Seiz：Ciuhneix

Dieg：Dalungz Yangh yanghcangj bangunghsiz

Vunz：Ginhyi，mbwk，40 bi，Dalungz Yangh yanghcangj（lajneix heuhguh Ginh）

Canjhing，sai，50 bi，mbanj Sanglungz duicangj（lajneix heuhguh Canj）

Cienzlu，sai，35 bi，boux lauxbanj haifat nungzyez gihdi （lajneix heuhguh Cienz）

（Muq hai：Gwnz ciengz gyang daizheiq nem miz mbaw doz “suenqveh hwnqguh hwngfat lajmbanj moq sevei cujyi Dalungz Yangh”. Baihswix baij miz sahfaz、daiz caz、gyaqbauqceij，cunggyang baij miz aen daiz bangungh ndeu，gwnz daiz miz denva、vwnzgengyaz.）

(Cienz lauxbanj daenj buh sihcangh, naengh youq gwnz sahfaz sim mbouj onj saek di. Ginh yanghcangj naengh youq baihnaj daiz bangungh. Denva yiengj lo.)

Ginh：（Gipmuengz gaem denva）Mwngz ndei！Deng， gou dwg Ginhyi. Gijmaz？

Gou naeuz mwngz Canj duicangj，dwg mwngz nyauzluenh gaijbienq lij dwg ginzcung mbouj doengzeiq？Dwg ginzcung mbouj doengzeiq cuengq benq dieg haenx？Mbouj dwg gaenq gangj ndei la？Baenzlawz youh gaijbienq ne？

Cienz：（Hwnq ndang，heux bangunghsiz cienq song hop. Yiengq Ginh yanghcangj iet fwngz）Ginh yanghcangj，hawj gou riengz Canj duicangj gangj.

Ginh：（Vadfwngz mbouj ei）Canj duicangj，Cienz lauxbanj seizneix couh youq bangunghsiz caj gou daeuj yaeng ciem habdoengz swngzbau. Gijmaz？Ginzcung yaek daeuj gauq saeh？Daeuj bingzleix？

Naeuz cwngfuj seizbienh dued gij gienz- yungh diegdeih gyoengqde？Ndei， yienghneix ba，Canj duicangj，mwngz baij daibyauj daeuj，mwngz daeuj dem，daeuj bangunghsiz gou daeuj, gou caj sou.

Cienz：Ginh yanghcangj，gaenq dingq rox daxdaenh sou youq ndaw denva gangj maz lo, Ginh yanghcangj，mwngz aeu bang gou. Gou caeux couh maengx benq dieg haenx lo. Mbouj dwg gangj ngoenzneix aeu ciem habdoengz ma? Habdoengz gou cungj daiq daeuj lo. （Cienz lauxbanj daj ndaw daehnaeng mbon geij faenh habdoengz，saeuj geij baez）

Ginh：Cienz lauxbanj，mwngz gaej vueng，saehcingz cungj menhmenh ndaej gaijgez bw.

Cienz：Gou baenzlawz mbouj simgip ne？Mbouj dwg gangj ndei gvaq ma？Canj duicangj ha，Canj duicangj，Mwngz baenzlawz youh gaijbienq？Mwngz haih dai gou bae. Ginh yanghcangj，mwngz yaek gouq gou cij baenz.

Ginh：Gaej vueng, cwngfuj itdingh bang mwngz. Mwngz yawj，gou mbouj dwg heuh Canj duicangj daiq ginzcung daibyauj daeuj doxyaeng la? Cijaeu ginzcung daibyauj gvaq daeuj, gou couh miz banhfap gangj hawj gyoengqde fug bae.

Cienz：Ginh yanghcangj，gou rox mwngz miz banhfap. Hoeng, mwngz miz maz banhfap gangj hawj gyoengqde fug bae ne？

Ginh：Benq dieg haenx bau okbae, mboujdan ndaej doinyoengx Dalungz Yangh hwngfat，hix ndaej gig ndei hawj ginzcung demgya souhaeuj. Mwngz hix rox, aenvih vunzhong ok rog, benq dieg haenx miz haujlai cungj vut fwz lo, neix dwg aen vwndiz vut dieg ce’ndwi gig haenqrem ndeu. Mboujguenj baenzlawz, vut dieg ce’ndwi, neix cungj mbouj ndaej!

Cienz：（Yamq bae yamq dauq）Ginh yanghcangj，mwngz deng bang gou cij baenz. Gaiq dieg haenx dwg aen gihdi haifat nungzyez gou fangzhwnz cungj siengj aeu, Ginh yanghcangj itdingh aeu bang gou ha.

Ginh：Cienz lauxbanj，mwngz gaej vueng. （Gwnz naj sawqmwh bienq yiengh angqyangz）Cienz lauxbanj，mwngz yawj，Canj duicangj daeuj lo.

Cienz：（Daj gyae couh iet fwngz okdaeuj, riuhaha nei）Aeya，Canj duicangj，caeux couh muengh mwngz daeuj lo.（Rag fwngz Canj duicangj mbouj cuengq）

Ginh：Canj duicangj，Baenzlawz dan mwngz bouxdog？

Canj：Dwg ha，Ginh yanghcangj yiemz noix？

Cienz：（Gipmuengz gingq hawj song swnj ien）Ndei ha，Canj duicangj，cit ien.

Canj：（Vadvad fwngz）Cienz lauxbanj，gou mbouj cit ien.

Cienz：Mbouj siengj cit hix geb hwnjdaeuj ba.（Ngengh dawz song ci ien geb haeuj laeng rwz Canj duicangj bae）

Canj：（Daj laeng rwz nyaeb ien roengzdaeuj, aeu ndaeng nyouqnyouq）Ien ndei, hom dahraix.

Cienz：Dwg ien ndei. （Gvaek habfeiz）Canj duicangj，mwngz cit ien.

Canj：Ien gou cit, benq dieg haenx, Cienz lauxbanj mwngz hix gaej siengj aeu.

Ginh：Gijmaz eiqsei？Canj duicangj，gij vah mwngz gig nanz dingq.

Canj：Deng！Ginzcung doxyaeng gvaq lo, cungj naeuz mbouj co lo. Hawj gou daibyauj gyoengqde daeuj gangj hawj Ginh yanghcangj rox.

Cienz：Vihmaz ne？Raeuz mbouj dwg gaenq yaeng ndei la？Mwngz hix naeuz doengzeiq lo.

Canj：Deng, gou doengzeiq lo. Hoeng ginz- cung mbouj doengzeiq ha, caiq gangj lij caengz youq gwnz habdoengz ciem cih ma.

Cienz：（Simgip byaij bae byaij dauq）Canj duicangj， mwngz yaek gouq gou, gou gaenq caeuq gunghcangj ciem habdoengz lo, lij gyau cienzdingh lo. Ginh yanghcangj，mwngz yaek gouq gou ha.

Ginh：Cienz lauxbanj，mwngz gaej simgip.

Cienz：Gou baenzlawz mbouj gip ha, gienh saeh neix, mboujguenj dwg bouxlawz, bouxlawz cungj gip.

Ginh：（Byaij haeuj gyawj Canj duicangj sing daemq cam）Canj duicangj，mwngz lauxsaed lwnh gou, gienh saeh dingh habdoengz neix, caeux couh gangj ndei lo, baenzlawz baez yaepda couh gaijbienq ha？Mbouj dwg siengj saj gou ba？

Canj：Gou baenzlawz gamj saj mwngz ha. Caen dwg gij yigen ginzcung.

Ginh：Caen dwg gij yigen ginzcung？

Canj：（Da lawq neix lawq de）Dang’yienz dwg gij yigen ginzcung.

Cienz：Mbouj deng！Mbouj dwg gij yigen ginzcung.

Ginh：Yienghneix ginzcung daibyauj vih gijmaz mbouj daeuj, dan mwngz daeuj？

Canj：Gou bouxdog daeuj couh ndaej lo.

Cienz：Mwngz ndaej daibyauj ginzcung？

Canj：Dang’yienz.

Cienz：Mwngz baezgonq mbouj dwg naeuz doengzeiq la, baenzlawz youh gaijbienq la？

Canj：Baezgonq dwg daibyauj gou swhgeij, baezneix dwg daibyauj ginzcung. Danghnaeuz sou gangj ndaej hawj fug bae, gou couh daibyauj ginzcung caiq naeuz cawjeiq.

Ginh：Canj duicangj，gij vah neix dwg mwngz swhgeij gangj ha？

Canj：Dang’yienz dwg gou gangj.

Ginh：（Naemj yaep he）Ndei！Mwngz gangj gonq, ginzcung doiq aen vwndiz neix baenzlawz gangj？

Canj：Mbouj miz gijmaz gangjfap. Dieg dwg guekgya, hoeng ginzcung miz gienz yungh, ginzcung miz mbaw cingq yungh diegdeih, 30 bi mbouj bienq, baenzlawz yungh, ginzcung ndaej guhcawj.

（caengz sat）