Mwh swhgeij caengz miz soujgih seiz, raen vunz raek aen soujgih youq gwnz hwet, caen hozhaenz dangqmaz.

Doeklaeng, vih fuengbienh guh- hong, gou hix mbaet gwn mbaet yungh cawx aen soujgih daeuj yungh. Seizhaenx, gij gunghnwngz soujgih gamjdan lai raeuh, cij ndaej yungh daeuj dwk dienhvah. Baez miz maz saeh, yaek lienzhaeh doiqfueng, dwk aen dienhvah bae, couh gangj ndaej seuq lo.

Baengh gij gohgi cinbu baenaj, gij gunghnwngz soujgih hix yied daeuj yied caezcienz. “Miz aen soujgih byaij lajmbwn.” Caen mbouj dwg coenz vah yaeuh vunz.

Sien gangj, ngoenznaengz hai souhgih, maz saeh lajmbwn couh rox caez. Siengj yawj maz sinhvwnz couh ndaej yawj. Lumjnaeuz baez binghraq neix, ngoenznaengz gyawz miz geijlai vunz deng lah, cungj ndaej youq gwnz soujgih ndaej rox. Ndaej bae gyawz, mbouj ndaej bae gyawz, cungj ndaej youq gwnz soujgih rox doh. Caiq mbouj lumj gaxgonq, gij saeh lajmbwn cij ndaej daj gwnz densi yawjraen roxnaeuz ndaw gvangjbo ndaejnyi, baez lizhai densi roxnaeuz gvangjbo couh baenz boux dafangz roxnaeuz boux rwznuk lo.

Ceiq youqgaenj dwg, gaxgonq okrog bae, gwnz ndang cungj dawz cienz, mbouj dawz cienz riengz caen dwg yamq din nanz byaij. Daiq cienz youq gwnzndang, bae giz diegseng najmoq, naeuz baenzlawz mazfanz couh baenzlawz mazfanz. Seizneix caen mbouj doxdoengz lo, dingzlai vunz okdou cungj mbouj dawz ngaenz lo, cienzbau hix mbouj dawz lo. cij dawz aen soujgih couh ndaej, byaij daengz gyawz cawx maz doxgaiq cungj ndaej aeu soujgih hawj ngaenz! Cijaeu ndaw cangqhoh bonjfaenh miz ngaenz.

Mwngz yawj, baez bae haw cawx byaek, yungh veihsinh soujgih hawj cienz; naengh cigunghgyauh roxnaeuz didez yungh soujgih saujmaz hawj cienz; youq gwnz app soujgih cawx doxgaiq, cigciep youq ndaw soujgih hawj cienz, fuengbienh lai raeuh.

Hoeng, vah hix gangj dauqma, soujgih hawj gyoengqvunz daiq daeuj fuengbienh seiz, hix hawj gyoengqvunz daiq daeuj haujlai simnyap.

Lumjnaeuz ranz vunz ndeu, mwh naengh youq itheij, gaxgonq mwngz gangj gou riu, bouxboux miz soujgih le, couh cungj gaemdawz soujgih cimyawj, mwngz caemz youzhi gou yawj sibinz, cungj mbouj raen gangj saek coenz vah, boux ceiq gyawj bienqbaenz boux ceiq gyae lo. Siengj doxyaeng saekdi saeh cix mbouj rox baenzlawz haibak.

Lumjnaeuz gyoengqvunz youq ndaw danhvei guhhong. Ngoenznaengz liz aen soujgih, caen mbouj rox baenzlawz guhhong lo. Mwngz yawj- yawj ndaw veihsin soujgih swhgeij dauqdaej miz geijlai aen ginz. Danhvei baij maz hong mbouj dwg cungj doenggvaq ginz fatbouh lwi? Langh- naeuz mwngz mbouj louzsim cazyawj gij siusik ndaw ginz, aiq gij saeh couh laeuh gvaqbae lo, mwngz couh guh mbouj baenz hong. Engq youqgaenj dwg, gak danhvei vih fuengbienh swhgeij guhhong, laeb aen ginz neix laeb aen ginh de, hawj vunz dienz gij biuj neix dienz gij biuj de, guh gij caizliu mbouj liux mbouj sat. Lumj caen yunghsim guhhong lo, gizsaed maz hong cix guh mbouj ndei, hawj gyoengqvunz simhuj simnyap, mbouj rox baenzlawz gangj.

Caiq gangj, miz youzhi soujgih le, mbouj rox haih deng geijlai lwgnyez. Aenvih dawzyinx youzhi soujgih, mbouj bae hagdangz doegsaw rox- naeuz mbouj raiz cozyez. Aenvih ciengzseiz caemz gij youzhi soujgih, miz geijlai lwgnyez lwgda ginsi lo? Gyo’ndaej guekgya okdaiz gvidingh, aeu gij coh caen caemz youzhi soujgih, gyoengq lwgnyez caengz baenz vunz- hung moix cou mbouj ndaej caemz mauhgvaq sam aen cungdaeuz.

Soujgih caen ndei daihraix, gyoengqvunz raeuz nanz ndaej liz soujgih lo. Hoeng, langhnaeuz raeuz gaemguenj soujgih mbouj ndei, gij ndei de fanjdauq couh bienqbaenz mbouj ndei lo. Gou yaek gangj coenz vah caen ndeu——noix caemz soujgih, gvaq gij ndwenngoenz boek- saed dangqnaj.