62. Yawj iq lumj duzmaet,

Saet geij bo geij baq.

(Habfeiz)

63. Go faex sohsoh mbouj ndaej ing,

Gaiq rin bingzbingz dai ndit ndat.

(Vax)

64. Gyoengq duzlingz hwnj ndoi,

Duz coi duz ok nyouh.

(Loek raemx)

65. Baihlaeng maq gaiq buengz,

Seiq guengq vuenz byaij loh,

Danghnaeuz deng vunz roq,

Din gyaeuj ndoj haeuj ndang.

(Duzgvi)

66. Aen mbonq luenz lumj mbaet,

Song daeg nuengx ndaw ninz,

Youq mbwn laep gyanghwnz,

De bang vunz rongh loh.

(Dendoengz)

67. Cam:

Vunz ndaw gokswgswg,

Aeu lwgmbwk dang vuengz,

Goeng nungz bing caez cienz,

Sanj dangz ndi ndaem oij.

Hoiz:

Rwi ndaw rongz swgswg,

Aeu lwgmbwk dang vuengz,

Ra va ma caux dangz,

Cienzbouh ndi ndaem oij.

68. Cam:

Duz lawz sim nyaenx ndei,

Diemj feiz rongh daihloh?

Duz lawz nyaenx roxsoq,

Ojoj heuh vunz ndiu?

Hoiz:

Ronghrib sim saed ndei,

Diemj feiz rongh daihloh.

Gaeqseng saed roxsoq,

Ojoj heuh vunz ndiu.

69. Cam:

Duz lawz dungx haumbob,

Hemqngobngob ndawnaz?

Duz lawz mbouj miz ga,

Cienz ra vunz gwn lwed?

Hoiz:

Duzgoep dungx haumbob,

Hemqngobngob ndawnaz.

Duzbing mbouj miz ga,

Cienz ra vunz gwn lwed.

（9）