43. Cam:

Gijmaz mbwk mbouj saeq,

Cix gwn gaeq daengx duz?

Gijmaz gyaeuj mbouj rwz,

Gwn duzcwz bae liux?

Hoiz:

Rungzgaeq mbwk youh saeq,

Cix gwn gaeq daengx duz.

Ranzriengh gyaeuj mbouj rwz,

Gwn duzcwz bae liux.

44. Cam:

Gang neix gijmaz gang,

Cang raemx mbouj rox rim?

Rin neix gijmaz rin,

Aeu caep singz mbouj ndaej?

Hoiz:

Daihhaij gvangqmyangmyang,

Cang raemx mbouj rox rim.

Daeuhfouh yienz lumj rin,

Aeu caep singz mbouj ndaej.

45. Cam:

Gijmaz mbouj miz din,

Bongh gvaq gwnz ranz vax?

Maz de mbouj miz naj,

Ndonj gvaq laj congh ruz?

Hoiz:

Rumz de mbouj miz din,

Bongh gvaq gwnz ranz vax.

Raemx de mbouj miz naj,

Ndonj gvaq laj congh ruz.

46. Cam:

Gijmaz youq ndaw mboq,

Oq lumj duj lienzva?

Gijmaz youq ndaw gva,

Cawj maz hix mbouj cug?

Hoiz:

Daengngoenz youq ndaw mboq,

Oq lumj duj lienzva.

Aenbeuz youq ndaw gva,

Cawj maz hix mbouj cug.

47. Seiq diuz saeu dingj diuz liengz,

Bouxhek daeuj daengz nauh it ciengz.

(Giuh)

48. Daenj haizgieg gvaq boengz,

Daenj mauh hoengz ciengq go.

(Roegvaiqguh)

（5）