Godaih cim go’ngeih, go’ngeih cim godaih, doeklaeng go’ngeih naeuz:“Daegnuengx, haj cien maenz dou doxfaen lo. Gangj coenz vah soh, daxboh lij youq seiz, de caeuq mwngz caemh ranz, seizneix de mbouj youq lo, caemh dwg mwngz guenj. Mwngz geijlai bi mbouj dauqma sauqmoh, song boux dou mbouj dwg dingj mwngz sauqmoh daxboh lwi? Haj cien maenz neix dangguh gij cienz sinhoj, habcingz hableix o.”

Daxmeh nep gaiq nohgaeq ndeu youh cuengq dauqbae, ngveq gyaeuj raemxda couh doek okdaeuj. Godaih naeuz:“Daegnuengx mwngz seizneix suenq dwg vunzrog lo, gij saeh gvaqlaeng daxmeh hix mbouj dwg mazfanz song boux dou, haj cien maenz ngaenz neix, mwngz vihmaz cungj cuengq youq ndawsim?”

“Mbouj dwg aen eiqsei neix, daxboh laeb sigbei cungj aeu laeb ha!” Daegveih naeuz.

“Gij saeh neix caih mwngz guhcawj, mwngz hai cienz dou cij rox guhhong, mwngz sien hai bet cien maenz daeuj gonq.” Song daeggo naeuz.

Mbwn laep raixcaix, godaih go- ngeih couh yienghneix mbouj angq dauqbae. Daegveih buenx daxmeh youq geij ngoenz, de rox mbatneix dauqma, daengz ranzmbanj gij vunz caeuq gij saeh cungj mbouj dox- doengz, daxmeh de baenzngoenz raemxda roengz. Daegveih naeuz:“Meh, caeuq gou bae youq duenh seizgan ndeu, yienghneix aen sim mwngz rox ndei di.”

Daxmeh ngauzngauz gyaeuj.

Ngoenz daihngeih, Daegveih doengh ndang bae Gvangjdungh lo, ngamq byaij ok bakdou, daxmeh song ga gvih roengzdaeuj, song fwngz maenhmaenh gotdawz gij dinvaq Daegveih, de daej mbouj baenz sing naeuz:“Lwg ha, meh mbouj hawj mwngz bae, mwngz bae meh couh dai hawj mwngz yawj!” Daegveih mbouj miz banhfap, cij ndaej youh naengh roengzdaeuj buenx daxmeh gangj vah. Yaep ndeu, godaih couh daengz ranz daeuj, de yawjraen aen ciengzmienh neix, roxnyinh daxmeh yienghneix guh mbouj deng. Godaih dawz doxgaiq gyau hawj mehyah Daegveih, naeuz:“Sou bae ba, bouxgeq cungj dwg yienghneix, sou bae le, de yaepseiz couh ndei.” Daegveih caeuq mehyah de ngamq daengz bakmbanj, go’ngeih couh baegfofo buet daeuj, naeuz daxmeh gaenq mbouj miz heiq lo.

Daegveih lumj rumz nei buet maranz, daxmeh de cingq ninz youq gwnz sahfaz, fajnaj nyaeuqnyatnyat venj song roix raemxda, cingq menhmenh lae roengz naj daeuj.

“Meh —— Mwngz baenzlawz yienghneix lo? Aeu gvaiq gou, dwg gvaiq gou mbouj deng.” Daegveih daejnganga naeuz.

Ciep roengzdaeuj couhdwg hawj daxmeh banh begsaeh. Ciuq gij fungsug ndawmbanj, vunz dai aeu hawj goengdauh bae ciudoh. Daeg- veih daenj aen gyaepmienh, daenj buhhauq hwnj dou ranz bae cingj goengdauh, godaih、go’ngeih youq henz meh soujyauq. Lajmbanj dou, bouxdai itbuen cuengq youq ranz sam ngoenz couh dawz hwnj bo bae, ngoenz cungqgyang dwg goeng- dauh diuq daucangz, yienghneix couh aeu sai fanh lai maenz ngaenz. Daegveih naeuz song daeggo:“Godaih、go’ngeih, yawj daeuj cienz mbouj gaeuq le, sou ndaej mbouj ndaej demh di okdaeuj gonq, caj gvaq le caiq hawj sou.”

“Meh gaen bouxlawz gvaq saedceij, bouxde couh ok ngaenz, song boux go, ndaej yiengjsouh bouxlaux maz? Lienz lwgnyez dou, de hix mbouj ndaej daiq.” Saujdaih naengh youq henz faex ciengj gangj. Godaih、go’ngeih itcig mbouj oksing, Daegveih sikhaek raemxda lumj fwn doek.

Bouxdauh ciudoh daxmeh gij sing ciengq ging sing doeg ging mbouj dingz mbouj duenh, Cejdaih、Cejngeih daej le youh dingz, dingz le youh daej. Daegveih youq henz cejdaih, de beng genbuh Cejdaih, eiqsei naeuz mbouj caiq daej lo. Cejdaih naeuz Daegveih:“Nuengx, godaih go’ngeih doengzcaez ok ngaenz lwi?” Daegveih ngaekngaek gyaeuj. Cejdaih laebdaeb naeuz:“Gou mbouj miz geijlai, couh hawj mwngz haj cien maenz, yawj mwngz hojlienz lai.” Yienzhaeuh daj ndaw daeh vaq aeu cienz hawj Daegveih. Saujngeih naengh youq doiqnaj yawj bouxdauh saetdiuq, de raen cingcing cujcuj, de doq baenqgyaeuj naeuz Saujdaih:“Bajdaih, mwngz yawjranz raeuz sam mehmbwk, doengzcaez ok ngaenz ne.”

Saujngeih naeuz ‘Sam boux mehmbwk’ coenz vah neix, bauhamz Daegveih youq ndaw dem. De gangj le, mbwnj bak riu hwnjdaeuj, gij yienghsiengq haenx lumj duz fangz- byaiz nei.

Ciuq gij fungsug lajmbanj, yaek dawz bouxdai hwnj bo bae, aeu ra bet bouxsai daeuj ram faex, heuhguh “bet daih ginhgangh”, mbouj ndaej lai boux, hix mbouj ndaej noix boux. Hab ra bouxlawz? Daegveih siengj daengz gyoengq doih Daeggyaeq、 Daeg- yiengz、Daegniuz, de caenndang bae gvih cam sam boux hujgeiq neix, hoeng gyoengqde bouxboux cungj mbouj leix Daegveih, dauqfanj vut coenz vah hojsouh he hawj Daegveih:“Bouxlawz hawj mwngz haq okbae? Mwngz mbouj dwg hojgeiq dou.” Daegveih raemxda doek lo.

Hwnj bo couh yaek daengz lo, “bet daih ginhgangh” lij ca boux vunz ndeu. Daegveih siengsim daengz dingj lo, de hixnaengz duet gyoengq buhhauq, doengzcaez ram daxmeh de okdou bae……

Daj seizhaenx hwnj, Daegveih mieng okbak naeuz caiq mbouj dauqma ranzcoj. Ngeihcib bi gvaq- bae lo, Daegveih cungj youq baihrog gvaq saedceij, lwg de hix hwnj daihhag lo. Bi’gvaq ndwencieng, dahlwg de naeuz:“Daxboh, gou yaek gunghcoz lo, raeuz dauqbae mbanjcoj sauq moh goengbaeuq ba.” Daegveih sim lumj mid yoek, hoeng lij wh dahlwg dauqbae.

Bae daengz mbanjcoj, Daegveih ra ranzgaeuq mbouj raen lo. Cij raen goemq aen diengzdiet ndeu, ndaw diengzdiet ciengx cibhaj duz cwz. Gyoengqde bae daengz gyawj, ndaej- nyi duzcwz “mo mo” heuh mbouj dingz, dahlwg Daegveih cibfaen sim- angq, aeu fwngz bae lumh aen gyaeuj duzcwz, doq lumh doq naeuz daxboh de:“Mbanjcoj baenzlai ndei, mwngz baenzlawz mbouj ciengz dauq ni?” Daegveih mbouj dap. Godaih naeuz Daegveih:“Mwngz geijcib bi mbouj dauq, faq ciengz ranz doemq lo, gou doi biengz aeu daeuj ciengx cwz, bae ranz gou naenghnaengh gonq ba, mwngz yaek yungh gij dieg neix gou caiq hawj mwngz.”

Daj ranzgaeuq bae ranz godaih, couh aeu bwh gaeq bae baiz bohmeh, bae daengz henz moh daxboh, Daeg- veih raen aen moh doiqnaj laeb gaiq sigbei ndeu. Go’ngeih mbouj eiqseiq naeuz:“Daegnuengx, gvaiq gaxgonq gungz lai, cawqcawq doiq mwngz mbouj ndei, bonjlaiz hawj daxboh laeb sigbei wnggai caez ok ngaenz, hoeng, dou dauqfanj aeu gij cienz mwngz daeuj faen lo, geij bi daeuj, bouxboux ra ngaenz ndaej lai, gou caeuq godaih couh laeb sigbei hawj daxboh.”

Daegveih ndingq laeuj hawj daxboh, mbouj siujsim song caek raemxda doek roengz ndaw cenj laeuj bae.

Baiz bohmeh dauq lo, youq laeng godaih gwn caeuz, cij raen gyoengq- vunz gwn haeuxam, mbouj raen gwn cuk haeuxyangz, Saujdaih naeuz:“Geij bi gonq ndawmbanj haifat mboq lajnamh, cou raemx hwnjdaeuj ndaem haeuxnaz, seizneix daengx mbanj vunz cungj gwn haeuxnaz caez.”

Godaih ndingq cenj laeuj hawj Dagveih, Dagveih yawj gyoengqvunz gyang congz, bouxboux cungj gwn cenj laeuj ndang gaeuq. Daegveih cam:“Seixneiz gwn laeuj mbouj doxvuenh lwi?” Godangz naeuz:“Doxvuenh mbouj veiswngh, gag boux gag gwn.” Gwn daengz byonghgyang, Godaih dawz dab ngaenz he okdaeuj, ndenq hawj Daegveih naeuz:“Godaih doiq mbouj hwnj mwngz, gij cienz dwg gaxgonq mwngz hawj daeuj laeb sigbei daxboh, seizneix doiq dauq hawj mwngz.” Daegveih mbouj aeu, dawz cenj laeuj hwnjdaeuj gaemz ndeu gwn liux.

Dauqbae seiz, Daegveih sim- luenh lumj cagndaij, de ngeix daengz mwhhaenx mieng coh mbwn gvaq mbouj caiq dauq diegcoj coenz vah haenx seiz, de ienq youq ndawsim. Yienghneix, de couh cam dahlwg:“Dahvaz, mwngz naeuz, gij vah mieng gvaq haenx ndaej souma ma?” Dahvaz riu naeuz:“Couh yawj mwngz miz mbouj miz caen’eiq lo, mwngz miz caen’eiq, gwnzmbwn rox hawj mwngz gihvei souma.”

（2 sat）