le naeuz:“Bouxneix ndang feiq cixbah, lij miz daeglwg uk gyad he, mwngz bae gaen de, mboujdanh gwn hoj, dou hix mbouj miznaj.”

Mehduh naeuz:“Liuz Senj sim- ndei, doiq gou caensim, mbouj lumj gij bouxsai wnq, bak raeuz bak vad ndwi.”

“Mwngz naeuz de ndei couh bae ba, daengzcog gwn hoj mbouj ndaej gvaiq byawz.” Daxmeh danq gaemz heiq raezrangrang he.

Najranz mehmaiq miz bak lai, Mehduh roxnyinh aeu vaiqdi haq vunz cij ndaej. Bide dajsou sat le Mehduh caeuq Liuz Senj doxaeu lo, gyoengqde mbouj cingj laeuj, hix mbouj miz vunz goenghoh. Ngoenzde Liuz Senj haici coux Mehduh mehlwg daengz ranz, Liuz Senj riu naeuz songde:“Neix dwg ranz raeuz, neix dwg daeglwg gou, heuhguh Liuz Siujcih. Daegduh ha, Liuz Siujcih beix mwngz sam bi, mwngz heuh de guh daeggo ba.”

Daegduh muengh gvaqbae, raen gwnz daengqraez miz daeg lwgsai he gutgungq ninz youq gizde, aen ndang youh iq youh byom, naengbak doenghyaebyaeb gangj mbouj ok saek coenz. Daegduh ndoj youq baihlaeng daxmeh, nyeng aen gyaeuj okdaeuj, sing iq naeuz:“Daeggo ndei.”

Seiq

Gaxgonq gak ranz gag gvaq, seizneix song ranz vunz gyoebbaenz ranz ndeu, seiq boux vunz caez gvaq saedceij, ndawranz gak yiengh sawjyungh aeu yungh cienz, Liuz Senj haici bae dap hek, souhaeuj ngamq gaeuq ndawranz yungh, mbouj raen yawz geijlai ngaenz.

Youq lajmbanj ra faen ngaenz mbouj yungzheih, seizneix cingq dwg seizcin, gizgiz nywj heu faex mwn, gwnzbya vagimngaenz baenz nyumq baenz caz, saekhenj saekhau doxcab hai dwk, sanq ok raqraq heiqrang. Vagimngaenz dijcienz, Mehduh caeuq vunz guhdoih hwnj bya bae mbaet vagimngaenz, de ngoenz ndeu couh mbaet ndaej ngeihcib lai gaen, gai ndaej di cienz haeuj daeh, de angq raixcaix, sim naemj: Vah naeuz gyawj bya gwn bya, gyawj raemx gwn raemx. Gwnzbya miz doenghgo neix gai ndaej ngaenz, caen gouq ndaej bouxhoj ha.

Mbaet vagimngaenz dauqranz, Mehduh naengh youq bakdou yietnaiq, muengh gij rumz ci gvaq doenghnaz, gomiuz heuswdswd swnh rumz fanyubyub, lumjbaenz caengzcaengz raemxlangh heu nei. Muengh gij gomiuz heuswd neix, Mehduh fwt naemj daengz: Geij bi neix gyoengq bouxcoz cungj ok rog dajgoeng ra cienz, ce bouxgeq caeuq lwgnyez youq ranz. Gyoengq bouxgeq nienz geq rengz naiq, cij guh gij reih gyawj mbanj gyawj ranz, naeuz ndaem di haeux caeuq haeuxyangz gaeuq gwn couh ndaej lo. Yienghneix haujlai reih gyae cungj deng vut fwz, go’em gohaz maj rim ndawreih, baenz benq baenz benq mwncumcum、ndaetfwdfwd, mbangj maj ndaej beij aen ndang vunz lij sang.（1）