Simjseiq dwg vunz Mbanjsingqlij, cib bi gaxgonq de gaenq daeuj ndawsingz youq.

Bihaenx ngoenzhaenx, goenggvan youq yiuzcien guhhong, deng gij cien lak daemh ga raek, song ga gyaeujhoq dauqlaj cungj ngaiz gawq bae lo, cap ga gyaj cengqgengz byaij ndaej roen. Seizhaenx song boux lwg lij oiq, goenggvan dwg “saeudingjranz” ndaw ranz, “saeudingjranz” raek le ranz couh yaek doemq lo. Hong reihnaz baengh Simjseiq boux ndeu guh, haengjdingh ganq mbouj gvaqdaeuj.

Simjseiq vih ra ngaenz gvaq ndwenngoenz, de mbouj ndaej mbouj bae ndawsingz ra hong guh. Hoeng, nienzgeij haemq laux le, nanz ra ndaej hong guh. Doeklaeng de cij ndaej guh di gaicawx iq, seizhah gai liengzcaz, seizdoeng gai sawz saz. Gij doxgaiq gwn neix cungj dwg vunzmbanj gag ndaem.

Seizneix dwg seizhah, Simjseiq ngoenznaengz hai aen cisamloek de okdou, gwnz ci cawz le miz sam doengj liengzcaz, lij miz goenggvan dem. Goenggvan yienznaeuz byaij roen mbouj fuengbienh, hoeng, fwngz de riengjret, ndaej bang Simjseiq ciu hek、sou ngaenz、daek liengzcaz doenghgij hong mbaeu neix. Caiqnaeuz, bak de gvai, hemq gij vunz baedauq caeuq de cawx liengzcaz, hemq ndaej raeuzri raeuzrad——“Lwgnyez gwn liengzcaz, coengmingz youh lingzleih; mbauq sau gwn liengzcaz, mbouj hwnj lwgcaeuz naj haumaeq; bouxlaux gwn liengzcaz, bauj mwngz mbouj miz ‘sanh gauh’.” De gangj vah hawj vunz riu hawj vunz maez, ndigah seng’eiq haemq ndei.

Hoeng, ngoenzneix, seng’eiq mbouj daiq ndei, souhaeuj ngoenzneix ngamq ndaej samcib maenz.

Vaiqhaemh, songde sou dan yaek maranz seiz, boux vunzcaemhmbanj ndeu raen le dongx songde naeuz:“Seng’eiq ndei lwi?”

“Mbouj ndei!” Simjseiq naeuz.

“Seizneix ndawmbanj ranzranz hwng guh laeuz gya caengz, sou hix dauqbae gya caengz ba, mboujnex sieddaej nw.” Vunzmbanj naeuz.

“O, ngoenz lawz gou bae dauqbae ranzcoj yawjyawj gonq.” Simjseiq naeuz.

Sou dan le, Simjseiq laemzseiz gietdingh dauq ranzcoj yawjyawj, goenggvan hix caemh bae. Gizsaed, gaenq miz lai boux vunzcaemhmbanj caeuq Simjseiq naeuz gvaq gienh saeh neix. Naeuz Mbanjsingqlij yaek beuj lo, vunzmbanj vihliux ndaej lai di ngaenzboiz, couh ranzranz hwng guh laeuz gya caengz. Seizneix ranzlaeuz ndawmbanj, mizmbangj song caengz, mizmbangj sam caengz, baez gya, couh ranzranz bienqbaenz haj caengz laeuz lo. Yienghneix couh lai ndaej di ngaenzboiz. Neix dwg saehndei, Simj- seiq haengjdingh mbouj gvaqdangq.

Dauq daengz ranzcoj, caen dahraix, daengx mbanj ranzranz cingq nyaengqfoedfoed guh laeuz gya caengz. Vunzmbanj raen songde couh cam:“Sou caengz haihong ha? Gvaq- dangq le sou ienqhoij mbouj gip nw!”

“Mbanj raeuz dauqdaej beuj mbouj beuj?” Simjseiq cam.

“Haengjdingh beuj, Mbanjsingq- vangz mbanjnden raeuz gaenq cek lo.” Vunzmbanj neix naeuz.

Simjseiq youh cam:“Gij laeuz gya caengz caen ndaej ngaenzboiz?”

“Miz mbangj mbanj gaenq ndaej ngaenz daengz fwngz.” Vunzmbanj neix naeuz.

Simjseiq “o” sing ndeu. De itloh haeuj mbanj itloh cam vunzmbanj song aen vwndiz neix. Dingzlai vunzmbanj cungj naeuz doxlumj——“Beuj! Ndaej ngaenzboiz.” Simjseiq sim’angq raixcaix.

Ma daengz ranz swhgeij lo.

Ranzlaeuz Simjseiq dwg song caengz. Ndwn youq dangqnaj ranz swhgeij, goenggvan naeuz:“Gya sam caengz aeu haujlai ngaenz bw!”

Simjseiq naeuz:“Noix mbouj gvaq cib fanh!”

Goenggvan naeuz:“Fanh ndeu cungj dawz mbouj okdaeuj bw!”

Simjseiq dang’yienz rox ndaw- ranz gungzhoj. Goenggvan ga raek le, yiuzcien boiz hawj ngeihcib fanh. Gyoengde miz song boux lwgsai, Simjseiq dawz gij cienz neix youq ndawsingz cawx song dauq ranz hawj lwg, di cienz neix cij gaeuq soujfu ndwi. Seizneix song daeglwg gaenq baenzranz lo, yienznaeuz dajhong ndaej di cienz, hoeng, dingzlai dawz bae boiz gij cienz vih cawx ranz ciq ngaenzhangz lo. Songde hix mbouj miz cienz daeuj guh laeuz gya caengz.

Yienznaeuz mbouj miz cienz, hoeng, Simjseiq naeuz:“Mbouj miz cienz hix aeu gya, vunzlai ranzranz gya, raeuz mbouj gya, cog lawz raeuz sied lai bw.”

“Bae gyawz aeu cienz ha?” Goenggvan cam.

Simjseiq naeuz:“Ciq!”

Simjseiq buet gwnz buet laj cam caencik baengzyoux ciq cienz.

Cib lai ngoenz gvaqbae, ranz Simjseiq hix ndaej haihong guh laeuz gya caengz lo. Song daeglwg caeuq lwgbawx hix maranz bangfwngz. Gyoengqde mbouj miz cienz, hoeng, ndaej bang rengz. Daengx ranz vunz caeuq roek boux canghguhranz, caemh nyaengqfoedfoed guh, miz gangj miz riu.

Ngoenz ndeu, boux vunzbaedauq ndeu byaij gvaqdaeuj naeuz:“Simjseiq, mwngz rox mbouj rox nw? Gij laeuz gya caengz Mbanjsingqvangz gaenq ngaiz ngaeuhgih gaex bae lo.”

Daihgya doeksaet yat, caemh dingz gij hong gyangfwngz.

Simjseiq cam:“Vihmaz gaex bae ni?”

Bouxhaenx naeuz:“Baihgwnz mbouj hawj gya caengz, naeuz luenh gya caengz dwg famhfap, couhcinj beuj mbanj, gij laeuz gya caengz hix mbouj ndaej ngaenzboiz.”

Daihgya dingq le uk in lo, dauqdaej dwg dingz hong roxnaeuz laebdaeb guh, dawz mbouj dingh cawjeiq.

Simjseiq naeuz:“Lauheiq ngamq guh baenz couh deng gaex bae nw!”

Goenggvan dingq le hix lawq lo, yaep yiet couh naeuz:“Mbouj guh lo, lij guh maz dem, sai ngaenz!”

Boux ranznden ndeu gvaqdaeuj nai naeuz:“Mbouj lau ndwi, ndaw- mbanj ranzranz guh, youh mbouj dwg ranz dog song ranz guh, vunzlai famhfap mbouj caz cwzyin caez.”

Simjseiq ngeixngeix le naeuz:“Hix deng, vunzlai famhfap mbouj caz cwzyin caez.”

“Hoeng, faplwd hix mbouj yungz cingz, mbouj guh, mbouj guh, sai ngaenz!” Goenggvan naeuz.

Song daeglwg hix naeuz fung- yiemj hung lai, mbouj guh lo.

Simjseiq naeuz:“Mbouj guh, ngoenzlaeng ngonz vunz geq ngaenz roengz daeh nw.”

“Ngonz couh ngonz ba, gaej haenh gij ngaenz de.” Goenggvan naeuz.

Simjseiq naeuz:“Mboujnex raeuz gya caengz ndeu ba? Caengz neix gaenq guh daengz byongh lo.”

Daengx ranz vunz mwngz yawj gou, gou yawj mwngz, cungj mbouj guhsing.

“Gya caengz ndeu!” Smjseiq bek ga naeuz.

Daihgya youh nyaenqfoedfoed guhhong lo.

Ndwen ndeu gvaqbae, ranzlaeuz Simjseiq daj song caengz bienqbaenz sam caengz lo.

Hoeng, mbouj geij nanz, gij saeh hawj gyoengqde yousim haenx hix gaenriengz daeuj daengz lo.

Ngoenzhaenx, cwngfuj dawz mbaw bugau daeuj mbanj nem, gwnz de raiz naeuz——“Mbanjsingqlij aeu beuj, beuj bae gizdieg cwngfuj anceiq. Ngaenzboiz ciuq mwhgonq ranzgaeuq miz geijlai caengz boiz geijlai caengz, gij laeuz gya caengz ngamq guh haenx, mbouj ndaej ngaenzboiz.”

Vunzmbanj yawj le, bouxboux dadaengx liux. Seizde daengx mbanj lumj rek oemjgoenj nei, cauzhuhu hwnjdaeuj. Miz vunz bongx gabi hemq “cangqdangq”, miz vunz ndaq mbwn hut deih, miz vunz ndaq cwngfuj……

“Gij laeuz gya caengz mbouj hawj ngaenzboiz, raeuz couh mbouj beuj, yawj cwngfuj dawz raeuz guhmaz banh!”

‘Hw hw, gadawh gveux ndaej gvaq saeu ranz?”

Vunzmbanj lwnhyaengyaeng.

Hwnzde, Simjseiq fonj bae fonj dauq ninz mbouj ndaek, daengx hwnz haeujaw:“Seiq fanh maenz ha! Baez yaep da couh mbouj raen lo…… Gou yaek rom daengz mwhlawz cij ndaej seiq fanh ha……”

Goenggvan nai naeuz:“Gaej haeujaw lai lo, ngaenz rox bae rox dauq. Baezlaeng aeu roxhit, maz saeh dan dingq vunz gangj cungj mbouj baenz, aeu caenndang bae liujgaij cijbaenz.”

Mbwn caengz ronghcingh, Simj- seiq naeuz:“Baeuq, raeuz bae ndaw- singz.”

Seizhaenx daengngoenz ngamq- ngamq yaek hwnj, dawz bienmbwn baihdoeng ingj ndaej hausag, aen daengngoenz haubeg lumj lajdungx duzgya nei.

“Du du du” Simjseiq hai aen cisamloek, goenggvan naengh gwnz de, gij mokrongh buenx songde mbin coh baihdoeng ronghsag baenaj……