Seiz：Ciuhneix

Dieg：Dalungz Yangh yanghcangj bangunghsiz

Vunz：Ginhyi，mbwk，40 bi，Dalungz Yangh yanghcangj（lajneix heuhguh Ginh）

Canjhing，sai，50 bi，mbanj Sanglungz duicangj（lajneix heuhguh Canj）

Cienzlu，sai，35 bi，boux lauxbanj haifat nungzyez gihdi （lajneix heuhguh Cienz）

（ciep geiz gonq）

Ginh：Miz dauhleix. Hoeng gou rox, gizhaenx miz haujlai dieg mbouj dwg boux miz mbaw cingq yungh, miz mbangj ok rog guh hong le, gij dieg lij vut fwz ce’ndwi lo.

Cienz：Deng! Gou hix caz lo, caen miz cungj cingzgvang neix.（Ngauzngauz gyaeuj） Neix caen dwg langhfeiq! Dwg famhcoih! Nungzminz baenzlawz vut fwz ce’ndwi ne？Canj duicangj，gou aeu benq dieg neix! Mwngz doengzeiq ba，hawj gou bau benq dieg neix, gou aeu hawj benq dieg ndaej yungh dijcienz bae.

Ginh：Deng ha, Canj duicangj，aeu lailai hawj benq dieg ndaej yungh dijcienz bae.

Cienz：Canj duicangj，gou bau benq dieg neix, ciuq cienzco ceiq lai bae hawj ginzcung，lij miz, nungzyez cunghab haifat, daengx mbanj ginzcung cungj ndaej daeuj gihdi gou guh hong, miz song faenh souhaeuj ha, ndaej youq bak dou ranz swhgeij dajgoeng.

Ginh：Deng ha, Canj duicangj，mwngz daeuj yawjyawj, （Vix mbaw doz “suenqveh hwnqguh hwngfat lajmbanj moq sevei cujyi Dalungz Yangh”nem gwnz ciengz）neix dwg mbaw doz suenqveh hwnqguh hwngfat lajmbanj moq sevei cujyi yangh raeuz. Mwngz naeuz mbaw doz suenqveh neix ndei mbouj ndei？

Canj：（Byaij haeuj gyawj mbaw doz suenq- veh, ngaekngaek gyaeuj）Ndei ha, danghnaeuz ciuq mbaw doz suenqveh neix bae hwnqguh lajmbanj moq, yienghneix raeuz couh ndaej gvaq gij swnghhoz ndaw singz lo.

Cienz：Dang’yienz dwg la, mbouj ne, yangh cwngfuj veh mbaw doz suenqveh neix cuengq youq gizneix dangguh dozveh gvaqcieng ha？

Ginh：Canj duicangj，yaek hwnqguh lajmbanj moq, ginzcung ndaw fwngz mbouj miz cienz hix hwnqguh ndaej baenz lajmbanj moq ma？

Canj：Dang’yienz mbouj ndaej!

Cienz：Dwg mbouj ndaej!

Ginh：Baenzde Cienz lauxbanj daeuj bang- coh raeuz hwnqguh lajmbanj moq sevei cujyi, mwngz vih gijmaz mbouj haeujcoengh ne？Dalungz Yangh raeuz hwnqguh lajmbanj moq, aeu haujlai lauxbanj lumj Cienz lauxbanj nei，daeuj bangcoh ginzcung baenzfouq ha.

Canj：（Vix coh Cienz laux- banj）De？Cienz laux- banj daeuj bang raeuz hwnqguh lajmbanj moq？

Ginh：Dwg ha! Mwngz yawj，Cienz lauxbanj daeuj bau benq dieg neix, daeuj yungh gij dieg fwz haenx, haifat nungzyez, ndaem maenzfaex，bouxcawj youh ndaej cienzco, youh ndaej bae nungzyez gihdi guh hong, ndaej song faenh cienz, neix mbouj dwg demgya ginzcung souhaeuj ma？

Cienz：Deng! Miz sam faenh souhaeuj. Ginzcung lij ndaej ok gujfaenh haeuj guj. Gou dajsuenq saedhengz sam cungj fuengsik haeuj guj：It dwg aeu dieg haeuj guj. Ngeih dwg aeu cienz haeuj guj. Sam dwg aeu goengrengz haeuj guj. Cij dwg gujfaenh ciuq daengjgaep daeuj faen cienz.

Ginh：Canj duicangj，mwngz rox lwi？Baengh fuengsik haeuj guj haifat nungzyez gihdi, saedhengz gij gujfaenh hingzsik“gunghswh gya gihdi gya nungzhu” haenx.

Canj：（Geq lwgfwngz）Aeu dieg haeuj guj、aeu cienz haeuj guj、aeu goengrengz haeuj guj，o，miz dauhleix. （Sawqmwh）Mbouj deng! Ndaem maenzfaex，mboujdan mwngz Cienz lauxbanj rox ndaem, dou hix rox ndaem ha, dieg raeuz vih gijmaz aeu nyiengh hawj mwngz？Couh mwngz rox lau cienz？

Cienz：Aenvih gou rox ndaem cungj maenzfaex lawz cix baenz lai, gou lij rox gai okbae ndaej gyaqcienz sang.

Ginh：Deng! Cienz lauxbanj yinxhaeuj cungj maenzfaex gohgi hamzliengh lai haenx daeuj ndaem, linghvaih caeuq gunghcangj ciem gaicawx habdoengz, bauj gai ndaej bae ha.

Canj：（Naemj yaep he）Cienz lauxbanj，gij vah mwngz dangcaen？

Cienz：Dang’yienz dwg caen, gou baujcingq!

Canj：（Byaij daengz baihnaj mbaw doz suenqveh）Ginh yanghcangj，hwnqguh lajmbanj moq, cawzliux hwnqguh aenmbanj le, lij aeu guh loh ba？

Ginh：（Caeuq Cienz lauxbanj doxyawj baez ndeu, ngaekngaek gyaeuj）Deng ha, lij aeu hwnqguh caujgiciz、gaij ranzdajcawj gaij cwzsoj、guh luzva daengjdaengj.

Cienz：Gij hongsaeh daeuz lij aeu guh loh ndaw mbanj. Ginh yanghcangj，Canj duicangj，gou youq gizneix baujcingq gonq, danghnaeuz gou ndaej bau benq dieg haenx, gou cingznyienh ok cienz daeuj guh loh haeuj ndaw mbanj!

Canj：（Mbouj siengsaenq dwk cimyawj Cienz lauxbanj）Mwngz？Cingznyienh ok cienz daeuj guh loh haeuj ndaw mbanj？

Cienz：Deng! Gou fucwz guh loh haeuj ndaw mbanj！

Canj：Ginh yanghcangj，Cienz lauxbanj dwg gangj vahriu laux ba？

Ginh：Mbouj dwg gangj vahriu laux. Neix dwg caen dahraix. Danghnaeuz mwngz Canj duicangj doengzeiq bau hawj gou, raeuz couh ciem habdoengz. Cienz lauxbanj，mwngz gangj ne？

Cienz：Ndei ha! Gou cingznyienh ciem faenh habdoengz neix!

Ginh：Canj duicangj，mwngz gangj ne？

Canj：Ginh yanghcangj、Cienz lauxbanj，neix dwg caen lwi？Cienz lauxbanj，mwngz baenzneix guh mbouj gwnvi ha？

Cienz：Mbouj gwnvi! Gou cingj conhgyah suenq gvaq lo, geizsaed, gou hwnqguh nungzyez gihdi hix aeu loh bingz ha, gou dwg naemj daengz coglaeng nanznaih. Hawj gou bau bi ndeu, gij cienz loh ndaw mbanj couh ndaej canh ndaej dauq lo.

Canj：（Baengq song da）Neix dwg caen？

Cienz：Neix dwg caen，raeuz song baih cungj hingz，song baih cungj hingz, rox lwi？

Ginh：Mbouj! Sam baih cungj hingz，gyahwnj caizcwng souhaeuj, ndaej sam baih cungj hingz ha!

Cienz：Deng! Sam baih cungj ndaej hingz!

Canj：Ginh yanghcangj，neix dwg caen？

Ginh：Dang’yienz dwg caen!

Canj：Ndei! Gou doengzeiq ciem faenh habdoengz neix!

Cienz：Canj duicangj，mwngz baezneix mbouj dwg youh daibyauj swhgeij ba？

Canj：Mbouj dwg! Baezneix dwg daibyauj ginzcung!

Ginh：Canj duicangj，mwngz baenzlawz youh gaijbienq la？

Canj：Gou mbouj gaijbienq ha!

Cienz：Mwngz doengzeiq bau benq dieg haenx, neix mboujdwg youh gaijbienq ma？

Canj：Deng！Youh gaijbienq lo!

Cienz：（Daj ndaw daehnaeng mbon ok geij faenh habdoengz, saeujsaeuj）Canj duicangj，mwngz doengzeiq ciem habdoengz la! Mwngz yawj, gou daiq hab- doengz daeuj gvaq lo.

Canj：Doengzeiq! Hahaha!

（sat）