Mbwk:

Nyienh guhhong sinhoj,

Mbouj guhdoj lumj vunz,

Guhhong miz haeux gwn,

Guhdoj vunz naengh lauz.

Sai:

Guhhong caemh sinhoj,

Guhdoj dauqfanj ngaih,

Doj caiq mbouj ndaej lai,

Wnggai gaeuq byaek caeuz.

Mbwk:

Guhdoj dwg miz haih,

Boux mbouj rox laih ndei,

Haujlai vunz ngaiz deiz(gaemh),

Cungj dwg veih(vih) doj ngaenz.

Sai:

Dingq haujlai vunz gyoj(gangj),

Guhdoj dwg ndei lai,

Rox doj couh fatcaiz,

Mbouj rox baih gyaranz.

Mbwk:

Geijlai daih roengzdaeuj,

Haeuj congz doj mbouj ndei,

Haujlai vunz baenzmeiz(miz),

Doj sei(saw) daengz dai vunz.

Sai:

Guhhong dai sinhoj,

Guhdoj cingq raen yaenx(yinx),

Doj deng couh ndaej ngaenz,

Gwn daenj sai mbouj liux.

Mbwk:

Laeg ngah bae guhdoj,

Yah rox liux dai ndaenq,

Lwg doegsaw fouz ngaenz,

Bohmeh ndaenq fatbag.

Sai:

Caemh mbouj naemj doj ngaenz,

Gag yaenx(yinx) caiq gag bae,

Doj saek baez caemh ndaej,

Mbouj dwg baezbaez saw.

Mbwk:

Gaejlaeg bae doj ngaenz,

Cib doj raen gouj dai,

Mbat nduj ndaej dahraix,

Mbat laeng baih gvaq fanh.

Sai:

Beixnuengx caemh coj naeuz,

Mbouj dwg raeuz mbouj dingq,

Hoeng saek baez doj hingz,

Dingq gvaq liux couh lumz.

Mbwk:

Naeuz mwngz beix coenz ndei,

Laeg ngeix guhdoj nauq,

Bouxlawz naeuz mbouj lau,

Naenghlauz haengjdingh ngaiz.

Sai:

Guh vunz mbouj baenz vunz,

Youq lajmbwn uengjfeiq,

Ciuh vunz gou ciuh neix,

Uengjfeiq lo nuengx hoix.

Mbwk:

Miz ngaenz mbouj guhdoj,

Mwngz cingq rox baenz ndei,

Aeu bae guh seng’eiq,

Ngoenzndei youq caj mwngz.

Sai:

Guh vunz mbouj baenz vunz,

Youq lajmbwn doeknaiq,

Seiz gou lix dangq dai,

Doeknaiq mbouj naihhoz.

Mbwk:

Miz ngaenz mbouj guhdoj,

Cingq rox naeuz baenz vunz,

Gauq doegrengz ra gwn,

Cingq baenz vunz lumj doih.

Sai:

Guh vunz mbouj baenz vunz,

Youq lajmbwn yienjsiq(goetcienh),

Ciuh vunz gou ciuh nix(neix),

Lix caemh mbouj miz yungh.

Mbwk:

Mwngz rox ndaem rox ndai,

Wnggai caemh mbouj hoj,

Mwngz mbouj bae guhdoj,

Ndij mwngz goq gyaranz.

Sai:

Guh vunz mbouj baenz vunz,

Git roen gwnz roen laj,

Git vunz vaij bae naz,

Git lwgda daengx vunz.

Mbwk:

Mwngz mbouj bae guhdoj,

Caeuq mwngz goq baenzgya,

Guh hongreih hongnaz,

Bae guh yah hawj mwngz.

Sai:

Ciuq nuengx dwg yiengh naeuz,

Raeuz mbouj ngah guhdoj,

Raeuz doxndiep doxgoq,

Caiq hoj sim doeng yungz.

Mbwk:

Beix gaij mbouj guhdoj,

Bouxboux doq raen ndei,

Raeuz gaij guh seng’eiq,

Hwnjheiq cauh gyaranz.

（2 sat）