Sai:

Guh vunz mbouj baenz vunz,

Daengx hwnz ninz cix loq,

Bae caeuq vunz guhdoj,

Goj ndaej haujlai ngaenz.

Mbwk:

Naeuz soh mwngz geij geiq(gawq).

Mbouj meiz(miz) mwngz mbouj rox,

Naemj naeuz bae guhdoj,

Aiq couh bienq baenzmiz?

Sai:

Doj ndaej maenz dingj maenz,

Caemh raen ndaej haujlai,

Danghnaeuz hingz dahraix,

Fatcaiz lo youxnoix.

Mbwk:

Miz ngaenz bae guhdoj,

Roh le couh mbouj meiz(miz),

Aeu bae guh seng’eiq,

Leix(Lij) ndaej ciengx lwg yah.

Sai:

Guhdoj mbouj ok hanh,

Nanz mbouj nanz caemh ndaej,

Danghnaeuz hingz saek baez,

Caemh ndaej haujlai ngaenz.

Mbwk:

Doj ngoenzlaep ngoenzhaemh,

Naemj naeuz ndaej mbat haenq,

Ngoenzneix hingz geij maenz,

Ngoenzlaeng saw geij fanh.

Sai:

Baez naengh haeuj congz doj,

Mbouj rox geiq baenzlai,

Hingz couh angq yaek dai,

Saw couh saiq ngaenz cienz.

Mbwk:

Baez naengh haeuj congz doj,

Mbouj rox geiq lwg yah,

Ngaenz cienz bae daengzya(begsai),

Gyaranz baenzneix baih.

Sai:

Doj cungj miz baez hingz,

Mbouj itdingh dwg saw,

Danghnaeuz gaiqmingh dawz,

Ngaenz ndaw daeh rimrad.

Mbwk:

Cib doj gouj boux saw,

Ngamq yawj boux he hingz,

Ngaenz dawz bae doj cingh,

Yah cing lwg bae haq.

Sai:

Miz baez saw baez hingz,

Mbouj itdingh naeuz saw,

Danghnaeuz bungz mingh dawz,

Ngaenz ndaw daeh rimrad.

Mbwk:

Cib doj gouj boux saw,

Ranzcang dawz ngaenz caez,

Gienq beix gaej caiq bae,

Doj saw baez dem baez.

Sai:

Doj mizseiz mbouj ndei,

Sei(Saw) le ngaenz couh bae,

Doj mizseiz caemh ndaej,

Ngaenz bae ma dauq boiz.

Mbwk:

Congz doj lumj dou fangz,

Dangh deng roemx haeuj ndaw,

Ndaej hingz youh baenzlawz,

Roen ok yawj mbouj raen.

Sai:

Doj saw ngaenz caemh bae,

Doj hingz ndaej dauq boiz,

Guhdoj lumj gwn oij,

Nuengx lij oiq mbouj rox.

Mbwk:

Doj bae lumj raemxrongz,

Laeuh roengz congh bae doh,

Bohmeh bae guhdoj,

Lwg caemh rox bae guh.

Sai:

Bouxboux naemj doj hingz,

Yiuq mingh ndei mbouj ndei,

Mingh yoq couh ngaiz sei(saw),

Mingh ndei couh ndaej hingz.

Mbwk:

Bouxboux naemj doj hingz,

Doj daengz mingh mbouj aeu,

Haetromh doj daengz caeuz,

Saenzraeuraeu yaek dai.

Sai:

Danghnaeuz doj hingz ndaej,

Mbouj bae maz sinhoj,

Guhhong gou mbouj rox,

Mbouj guhdoj guh maz?

（1）