Vihliux hawj vunzlai gak minzcuz dingq ndaej rox geiq haeuj uk, gih raeuz gak dieg minzcuz foenfoen aeu vah dangdieg vunzlaiz rox dingq、aeu heiq dangdieg vunzlai gyaez yawj daeuj lwnhgangj gij cingsaenz Ngeih- cib Daih Dangj raeuz.

11 nyied 12 hauh, Dunghlanz Yen Vwnzva Gvangjcangz singfwen goksadsad, daengx yienh 14 aen yanghcin 50 boux canghfwen comz daengz neix eufwen lwnhgangj gij cingsaenz Ngeihcib Daih Dangj raeuz, daj neix hainduj guh roix hozdung lwnhgangj gij cingsaenz Ngeihcib Daih Dangj raeuz. Gij fwen Cuengh haenx vunzlai gyaez dingq, cungj comz daeuj dingq fwen.

Mboengqneix, Vanzgyangh Mauz- nanzcuz Swciyen Dunghhingh Cin Dangjveij、Cwngfuj haeuj daengz mbanj Yauzcuz bae, aeu vah Yauzcuz lwnhgangj gij cingsaenz Ngeihcib Daih Dangj raeuz. Yahlaux Yauzcuz Gangh Siulanz gaenq ndaej 82 bi, de hix daeuj dingq lwnhgangj, de naeuz:“Siz Ginbingz cungjsuhgi lingjdauj ndaej ndei, hawj dou ndaej gwn ndei daenj ndei.”

Mboengqneix, Cunghsanh Yen youz yen vwnzva’gvanj cujciz heiq- duenz haeuj mbanj lwnhgangj gij cingsaenz Ngeihcib Daih Dangj raeuz. Haemh 11 nyied 10 hauh, gyoengq yenjyenz youq Cinghdangz Cin Yungzsuij Cunh yienjheiq, yienj dwk caenlili, gyoengq vunzmbanj daeuj ngonz haenx bekfwngz mbouj dingz. Vunzmbanj Vuz Haijoz naeuz:“Doenggvaq yawj heiq ndaej rox gij cingsaenz Ngeihcib Daih Dangj raeuz, dou raen dangj lingjdauj ndei lai lo, dou ngoenzcog gwndaenj rox engq ndei hw.” Ciuq cam rox, aen yienh neix yaek cujciz heiqduenz youq yanghcin yienjok 12 ciengz.

(Veiz Vanjswh Veiz Nwngzlinz Cinz Swjyij Lij Vwn Loz Vanbangh/韦宛孜 韦能林 覃子苡 李问 罗万邦)