2022 nienz, Gvangjsih Saujsu Minzcuz Gujciz Baujhu Yenzgiu Cunghsinh(baihlaj soh heuh “Gujciz Cunghsinh”) haenqrengz guh hong ciengjgouq saeujcomz henhoh sawgeq saujsu minzcuz, lai aen cauhmoq hanghmoeg guh ndaej ak lai.

Cingzcik Hong Ciengjgouq Saeujcomz Sawgeq Saujsu Minzcuz Youq Daengx Guek Baiz Guh Daeuz

Gujciz Cunghsinh roengzsim saeujcaz, aeu “fukyaenqgienh vuenh yienzgienh” aen banhfap moq neix ciengjgouq saeujcomz sawgeq saujsu minzcuz, aeu ndaej cingzcik ndei. Daengz 2022 nienz 11 nyied daej, ciengjgouq saeujcomz ndaej sawgeq saujsu minzcuz 2916 cek (gienh), mauhgvaq dinghngeg guhsat hong daengx bi, beij binaengz guh ndaej youh lai youh ndei, cingzcik youq daengx guek baiz guh daeuz.

Hong Cingjleix Yenzgiu Sawgeq Saujsu Minzcuz Ndaej Vunz Haenh

Vih bonj《Cungjmoeg Daezaeu Sawgeq Saujsu Minzcuz Cungguek·Gienj Bouxcuengh》 daenggeiq sat 625 mbaw gajbenq Bouxcuengh、 sij sat 571 diuz swzdiuz. Hong biensij 《Vwnzgu Sawgeq Gvangjsih》 guh ndaej swnhleih, 《Ingjyaenq Hoiz- cawq Fwen Gojgaeq Vajsi Fuhyinz Dingjhoenx Yizbwnj》《Hoizcawq Fwenyauz Vahcuengh Gauhgyaz Gvangjsih》song aen hanghmoeg liedhaeuj “Dauqsaw Cingjleix Okbanj Sawgeq Couqmaenh Gij Eiqsik Caezcaemh Cunghvaz Minzcuz” Guekgya Minzveij haenx gaenq okbanj, doengzseiz lij okbanj le “Dauqsaw Ginghdenj Vwnzyen Couqmaenh Gij Eiqsik Caezcaemh Cunghvaz Minzcuz” bonj daih’it de 《Hoizcawq Gingsei Yahvuengz》caeuq 《Doiqcawq Seicomz Bingzsanh》《Beigaek Ranghdieg Dungcuz·Gienj Sanhgyangh》sam bonj saw. Cawjbien bonj 《Ingj- yaenq Hoizcawq Lwnh Caux Biengz(Ging Caux Ciuh)》aeu ndaej Gaiq Daih Cibhaj Cungguek Minzgenh Vwnzyi Vahsanhciengj·Cozbinj Maenh- ndei Vwnzyoz Ndawbiengz.

Hong Soqcih Sawgeq Saujsu Minzcuz Gaenq Nda Baenzyiengh

Gujciz Cunghsinh caeuq bouhmonz wnq habguh, laeb aen “Soqcih Bingzdaiz Vwnzgu Sawgeq Gvangjsih”, doidoengh “Vwnzgu Sawgeq Gvangjsih” soqcih bingzdaiz geiz daih’it youq 2022 nienz 8 nyied 29 hauh cingqsik haidoeng. Bingzdaiz souloeg 100 lai bouh sawgeq Sawndip caeuq gaenh cien faenh sawfaenz ranghdieg minzcuz daengj dijbauj, hawj daengx biengz ndaej caezyiengj soqcih cwngzgoj saeujcomz sawgeq saujsu minzcuz Gvangjsih. Doengzseiz aen “Hidungj Cawqleix Saenqsik Sawndip” youq gwnz giekdaej gaeuq demgya souloeg caeuq bienmaj gaenh 5000 cih saw, gangjmingz hong soqcih sawgeq saujsu minzcuz Gvangjsih yamq ok yamq youqgaenj ndeu.

Lai Cungj Lai Yiengh Senhconz Sawgeq Saujsu Minzcuz Yingjyangj Hung

Aeu sawfaenz、benqciendaez、sibinz dinj daengj fuengsik youq bauqceij、vangjcan、veihsin gungh- cunghau senhconz hong sawgeq saujsu minzcuz, hawj vunz rox lailai. Doengzseiz, guh aen canjdingh langhbaij vah saw saujsu minzcuz caeuq sawgeq. 2022 nienz 11 nyied 26 hauh, caeuq danhvei wnq lienzhab youq Liujcouh guh Mbawyaenq Beigaek Caeuq Sawgeq Ciendaez Canjlanj, senhconz yaugoj gig ndei.

(Swcigih Minzcunghveij hawj gauj)