Ciuq gunghcoz anbaiz, Lij fuyencangj miz haj hoh aeu bangfuz, neix dwg aen yinvu ndeu, itdingh aeu guhsat guhndei. Lij fuyencangj cungj dwg yo seizgan caenndang bae cunz doengh ranz de bangfuz haenx, rox cingcuj gunnanz saedsaeh, gaijgez vwndiz saedsaeh.

Moix baez bae ndaw ranzgungzhoj, ranz de cungj gaem fwngz Lij fuyencangj ndaetndaet bae, lae raemxda dwk naeuz: “Gyo’mbaiq lingjdauj gvansim ha! Aenvih miz lingjdauj gvansim, seizneix swnghhoz ndei lai lo!” Lij fuyencangj miz di geizheih.

Ngoenzneix, Lij fuyencangj vuenh dauq buhvaq gaeuq ndeu, couh laeglemx gwih cimohdoz roengz mbanj lo, bae daengz doengh hoh gungzhoj ndaw yienh ceiq gyae haenx. Gij ganbu ndaw yangh caeuq ndaw mbanj, mbouj miz saek boux rox Lij fuyencangj ngoenzneix bae fuzbinz. Lij fuyencangj siengj yawjyawj gij ranzgungzhoj caensaed haenx. Lij fuyencangj daeuj daengz ranzgungzhoj Veiz Wsu. Veiz Wsu gyad le cib geij bi lo, gwn ndoet oknyouh okhaex, cungj youq gwnz mbonq. Mehyah Veiz Wsu bae baihnamz dajgoeng lo, song laeq lwgnyez, swhliu yienh’ok cungj hwnjhag ne.

“Veiz daeggo, mwngz lij ndei lwi?” Lij fuyencangj hai dou le, cam de! Lij fuyencangj byaij haeujbae, raen daeg lwgnyez ndeu cingq youq henz cingjmbwn oknyouh ne. “Dwg bouxlawz ha? Gou youq ranz ne! Mbouj youq ranz ndaej bae gizlawz ha!” Veiz Wsu youq ndaw ranz han naeuz.

Laeq lwgnyez haenx raen vunzseng daeuj le, yaepyet couh buet haeuj ndaw ranz bae, “ba” sing ndeu gven dou hwnjdaeuj. Lwgnyez haeuj ranz le, youh daj conghcueng iet gyaeuj okdaeuj, cimyawj baihrog, lwgda cungj mbouj yaep saek baez. Lij fuyencangj naeuz:“Siujbaengzyoux, mwngz gaej lau! Daeuj, daeuj, boh’au cam geij aen vwndiz ha! Mwngz aeu lauxsaed hoiz- dap bw!” “Mwngz ngoenzneix mbouj bae yozyau ha?” Lwgnyez haenx han naeuz:“Bae ndaek roet! Youq ranz guhcaemz yinx- daeuz dangqmaz. ”

Veiz Wsu sim- gip dwk naeuz:“Mwngz lwg neix, caenh rox nyig vunz!” Youh gangj:“Lwgnyez ranz dou ngoenzneix baenz- bingh lo, cingjgyaj ma ranz!” Lij fuyencangj youh cam lwgnyez naeuz:“Mwngz heuh gijmaz coh ha?” Lwgnyez naeuz:“Veiz Wgouj! Vunz cungj heuh gou Wgouj! Ranz gou singq Veiz, ndigah heuh Veiz Wgouj!” “Boux lwgnyez neix lij haemq coengmingz ha!” Lij fuyencangj haenh lwgnyez lo.

Veiz Wsu youq gwnz mbonq, mbon ok mbaw baengzgawq canzcaed ndeu okdaeuj, dwg laeq lwgnyez haenx, gwnz de miz aen yaenq myoxmyad canzlenz haenx! Lij fuyencangj ciep gvaq mbawcingq, baez yawj, dwg ciliz it gaep canzfeiq! Veiz Wsu siengsim dwk naeuz:“De caenh rox gangj geij coenz vah neix! Gizsaed de dwg ndaek huk ndeu, bae hagdangz gijmaz cungj mbouj rox, ngoenznaengz daujluenh! Banh aen cwngmingz ndangcanz lo! Lij doeg gijmaz saw ha!”

Lij fuyencangj naeuz: “Boux vunz ciliz it gaep canzfeiq gangj vah suijbingz ndaej baenzneix ndei? Dwg mbouj dwg gauj loek ha!”

Veiz Wsu naeuz:“Fanjcingq daeg lwg gou miz baengzgawq ndangcanz! Mwngz couh gaej guenj la! Neix mbouj gven saeh mwngz!” Lij fuyencangj naeuz:“Mwngz aeu soengq lwgnyez bae doegsaw, mboujnex couh nguh ciuhvunz lwgnyez ha!”

“Hagdangz naeuz hagseng it gaep canzfeiq aeu bae daegbied gyauyuz yozyau bae hwnjhag! Gou dwg ranz gungzhoj, mbouj miz naengzlig soengq bae ha!” Veiz Wsu naeuz, “Gij hagdangz henzgyawj baez yawjraen gij baengzgawq canzfeiq neix, cungj mbouj gamj sou!”

Lij fuyencangj naeuz:“Gij baengzgawq canzfeiq neix banh ndaej mbouj mingzbeg! Gou yaek dawz bae niemhcingq!” Gangj dwk yo haeuj ndaw daeh bae! Veiz Wsu daej dwk naeuz:“Danghnaeuz mbouj miz mbaw canzfeiq neix, gou couh mbouj ndaej bingzhwnj ranz- gungzhoj lo! Vaiqdi hawj gou dauq! Vaiqdi hawj gou dauq!”

Lij fuyencangj vix aen gyaeuj Veiz Wsu naeuz: “Mbouj miz mbaw cwngmingz ndangcanz neix, mwngz lij dwg ranzgungzhoj! Hoeng, mbouj miz mbaw ndangcanz gyaj neix, lwgnyez mwngz couh ndaej lumj boux cingqciengz haenx nei bae hwnjhag lo! Mwngz moengxloengz la!”

Lij fuyencangj mbon soujgih okdaeuj dwk hawj yanghcangj naeuz: “Yanghcangj, ginz- cung fanjyingj, daengz yienhciengz cazniemh, Loenghmaj Cunh ranzgungzhoj Veiz Wsu miz boux lwgnyez ndeu dingzhag youq ranz, mwngz aeu vaiqdi doeksaed banhleix, mbouj ndaej hawj boux lwgnyez ranzgungzhoj haenx mbouj ndaej doegsaw ha!”

Yanghcangj naeuz: “Rox lo, ndaej lo. Baujcingq guhsat guhndei yinvu!”

Veiz Wsu youq gwnz mbon fan bae fuk dauq, naeuz: “Gyo’mbaiq mwngz! Gyo’mbaiq ha!”

Veiz Wgouj hai dou rug, buet okdaeuj naeuz: “Gizsaed gou mbouj heuhguh Veiz Wgouj! Gou heuhguh Veiz Cingoz!”

Lij fuyencangj naeuz: “Gaiq mingzcoh neix ndei ha! Mwngz aen mingz neix caen ndei!”

Youq gwnz loh dauqma, Lij fuyencangj soeng gaemz heiq ndeu lo.