原文 （Hoh saw daj 《Mungswj·Gauswj Laj》 aeu）：

故天将降大任于是人也，必先苦其心志，劳其筋骨，饿其体肤，空乏其身，行拂乱其所为，所以动心忍性，曾益其所不能。

译文：

Sojlaiz aen mbwn yaek aeu cuengq diuz rap naek roengz gwnzndang moux boux vunz bae, itdingh aeu sien hawj de sim’eiq nyapnyuk, ndangndok in naet dwgrengz, hawj de dungxiek, souhgungz souhhoj, siengj guh gijmaz saeh cungj mbouj ndaej hab’eiq, yienghneix daeuj gikleih gij simceiq de, hawj singcingz de dingjgeng maenh’ak, demgya gij naengzlig de mbouj caengz miz gvaq haenx.

（宾阳县 Lingz Sauvaz/凌少华）

Couhdwg naeuz mehmbwn yaek dawz gijmaz saeh hung cuengq hawj boux vunz neix, itdingh hawj aen sim de souh haemzhoj, hawj gij nyinz gij goet de baegnaiq, hawj de cimz daengz feih iek, hawj de hojndoq, guh yienghyiengh cungj mbouj baenz, hawj aen sim de saenqdoengh, bienq ndaej miz naihsim, hawj de yienghyiengh cungj guh baenz guh ndaej.

（平果市 Liengz Couhli/梁洲利）

Ndigah mehmbwn yaek aeu gij rapnaek hawj boux vunz ndeu, bietdingh hawj ndawsim de geujin baegnaet, hawj de ndangndok naetnaiq, deng iek gwnhoj, daengx ndang byombyangq, hawj de hoj dwk guh maz cungj mbouj swnh, aeu aen fuengfap neix ma saenqdoengh ndawsim de, hawj gij singcingz de bienq ndaej nyangqnyat gengrengz, gyalai gij doxgaiq de mbouj miz haenx.

（西林县 Vuz Sanglanz/吴尚兰）

Sojlaiz baihgwnz yaek hawj byawz dang hung dang ak, itdingh hawj de doeknaiq simdot gonq, youh caiq hawj de ndok in dungxiek, ndang ngveiz ndang naet, guh yienghlawz yiengh de cungj guh mbouj baenz. Baenzneix couh doengh daengz aen sim de, hawj de simgeng simnet, bienq ak lailai bae.

(平果市 Banh Liginz/潘莉琴)

Ndigah mbwn yaek hawj de rap daihsaeh, itdingh sien hawj de sim souh nyap, ndang souh naet, dungx souh iek, hawj de gizgiz souhhaemz souhhoj, seizseiz mbouj swnhsim. Aeu gij neix bae gik gij simceiq de, yienghneix singcingz de cij bienq ndaej engq gengrengz, gij naengzlig bonj- faenh de caengz miz haenx cijndaej demgya.

（平果市 Loz Ginhhungz/罗金宏）

Ndigah, aen mbwn yaek dawz sawjmingh hung naek gyau hawj gij vunz yienghneix, bietdingh sien hawj sim de indot, ndangndok naetnaiq, ra mbouj ndaej gwn, ndangdaej byomnyieg, cimz gvaq gij haemzhoj saedceij, guh saeh mbouj swnh. Yienghneix cijndaej gik de laebceiq, doeklaeng bienq ndaej engq giengiengz, dungxcaiz yied daeuj yied maenh’ak.

（武鸣区 Vangz Cinhgiz/黄春菊）

Aen mbwn yaek cuengq rapnaek hawj boux vunz ndeu, couh itdingh aeu de gwnhaemz gwnhoj, sim’in dungx liengz, ndangndok gwnrengz, hawj de nyaenx ndaej dungxiek, naengnoh byombyangq, roxnyinh gungzhoj dwgrengz, guhsaeh loeklaklak, yungh gij banhfap neix hawj ndawsim de gikdoengh ndang saenz, guh maz saeh aeu nyaenx ndaej heiq, hag ndaej gingniemh gaxgonq caengz hag ndaej haenx.

（武宣县 Lungz Gingyiz/龙庆煜）

Ndigah, mbwn yaek hawj boux neix dawz rapnaek, itdingh sien hawj simcingz de nyapnyuk gonq, hawj ndoknyinz de naetnaiq gonq, hawj de souh dungxiek gonq, souh hojnanz gonq, guh hong loengluenh gonq, yiengh- neix ndaej hawj sim de souh daengz saenqdoengh, hawj singcingz de gietsaed gengrengz, demgya gij caiznaengz mwhgonq caengz miz haenx.

（右江区 Lingz Siuyangh/凌秀香）