Yaek daengz cieng lo.

Haetromh, gou riuj mbiengj nohma ndeu、geij gaen byaseng bae ranz Auloeg Mbanjndoiceh. Hong cungjsuenq ndaej guh sat gvaq cieng lo, dou bae laeng Auloeg doxcaeuq gwn donq ndeu. Baihneix doxcaeuq gwn ngaiz haengj gwn nohma caeuq byaseng.

“Dajndaem dwgrengz lai, boux- gvai ce naz hoengq, bae rog gai rengz hoengh, vit baenz doengh nazfwz.” Yienznaeuz geij boux dou geq di bae rog haeuj cangj vunz mbouj aeu, hoeng cix mbouj ciqcingz dajndaem, haengj couh gyawj ra hong guh. Bineix cincwngfuj laebhangh dajcauh dieg- gyaeu guhcaemz Ndoiceh, dou caijsoq doek deng “benghhaeuxmuiz” bae, ndaej guh geij ndwen hong, ndaej miz ngaenz cawx bit gaeq cawx noh gvaq cieng lo. Geij bi neix dou lengq gvaq lengq bae guhhong, dauqcawq reihnaz cungj dwg fwz lai ndaem noix, dan gag doengh naz laj Ndoiceh ndaem ndaej caezcup, mbouj fwz saek mbaek. Doeklaeng ndaej rox daengx doengh cungj dwg Auloeg boux ndeu gag guh.

Ndaw hongh Auloeg seiq haj duzhanq hung sikhaek heuh “Gangj- gad gangjgad” laeglaeg laehlaeh, iet hoz yaek dot vunz. Hwk ndaej gou mbouj gamj yamq haeujbae saek yamq, gwnz laeuz ranznden miz vunz iet gyaeuj ok conghcueng daeuj yawj laihnaeuz byawz dauqma gwn haeux gvaq bi.

Gok daizhongh aen giengz daengj rek ndeu dwk fwnz feiz dawzhuhu, raemx goenjhumhum, song duz bit bilwd dumq ndawrek, heiqhom gyuemluemz daengx hongh.

“O, guhlawz gag mwngz daeuj, geij boux haenx ne?” Auloeg daj ndawranz okdaeuj, doq yaengx fwngz bang gou boenq duzhanq doq cam naeuz.

Gou riengzlaeng Auloeg haeuj- bae, “Geij boux haenx hwnj Ndoiceh bae nem goengdaeuz niemhsou lo, laeng di cij daeuj.”

Auloeg dauq cienq haeuj ndaw faengqfeiz bae, baihndaw sing cax byaek saemzdaekdaek deihremrem, raq heiq makcengz cangz ndeu okdaeuj soemjsingj, lox ndaej gou gag ndwnj myaiz ndawhoz.

Gou haeuj faengqfeiz bae bang swiq byaek.

“Ngoenzneix guh nohbit mak- cengz.” Auloeg doq loengh ciengq- makcengz doq naeuzbyoegbyoeg, “song duz bitdoj neix, gou daeg- daengq mbouj yungh heiqmeiz cawj, coemh fwnz faexbek dumq, hawj de lai hom, aeu makcengz、yiemzsih、sijsu、gyaeujsuenq、youzlwgdeih doengh gijneix guh boiqliuh, bau sou gwn le donq daihngeih lij ngeix.”

Yawj ndaej ok, Auloeg neix mboujdanh lanh guh hongnaz, lij ak dajcawj dem. Gou youq henz cim da mbouj yaep, yaek gip aeu dauq goengfou loengh nohbit makcengz neix, gvaq geij ngoenz daengz cieng caemh loengh hawj lwg yah caez gwn.

Dou geij boux ngoenzngoenz daj ranz bae Ndoiceh caep rin、bu roen, Auloeg cix youq lajdoengh ganq naz、gueng bit, geij ndwen daeuj cungj suggvenq lo. Aenvih roen gyae, dou youq dieghong cawj ringz gwn, seiz mbouj seiz lumz daiq feiz lumz daiq gyuyouz cungj dwg bae ciq Auloeg aeu, saekseiz lienz hongdawz lij ciq de aeu. Dou senq dingh ndei, naeuz guhhong sat bae laeng de doxcaeuq gwn donq ndeu. De hix angq naeuz daengzseiz yaek caenfwngz loengh nohbit makcengz yiengh byaek daegsaek Mbanjndoiceh neix hawj dou cimz.

“Auloeg, sou gizneix ciengx ndaej huq lai ho, o?” Gou mbwt coenz vah ndeu.

“W, dou gvaedgveh geij mbanj neix maij ciengx bit langh roengz naz bae, dangqdangq ciengx gaeuq bakngeih ngoenz, duzduz gyaeuj heu’ngoenj. Dawz hwnj haw bae vunz ciengj cawx sagsag. Mbouj lau sou naeuz gou cej daihbauq, “Bitgyaeuj- heu” gaenq baenz aen binjbaiz ranghdieg Ndoiceh dou.” Goeng de lumj “bouxbanggangj” guh gvangj- gauq.

“Lij miz duzhanq dem bw.” Gou lumz mbouj ndaej geij duzhanq rog daizhongh haxbaenh yaek dot vunz haenx.

“Ei, geij duz haenx dwg ciengx daeuj ‘hen ranz’ hane! Dou neix gyawj ndoeng, faex ndaet rum deih, haengj miz ngwz haeuj ranz, hoeng duzngwz lau duzhanq, ndawranz miz heiqhaeu haexhanq ngwz couh mbouj daeuj gyawj. Ha, duzhanq hen ranz ak gvaq duzma bae, hen ndaej caeg, lij hen ndaej ngwz dem.”

“Gangjgad! Gangjgad……” Sawqmwh rog hongh sing hanq hemq dai hemq lix, gou caeuq Auloeg guhmuengz okbae yawj, geij duzhanq mbe fwed iet hoz baij “caenhseiq” hen dou’gvaengh, geij boux doengz- doih gou caez daeuj guhhong haenx soengz youq rog dou mbouj gamj noddoengh, gyoengqde bae niemhsou caen vaiq ho, gou ngamq daeuj caengz ndaej aen roetgaeq gyoengqde hix daengz lo.

Duzhanq caen dwg ak hen ranz! Gou cengdi haenh hemq ok sing daeuj.

Donq ringz neix, dou geij boux miz fukheiq ndaej gwn nohbit makcengz yiengh byaek mizmingz neix. Nohbit mbouj yauq hix mbouj yungz, feihdauh dogdaeg, van daiq miz di soemj, rang daiq miz di manh, ndeigwn fouzbeij, hawj vunz nip gaiq siengj gaiq. Nohma caeuq byaseng dauqfanj mbouj miz vunz ngah lo.

Miz fwen eu naeuz——“Gwn laeuj mbei cix fag, lumj vunzbag vunzngaiz, gwn laeuj uk bienq gvai, rox bak lai bak deih.” Caen dahraix, Auloeg duix laeuj ndeu roengz dungx, vah couh dangq raemx fai lak, “gangj dienfaenz deihleix, lwnh hingzsaeq gwnzbiengz, naeuz gwn van gwn diemz, couh aeu riengz dangj byaij.”

“Vunz naeuz dajndaem dajciengx dwgrengz, gou boux ndeu bi gag ndaem geijcib moux naz, ciengx geij fanh bit, cungj mbouj raen dwgrengz geijlai.” Auloeg naj ndingfwg, da laepnwnq bi gyaeuj cejbyoegbyoeg, raq heiqlaeuj ndeu okdaeuj fwfw.

“Auloeg, ngoenznaengz couh mwngz boux ndeu youq ranz? Daxsimj bae cimh lwg mwngz dawz lan?” Boux doengzdoih ndeu cam.

“Lwgsai lwgbawx lwgmbwk lwg- gwiz cungj bae Guengjdoeng dajgoeng caez lo, ce haj boux lwglan、vaihseng youq ranzmbanj doegsaw. Geij bi neix hagdangz ndawmbanj mbouj banh lo, lwgnyez doegsaw aeu bae daengz ndawhaw bae, hagdangz cunghsinhyau ndawhaw gyauyuz sezbei maenhndei, cix dwg gyae lai. Yah gou bae ndawhaw co ranz caeuq haj boux lan caez youq, haethaemh fugsaeh gyoengqde gwndaenj. Youq ndawhaw gvenq lo, seizneix cuengqgyaj geij boux lan cungj mbouj sij ndaej deuz, naeuz caj song ngoenz bohmeh gyoengqde daj Guengjdoeng dauqma gvaq cieng cij caez dauqma. Gou couh gag youq ndawmbanj ganq naz、ciengx bit. Vunzmbanj dou cungj mbouj guh naz bae baihrog laeuq cienz, gou raen naz fwz saivaih hixnaengz ndaem daengx doengh liux bae.”

“Auloeg, mwngz caemh caeuq daxsimj bae ndawhaw yiengjfuk ndaej lo, lij dwgrengz nyaenx lai guh maz?” Lingh boux doengzdoih naeuz.

“Haiya, lij miz geij gaen rengz guh ndaej couh guh lo, ngaenz mbouj lau lai, baezlit cij rox lau lai hane.” Goeng neix miz fuk mbouj rox yiengj, caetcib laeuh ndang lo lij mbouj sij yiet, yiemz ciuh de caengz ndaej guh gaeuq.

“Doenghbaez swnghcanjdui daengx doih vunz caez guh lij gongz hemq daibaeg, seizneix mwngz boux ndeu baenzlawz guh ndaej geijcib moux?” Gou gangj ok gij ngeizvaeg ndawhoz.

“Hahaha! Neix sou couh mbouj rox lo.” Gangj daengz neix Auloeg miz di ndaenggon, fwngz yaengxyagyag naeuz:“Gaxgonq vunz lai huk, mbouj rox ganq naz, cae rauq le caiq goenj gvaq gumh gvaq, sai rengz madaeg. Seizneix gou guh naz ha, mbouj yungh dajcae, langh bit saex, mbouj yungh goemz hwet ndaem, baeuh gyaj aeu, haeux henj mbouj yungh liemz gonz, cingj souhgozgih gvej, mbouj yungh rap mbouj yungh dak, daeh bae gungganhcan loengh sauj liuxsaeh. Cimhlaeng youh ciengx dangq bit ndeu, goenqhaeux maj hwnj haeuxlwg couh mbouj aeu lo, hawj bit gag seizbienh gwn, ndaej mbaet geij ndwen liuh. Bi ngamq ndaem cauh naz dog, caj daengz bi daihngeih ndwensam, doenghnaz deng bit gyaeuj ndaej boengz yungzywd youh dauq ndaej ndaem lo. Hw, byawz naeuz guh naz dwgrengz lai?”

“Va, mwngz youq ranz lij ak gvaq doengh boux bae Guengjdoeng dajgoeng haenx bae.”

“W, caen dwg boux lauxhangz ndaemnaz.”

“Yu, ak ho!”

“W, boux canghbuenq bit Namz- ningz ndeu ngoenzbonz dingh ngaenz lo, naeuz haw’ndaep gaxgonq yaek daeuj aeu gij bit gou liux bae, gou dangq neix baenz fanh duz bit, cungjsouhaeuj gangj noix hix miz haj roek cib fanh maenz ha.”

……

Gangjgoj doq dep laeuj, boux- boux mezsezsez, caezgya gangj bak- ndwet le vah caen lai.

“Doxcaeuq caez gwn ngaiz, haici lai sieddaej, bouxboux gwn laeuj feih, gou cix naeq doekndwi.” Gou haici mbouj ndaej gwn laeuj bak mbouj gvai, caemrwg youq henzrik gag ngeixloekloek:“Gaej dan yawj byaidin, yaek cim gyae cim gvangq, boux rox gaenriengz dangj, lwedhanh mbouj beg lae.”Baihgwnz gujli doengh boux okrog guhhong dauq mbanjranz cauxnieb mbouj loek bw, gij nazreih fwz raeuz gij ndoilueg raeuz cungj ok ndaej ngaenz, raeuz wnggai hag gij cingsaenz Auloeg, siengj banhfap hawj gij swhyenz mbanjranz raeuz bienq- baenz caizfouq, cauh fuk hawj vunz- biengz!”

Banhaemh, dou biek Auloeg naengh ci dauqma, Ndoiceh sangngau、doenghnaz gvangqyub cungj dingh- dingh soengq dou, gyoengq bit- gyaeujheu swenjbatbat, lumj dwg angq naeuz “bimoq fatcaiz engq lai”!