Bouxminz Minzcuj Goek Daengz Byai

人民民主全过程

Bouxminz danggya ndaej guhcij(cawj),

Cidu dijhi ceiq habsim;

Cungfaen fazveih naengzdoenghsing,

Diuqdoengh bouxminz rengz haicaux.

Bouxminz minzcuj goek daengz byai

Hawj vunz sim hai gangj vah swenz;

Bouxminz eiqnyienh ndaej daejyienh,

Bouxminz gangj sienh youh gangj caen.

Gunghnungz lenzmungz ceiq habhoz,

Bozsoz cidu siu bae mbwn;

Bouxminz minzcuj daeuj conhcwng,

Dangj raeuz caencingq vih bouxminz.

Minzcuj senjgij yawj simswh,

Minzcuj gezcwz gangj vahbengz;

Minzcuj gvanjlij doengz okrengz,

Minzcuj genhduz daeuj yungh gienz.

Daegsaek Cungguek cix ndei lai,

Seiq gaiq neiyungz ak dangqmaz;

Bouxminz miz gienz daeuj camgya,

Nda gvangq sizcenj lij miz dieg.

Gwnzmbwn ndaundeiq heux ronghndwen,

Vahoengz buenx mbaw youq biengzdih(deih);

Cukmaenh minghyinh gungdungzdij,

Lij guh minzcuz daih doxgiet.

Minzcuj cidu miz baujcang,

Diuzloh hai gvangq lai miz rengz;

Lai dieg lai caengz cix lai bengz,

Gunghvei fulenz gungcinghdonz.

Saedhengz lai dangj daeuj hozcoz,

Dungjcan gunghcoz gwzgiz daih;

Vid gen hwnjdaeuj guh dahraix,

Minzcuz giengzdaih ndaej fukhwng.

Cienzmienh Eifap Daeuj Ceihguek

全面依法来治国

Eifap ceihguek onj byadah,

Daengxbiengz gwnzlaj lumj buenz geiz;

Eiciuq yenfaz maenh mbouj beij,

Ciengz ceih cij ndaej onj bae nanz.

Genhciz Cungguek loh daegsaek,

Fapceih hwnjmbaek byaij daih loh;

Eifap hingzcwng guh ndei soh,

Lumj ci ciuq loh hwnj gauhsuz.

Miz fap couh yaek ciuq fap hengz,

Caep fap aeu yiemz famh cix loih;

Lwgvuengz caeuq minz doengz famhcoih,

Ciuqyiengh deng loih mbouj gangj ndwi.

Gohyoz laebfap ceiq youqgaenj,

Yunghrengz doicaenh daeuj saedhengz;

Cwngfuj ciznaengz yaek cienjbienq,

Saedyienh yauqlwd rengzgoengsaenq.

Ceih guek onj biengz fazciva,

Couh dwg yenfaz ceiq youqgaenj;

Lumjbaenz mwhgonq vahmiengmaenj,

Vugungh aij(yienznaeuz) haenq mbouj miz yungh.

Doeksaed swhfaz cwzyinci,

Dingh miz cosih guh coihgaij;

Fapceih gensez yaek gyavaiq,

Saehcingz gaiqgaiq cij guh baenz.

Faplwd gvanhnen yaek miz caen,

Fapceih cingsaenz yaek hengz ndei;

Daengx biengz bouxminz daeuj hanvei(soujndei),

Guekgya youq ndei minz cij onj.

Swhfaz goengbingz caeuq cwngyi,

Yenfaz cix ndi(ndei) lumj gaiq cik;

Lumj caenghgoengbingz ceiq cix lik(lengj),

Mbouj hawj de mbit saek di nauq.

Vwnzva Gagsaenq Youh Gaggiengz

文化自信又自强

Vwnzva gagsaenq youh gaggiengz,

Vwnzva loh riengz roencingq byaij;

Vwnzva hoenghvuengh vunz ceiq maij,

Vwnzva giengzdaih guek cij hwng.

Nezwj sij ok cozbinj ndei,

Sawj vunz gyaez guek youh gyaez ranz;

Heuhsingj gunghnungz cienbak fanh,

Bouxboux sim van bae hoenxciengq.

Hai duj va ndeu mbouj dwg cin,

Bak va hai rim cij ndeimaij;

Yaengx sang mbawgeiz riengz dangj byaij,

Vwnzva daihdaih ndaej fukhwng.

Beijfwen Guengjsae ceiq doengh vunz,

Beij hingq hab’unq eiqsei doh;

Feihyiz vwnzva yaek baujhoh,

Conzdungj doxhoq(gaiq) yaek swnjcienz.

Beijfwen vwnzva yaek fazcanj,

Mbouj dwg bak gangj gwnzceij raiz;

Haenqrengz ra loh guh dahraix,

Mbouj ndaej ngedngaih nguh seizgan.

Cienzboq Cungguek singyaem ndei,

Yinhyoz dawz bae dang gaiqdingj;

Beijfwen cap hwnj diuzfwed gim,

Hix ndaej hwnj mbin bae gwnzfwj.

Ngoenzneix byaij haeuj seizdaih moq,

Sim gyaez guekcoj yiengq daengzcog;

Gujli lai miz cozbinj ok,

Buet hwnj gozci daih vujdaiz.

Cungguek gojgaeq yaek gangj ndei,

Daujyang seizseiz mbouj doenghyiuz;

Fwen doj hix ciengq singyaem biu,

Vah doj hix riuz bae fanhleix.

（3 sat）