Vahsug gangj:“Ndei mbouj ndei, raemx ndaw mbanj; caen mbouj caen, vunz mbanjraeuz.” Vah dwg yiengh naeuz, hoeng Daegveih doiq diegcoj cungj dwg saetmuengh.

Ngeihcib bi gonq, Daegveih bae Gvangjdungh dajgoeng, miz dahsau ndeu caeuq de caemh cehgenh, doeklaeng, Daegveih caeuq dahsau doxgyaez lo, mbouj geijlai nanz couh daengz ranz dahsau bae hwnjdou. Daegveih dwg boux vunz simsoh ndeu, vihliux gyo’mbaiq gyoengq beix- nuengx ndawmbanj ciuqgoq de, de couh caeuq mehyah dauqma ranzcoj yawjyawj.

Gyoengqde ma daengz bakmbanj, raen geij boux vunz yietliengz youq laj gofaex, yawj hwnjbae gig siliengz. Daegveih cungj roxnaj geij boux neix, dwg gij hujgeiq seiz iq de. Seizneix gyoengqde bienq ndaej geq haujlai, bouxboux mumh raez byoemgyaeuj nyungq, buhvaq heiznyinyi. Daegveih byaij daengz baihnaj, caeuq gyoengq hujgeiq doxdongx, hoeng gyoengqde lumj mbouj roxnaj Daegveih nei, cungj mbouj caeuq de gangjvah, de caeuq yah de couh dauqbae ranz lo.

Daegveih youq ndawranz baiz daihhaj, miz song daeggo, song dahcej. Song daeggo youq geij bi gonq couh faenranz lo, youq henz goengloh hwnj aen ranz swhgeij, faen daxmeh hawj Daegveih ciengx. Daegveih faen ndaej aen ranz gaeuq, aen ranz gaeuq lai bi mbouj ndaej coih, dingjranz laeuh raemx ndaw ranz maj rum. Daxmeh Daegveih baenzngoenz naengh youq bakdou, muengh Daegveih dauqma. Daegveih byaij haeuj bakdou ranz, daxmeh gaem fwngz mbouj cuengq, daej lumj fwn doek nei. Daegveih cam:“Meh, ndawmbanj Daeggyaeq、Daegyiengz、Daegniuz geij boux seizneix baenz- lawz bienqbaenz yienghneix, cungj mbouj okbae dajgoeng?”

“Ai, gik lai ha! Ca mbouj geijlai samcib gwnz gyaeuj lo, lij ra mbouj ndaej yah, gyoengqde dingqnyi naeuz mwngz bae hwnjdou, lij ndaenq mwngz ne.” Daxmeh naeuz.

“Haemz gou maz? Gou hwnjdou gvendaengz gyoengqde maz lo?” Daegveih naeuz.

“Mwngz mbouj rox, gyoengqde naeuz mwngz buqvaih gij fungsug ndawmbanj, okbae hwnjdou couh dangq famh cojcoeng lo, dwg gienh saeh saetnaj ndeu.” Daxmeh danqheiq raezrangrang naeuz.

“O, gou rox lo.” Daegveih haeuj ranz bae, doq caux feiz cawj haeux doq hoiz vah daxmeh de.

Gvaq geij ngoenz couhdwg cing- mingz lo. Ndawmbanj miz aen daemz hung ndeu, aiq miz sam seiq moux gvangq. Gangj daengz aen daemz neix, couhdwg gij in Daegveih. Mbanjcoj Daegveih, dwg aen mbanj iq, raemx mbouj miz gwn, youh mbouj doeng loh. Ciuq bouxlaux gangj, aen daemz neix miz aen cienzgangj ndeu. Doenghbaez, goengq bya laeng mbanj dwg goengq bya hung, bya hung doiqnaj youh miz song goengq bya iq. Miz ngoenz ndeu, boux deihleix sienseng ndeu daeuj daengz ndaw- mbanj, naeuz gyoengq goenggeq:“Gak boux banlaux ha, sou gizneix caen dwg dieg fungsuij ndei ndeu, sou yawj, laeng bya dwg mbouj dwg lumj boux dahsau lengj ndeu? Song goengq bya iq haenx dwg mbouj dwg lumj song aen cij de? Cij hojsik baihnaj mbanj sou mbouj miz saek diuz dah, danghnaeuz miz diuz dah, dieg neix couh engq ndei lo.” Gyoengq goenggeq baez dingq, muengz cam wnggai baenzlawz guh? Boux deihleix sienseng neix naeuz:“Sou aeu vat aen daemz hung he, daemz hung couh lumj aen gingq ndeu, heuhguh “dahsau ciuq gingq”. Danghnaeuz sou mbouj vat daemz guh aen gingq hawj boux dahsau lengj neix ciuq gingq, de couh yaek lizbae lo, baezlaeng, gyoengq bouxsai ndaw- mbanj couh baenz boux dog.” Vunz- mbanj baez dingq, couh simvueng hwnjdaeuj. Gvaqlaeng goenggeq baez ranz baez ranz bae sou cienz hawj boux deihleix sienseng neix, hawj de bang vat aen daemz.

Yienznaeuz dwg aen cienzgangj ndeu, Daegveih cungj geiq youq ndawsim. Daegveih geiq ndaej seiz iq mbouj miz raemx, baez daengz mwh doek fwn hung, ndawmbanj couh gyaep geijcib duz cwz roengz daemz bae caij daemz, naeuz yienghneix ndaej caij namh daemz saed, mbouj hawj raemx laeuh bae, vunzmbanj heuh neix guh “ lienh daemz”. Lienh daemz geij ngoenz, deq raemx bienq saw lo, gak ranz gak hoh couh rap doengjfaex、dawz aen rok bae aeu raemx cawj souh. Seizneix, ndaw- mbanj gaenq doeng swlaizsuij lo, aen daemz bienq ndaej caemrwgrwg, doeklaeng bienqbaenz aen daemzbya. Daxmeh naeuz Daegveih nyi, cing- mingz daengz lo, vunzmbanj yaek roengz daemz bae dwk bya. Daegveih gig sim’angq, ngoenzde hix daenj vaqdinj ndeu, caeuq vunzmbanj guh- doih roengz daemz bae dwk bya.

“Ai ai, mwngz baenzlawz hix roengzdaeuj dwk bya ne?” Boux daeuzmbanj lanz Daegveih.

“Meh gou heuh gou daeuj ha!”

“Meh mwngz dwg byawz? De caengz gyau ngaenz bya!” Boux daeuzmbanj naeuz, gyoengq vunzlai youq ndawdaemz hix naeuz. Daegveih gig nanzgvaq, dawz aen soemq bya byaij daengz dangqnaj Boux daeuz- mbanj naeuz:“Gou bouj gyau cienz bya, ndaej lwi?”

“Mbouj ndaej!”

“Gou lai gyau bak maenz!”

“Hix mbouj ndaej! Mwngz gaenq mbouj dwg vunz mbanj dou lo.” Boux daeuzmbanj gig mbouj ndei gangj, vunzmbanj hix gaenriengz cauzhuhu hwnjdaeuj.

Daegveih vut aen soemq bya, siengsim dauqbae ranz lo.

Ngoenz ciet cingmingz de, Daeg- veih caeuq mehyah de bwh ndei di byaek, bae gwnzhaw cawx song duz byaleix. Daegveih rox, gij fungsug ndawmbanj couhdwg moix bi sauq- moh cungj aeu dawz bya bae, gijneix seiz iq daxboh Daegveih couh son de lo. De siengj hwnj daxboh, hoeng daxboh gaenq lizbae cib lai bi lo. Ngoenzneix bae sauqmoh, de itdingh naeuz hawj daxboh, de gaenq aeu yah lo, baenzgya lo, mbouj geijlai nanz couh yaek miz lwgnyez…… Siengj daengz neix, de vaiqdang guh byaek, doq caeuq mehyah de bae sauq moh daxboh.

Rum heuswdswd, gonywj youq gwnz aen moh daxboh loegsausau. Daxboh de ninz youq ndawde gaenq miz cib lai bi lo, de ndaej caeuq byawz gangj vah? Youh caeuq byawz gwn laeuj eu fwen? Seiz iq, daxboh Daegveih ciengzseiz daeq gyaeujndoq hawj Daegveih, ciengz cup aen naj Daegveih. Seizneix, couh lienz gaiq sigbei ndeu hix mbouj ndaej laeb hawj daxboh, de ndawsim dauqdaej mbouj gvaq eiq geijlai. Yienghneix, Daegveih aeu fagliemz gvej gorum gwnz moh, couh lumj lij iq daxboh hawj de daeq gyaeuj nei.

Godaih caeuq go’ngeih daeuj daengz lo, saujdaih、saujngeih hix daeuj lo. Gyoengqde baez daengz, sien lwnhgangj giz diegmoh daxboh baez ndeu. Saujdaih naeuz:“Bi’gvaq ranz gou dai bae cib lai duz mou, gou bae cam yahsien, yahsien naeuz diegmoh daxboh mbouj hab lungzmeg, siedvi lauxdaih.” Saujngeih hix ciengj gangj:“Mboujdan vi mwngz, bi’gvaq duz cwz gou youq gwnzbya doek dat dai, ranz gou ceiq noix sied bae fanh lai maenz, baenzneix yawj daeuj aen moh neix……” Daegveih cuengq roengz fagliemz, aeu genbuh uet hanh naeuz:“Saujdaih, bi’gvaq dwg mouraq Feih- couh, daengx guek cungj doxdoengz. Saujngeih naeuz duz cwz de dai, dwg mbwn guh mingh nanh, youz mbouj ndaej vunz, cij aeu raeuz ndang cangq couh baenz lo.”

“Ndang cangq? Ciuq yienghneix roengzbae, ngoenzlawz vunz hix deng bae, gou cungj baenzneix simyou.” Saujdaih doq gangj.

Godaih、go’ngeih cij guenj diemj yieng gingq laeuj, cungj mbouj gangj vah. Mehyah Daegveih gangj coenz ndeu:“Danghnaeuz daihgya cungj naeuz aen diegmoh mbouj baenz, Daegveih, raeuz senj aen moh daxboh bae giz raeuz.”

“Sou gamj!” Godaih、go’ngeih hat gangj.

“Gaej fatheiq, de cij dwg gangj- gangj ndwi.” Daegveih naeuz.

Haemhde, Daegveih heuh godaih、go’ngeih bae ranz de gwn haeux, swnhbienh doxyaeng hawj daxboh laeb sigbei. Daegveih naeuz song daeggo:“Bi’gvaq gou youq Gvangjdungh geiq haj cien maenz hawj sou guh sigbei, seizneix guh ndaej baenzlawz yiengh lo?”

（1）