Gangj daengz yaemz ma sou aiq roxnyinh gig geizgvaiq ba? Daj ciuhlaux daeuj cij dingqnyi naeuz miz vunz yaemz bya lij caengz ndaejnyi byawz yaemz ma gvaq bw? Gojgaeq lij aeu daj goek lwnh cij ndaej.

Gou riengz Vangz lauxsae roxnaj gaenq ndaej haujlai bi lo, Vangz lauxsae ndaej caetcib lai bi baedauq, vun gig sang, byoem hau yaek liux lo, ngoenznaengz angqvauvau. Gaej yawj de ndaej caetcib lai bi lo, hoeng de maij riengz bouxcoz gyau baengz- youx, dou cungj heuh de guh “bouxgeq iq” bw, gou caeuq de couhdwg baengzyoux ndei, vunz cungj riu naeuz dou boux geq gap lwgcoz, hix gap ndaej huz.

Caeuq Vangz lauxsae gyau baengzyoux, lwnh daeuj goj couh raez lo. Gaxgonq de dwg boux lauxsae aen hagdangz iq ndeu, ndaej gangjnaeuz dwg yaucangj、cujyin、banhcujyin、boux lauxsae son yijvwnz、boux lauxsae son suyoz、boux lauxsae son yinhyoz…… Maz go de cungj son liux, caenq dwg ndang ndeu guh lai yiengh hong ha! Gizhaenx dwg aen gyauyoz- diemj ndeu, hagdangz iq, gyausiz youq gex lueg gex bya he, gingjsaek ndei, seiqmienh faex mwncupcup, daengz banhaemh le couh caemrwgrwg, cij dingqnyi duzdaek duznengz gyang- hwnz heuh gyitgyit gyaetgyaet, caen dwg naeuz:“Lingh aen seiqgyaiq wnq, mbouj miz maz nyapnyuk siengsim, mbouj miz maz gwn haemz sinjhoj ha.”

Gou ngamq faenboiq bae daengz gizde ngoenz daihngeih, Vangz laux- sae cungj gyau gij hong sonhag aen hagdangz hawj gou liux lo. Gizsaed, gou gizlawz rox hwnjdangz ha, couh dangguh daeuj hagsib ndwi lo, ndigah cij ndaej laep da laep rw son roengzbae. Aenvih gou bae aen hagdangz iq de dwg ciep dawz aen “bat” Vangz lauxsae, Vangz lauxsae duiyouh seizgan gaenq daengz lo! Gou sinhoj dwg sinhoj lo, hoeng hix miz di ndei, gizneix bya sang roen hoj, liz bouxhak bouxguenj gyae, maz saeh ndaej seizbienh di, hawj gou bouxcoz ngamq bizyez okdaeuj guhhong neix simsoeng simsangj dangqmaz, neix dwg vah ngoenzlaeng lo.

Ngoenzde, gou bae daengz aen hagdangz iq le, Vangz lauxsae couh hawj gij saeh sonhag hawj gou, lij naeuz:“Daj seizneix hwnj couh youz mwngz guh vang guh laeh lo, gou bae ra byaekcaeuz soengq laeuj haemh- neix hawj raeuz gonq.” Yienzhaeuh couh gwed gij doxgaiq nyeu bya de angqloekloek coh suijgu buet bae lo. O, yienzlaiz, Vangz lauxsae baenzneix haengj nyeu bya ha. Haemhde, de caen dwk ndaej geij duz byalaux dauq dahraix, gou mbouj rox de dwg gag nyeu ndaej roxnaeuz dwg bae gwnzhaw cawx dauqma, baenzbaenz miz bya gwn couh baenz lo. Haemhde, dou song boux guh noh byaseng le, lij ciencien caujcauj dem, youh sai bae le haujlai laeujdoj dem, ndoet laeuj seiz Vangz lauxsae cungj dwg gangjboq naeuz de yaemz bya baenzlawz baenzlawz ak, gizgyawj mbouj miz vunz beij ndaej de, yaemz bya dwg geijlai mizyinx ha, cij aeu ndaej bae daengz bangxraemx, bouz vunz couh simsangj miz cingzsaenz gvaekgvaek raixcaix…… Gou youq henz dingq ndaej ngaw bae, couhdwg youq seizde gou deng Vangz lauxsae lag roengz ndaw “raemx” bae lo, yied cak yied laeg, daengz doeklaeng gou couh riengz de bae bangxdaemz bangxdah yaemz bya lo, yaemz ndaej bya doxdauq youh caez loengh bya gwn, miz gangj miz riu, daj seizde hwnj dou couh baenz baengx- youx ndei lo.

(1)