Bineix ndwencieng, gih raeuz gak dieg guh haujlai vwnzva lijyouz hanghmoeg hawj vunzlai baez youz guhcaemz, gak hanghmoeg gag miz daegsaek, lij okdaiz baenz buek cwngcwz ndei hawj vunzlai ndaej fukleih, gikfat vunzlai sawj ngaenz, daengx gih vwnzva lijyouz hawciengz ndaej hwngfwd dauqmoq.

Gij vwnzva hozdung hawj vunzlai camgya haenx gig ndaej vunzlai gyaez. Daengx gih gungh cujciz guh vwnzva hozdung 2439 ciengzbaez, camgya vunzsoq dabdaengz 220 lai fanh vunzbaez. Ndawde “lajmbanj ndwencieng vanjvei” hozdung 462 ciengzbaez, ndwencieng dozveh canj- lanj hozdung 84 ciengzbaez, daengz lajmbanj ciengqheiq 279 ciengzbaez, duzsuhgvanj gawjbanh gak cungj hozdung 647 ciengzbaez. Gak cungj hozdung cungj miz gij feihdauh angq gvaq cieng, yinx ndaej gyoengqvunz daeuj camgya lailai.

“Youz bonjdieg”“youz lajmbanj”ceiq nauhyied. Cuengqgyaj 7 ngoenz, gak dieg gij gingjgih hailangh haenx vunz daeuj foedfoed, youq Gveilinz Yangzsoz Sihgaih、Lizgyangh、Yilungzhoz, Nanzningz Cinghsiusanh, Bwzhaij Yinzdanh、Veizcouhdauj, Cungzcoj Raemxdiuqdat Hamjguek Dwzdenh, Hocouh Vangzyauz Gujcin daengj gingjgih, gij hekyouz vunzsoq dwg gaenh 3 bi daeuj ceiq lai. Gak dieg lajmbanj giz hawj vunz guhcaemz yietbaeg hix dwg vunz lai vunz daih, haujlai vunz daengz lajmbanj mbaet mak mbaet byaek、epbya、bingjgangq、gwn ngaiz.

“Ginghci gyanghaemh”hoengh- fwdfwd. Nanzningz、Bwzhaij、Cungz- coj、Fangzcwngzgangj、Hocouh daengj dieg doiok baenz buek “gyanghaemh yienjok”“gyanghaemh youz”“haw gyanghaemh”hozdung, ndaej baenz aen hawciengz gaicawx hoengh moq ndei. “Gyanghaemh Nanzningz” daj 1 nyied 14 hauh hai gai le, vunz bae vunz dauq, nauhyied dangqmaz, daengz ngoenz ndwencieng cuengq- gyaj sat de, bouxhek daeuj youz dabdaengz 100 lai fanh vunzbaez. Hocouh Vangzyauz Gujcin gawjbanh cietbyalungz, yinx ndaej gig lai hekyouz daeuj camgya.

“Doeng youz Gvangjsih” hozdung bangcoengh hawciengz caiq hoengh dauq. Daengx gih gak dieg cungj guh “doeng youz Gvangjsih”“vunz Gvangjsih youz Gvangjsih” hozdung, okdaiz youhvei cwngcwz、gawjbanh hawj ginzcung ndaej fukleih vwnzva hozdung、fatbouh diuz sienqloh ndei youz daengj banhfap, bangcoengh daengx gih vwnzva lijyouz hawciengz hoengh dauq. Bwzhaij doiok “seiz- doeng youz gwnz haij swhcouz sok laux cawjdaez” daengj 3 diuz lijyouz sienqloh cingbinj caeuq 10 lai hangh gingjgih biuqhaeujdou gyaq cienh cwngcwz, hawj vunzlai youq ngoenz- gyaj ndwenciengz youz ndaej ndei youz ndaej angq. Cungzcoj guh “haeuj cieng youz Cungzcoj” hoz- dung, cujciz baenz bak gyaq ci gag hai gag youz Cungzcoj、aen donz daeuz Yez Gvei bau lezceh byaij haeuj Cungzcoj daengj hozdung, ndaejdaengz gyoengqvunz gih raeuz caeuq Yez Gangj Au Davanhgih yawjnaek haeujsim.

(ciuq Gvangjsih Yizbau)