Youq mwh gou lij caengz daengz maez haeuj yaemz bya gaxgonq, Vangz lauxsae cungj dwg yungh faexset bae yaemz bya. De dwg yungh bakset meizvah ngaeu, gijde dwg yungh cibgeij fag bakset daeuj cug baenz roix ndeu, moix baez yungh ndaek ngaeuh hung lumj gaemxgienz nei. Gou rox yaemz bya le, de hix hag rox yungh ngaeuh bae yaemz bya lo.

Miz baez ndeu, singhgiz roek, gou riengz Vangz lauxsae bae daengz mbanjlaj aen huz he bae yaemz bya. Gizhaenx gyawj mbanj, ciengzciengz dingqnyi gaeq haen ma raeuq. Vangz lauxsae heuz ndaek ngaeuh yaek yaemz bya homfwtfwt, nyex ndaej gij ma mbanj de ngah daengz myaiz lae bae, cungj siengj daeuj caeg gwn gij ngaeuh yaemz bya. Mwh banringz, Vangz lauxsae gaenq dawz gaemz ngaeuh yaemz bya he heuz ndei duk haeuj bakset bae yaek vut roengz ndaw dah bae yaemz bya lo, hoeng de sawqmwh nyouh haenq lai, cij ndaej bae ra dieg oknyouh gonq.

Swnh de mbouj youq, miz duz mahenj ndeu mbouj rox daj gyawz bongh okdaeuj caeg gwn gij ngaeuh yaemz bya, dingjlingz gwn dawz haeuj ndaek ngaeuh duk haeuj bakset bae, deng bakset coeg haeuj bak ndaet- ndengndeng bae, in ndaej duz ma de saet haeuj ndaw nya henz dah bae rouxringx hwnjdaeuj, swenjyauyau, beng ndaej aen lingz faexset Vangz lauxsae hongz “rungrang rungrang” hwnjdaeuj, diuz faexset de goz lumj aen gung nei, lumjnaeuz yaemz ndaej duz bya hung lawz nei.

Seizneix, Vangz lauxsae oknyouh ngamq dauq, yawjraen fag faexset de baenzneix, de laihnaeuz dwg duz bya hung lawz caeg gwn gij ngaeuh lo, doq gaem faexset doq sou mae fid hwnjdaeuj, doeklaeng yaemz hwnj duz ma geq ndeu, duz ma haenx lij gyaenfofo, lwgda daengx couh Vangz lauxsae, manz lumj duzguk nei, rig heuj yaek haeb vunz. Vangz lauxsae doq ndaq hwnjdaeuj:“Ced meh mwngz auq, yaemz bya mbouj ndaej cixbah, dauq ndaej duz ma geq ndeu……”

Duz ma haenx riengz de doxbeng hwnjdaeuj, gyoengq mehmbwk youq henz dah guhsaeg haenx yawjraen le, cungj riu hwnjdaeuj gyuk haha, gou hix riu dwk ndawdungx saej doxgeuj bae, gyoengq mehmbwk guhsaeg haenx riu naeuz Vangz lauxsae daeuj yaemz bya yaemz ndaej duz ma ndeu, caen dwg mingh ndei lai ha, daj seizgeq roengzdaeuj caengz raen byawz yaemz ndaej duzma gvaq.

Vangz lauxsae yaek riu mbouj ndaej yaek daej mbouj dwg, de caeuq duz ma haenx doxbeng ndaej hanh sinz hanh conh caez, gwnzndang buh dumz liux, de geijlai siengj sou roix ngaeu meizvah de dauqma ha, roix ngaeu haenx de haemhlwenz sai haujlai goengfou cij cug baenz ne, hojsik lai lo. Youh lau deng duz ma neix haeb, mbouj dij, cijndei yungh gyaeujien lej diuz mae set goenq bae hawj duz ma de buet deuz lo. Ndaw bak Vangz lauxsae lij mbouj dingz nambyoedbyoed naeuz:“Duz mahenj ced meh mwngz, duz ma dairaq neix……”

Gyoengqvunz youq henz dah cungj riu ndaej saej yaek doxgeuj bae, daj seizhaenx hwnj, gyoengqdou maij yaemz bya couh aeu aen mingzcoh “boux saefouh yaemz ma” ndeidingq neix daeuj heuh Vangz lauxsae lo.

Ha ha, “boux saefouh yaemz ma” aen mingzcoh neix geijlai ndeidingq ha! Neix dwg gienh saeh gig mizyinx Vangz lauxsae duiyouh le, youq ndaw doengh boux yaemzset gyoengqdou cienz bae cienz dauq, doeklaeng cienz ndaej gig gyae, baez dwen daengz cungj roxnyinh ndeiriu raixcaix.(2 sat)