原文 （Hoh saw daj 《Mungswj·Gauswj Laj》 aeu）：

故天将降大任于是人也，必先苦其心志，劳其筋骨，饿其体肤，空乏其身，行拂乱其所为，所以动心忍性，曾益其所不能。

译文：

Ndigah aen mbwn yaek aeu roengz gij sawjmingh hungnaek hawj boux vunz neix, itdingh aeu hawj ndawsim de haemzhoj gonq, hawj ndangndok de naetnaiq, hawj de souh gij haemzhoj dungxiek, hawj de souh gungzhoj, guh saeh mbouj swnh, daeuj hawj aen sim de doeksaet, hawj singgwz de giengiengz hwnjdaeuj, demgya gij naengzlig de mbouj miz haenx.

（大化瑶族自治县 Veiz Sezyenz/韦雪妍）

Ndigah, mbwn yaek hawj bouxvunz bae guh daihsaeh, itdingh aeu hawj sim de haemzhoj, ndangndok de sinhoj, lekdungx ngaiziek, caemh- caiq nyengh hawj de gwnhoj, guh saehcingz cungj mbouj ndaej haeujeiq gonq, baenzneix bae gujli caeuq gya’maenh gij singcingz de, dem lai gij bonjsaeh de fouz miz haenx.

（金城江区 Cwngz Gozbinh/程国斌）

Ndigah, aen mbwn naemj dawz gij saeh youqgaenj gyau hawj boux vunz neix guh, haengjdingh hawj de souh haemzhoj gonq. Loengh de sim baeg ndang naiq, caemhcaiq ngaiziek, gag roxnyinh daengx ndang cungj byouq liux, guh gijmaz cungj mbouj swnh. Yienghneix bik de sim doengh、 doeksaet, gag rox mboujduenh bae muzlienh ceiqheiq swhgeij, hag ndaej gig lai bonjsaeh, doeklaeng guh yiengh- yiengh cungj ndaej, guh yienghyiengh cungj baenz.（平果市 Vangz Gozgvanh/黄国观）

Naeuz vunzlai nyi aen mbwn yaek dawz saeh hungnaek doek youq gwnzndang boux vunz neix, itdingh sien hawj simceiq de souh haemzhoj, hawj ndoknyinz de dwgrengz, hawj de dungxiek gungznanh, caemhcaiq guh maz saeh cungj mbouj ndaej hab’eiq, ciq neix daeuj hawj ndawsim de saenqdoengh, hawj singcingz de bienq nyangq, demgya bonjsaeh.

（平果市 Lanz Funglenz/兰凤莲）

Sojlaiz mwh aen mbwn yaek dawz gienh saehgaenj hawj boux vunz de daeuj cingzdan, itdingh sien aeu hawj de simnyap simfanz gonq, ndangndok naetnaiq, hawj de dungxiek bienq byom, souh hojnanz, guh moix it gienh saeh cungj mbouj hab’eiq, doenggvaq gij neix hawj de ndawsim mingzbeg, hawj singqgwz de bienq giengiengz, gya lai gij naengzlig de mbouj miz haenx.（马山县 Lij Siujnaz/李小娜）

Aen mbwn yaek baij yinvu naek hawj gij vunz neix, itdingh hawj de sien souh hojnanh, hawj de ndokndang naetnaiq, hawj de souh iek, daengx aen ndang byomroz, hawj de saedceij gannanz, guh saeh luenhloek, cungj mbouj swnhleih, hawj de dawz doengh gij saeh neix haeuj rwz, hawj de engq maenh dingh singqged.

（西林县 Cwnz Liciuh/岑立秋）

Ndigah aen mbwn yaek dawz gij sawjmingh hungnaek gyangq daengz gwnz ndang yiengh vunz neix bae, bietdingh aeu sien muzlienh gij eiqceiq de, hawj ndawsim de indot, goetnyinz de dwgrengz youh baeg, hawj de souh gvaq dungxiek, souh hoj souh gungz, guh saeh cungj mbouj ndaej swnhleih. Yienghneix daeuj saenqdoengh gij simceiq de, hawj singcingz de giengiengz, demlai gij bonjsaeh de. （凤山县 Bwz Haij/白 海)

Sojlaiz aen mbwn yaek dawz gij bonjsaeh hung cuengq roengz gwnzndang de bae, itdingh sien hawj sim de hojyouq, hawj ndoknyinz de dwgrengz, hawj de souh iek souh gungzhoj, caiqlij hawj de guh saehsaeh cungj mbouj ndaej hab’eiq, yienghneix daeuj hawj ndawsim de saenqdoengh, hawj beizheiq de giendingh, demgya caizganq de.

（平果市 Luz Lilanz/陆丽兰）