Bineix cibnyied cibroek hauh,

Cungguek yiednauh mbwn rongh’angj;

Veijda Cungguek Gungcanjdangj,

Youh miz saeh angq youq gwnzbiengz.

Gimcik seizciet va hai hoengh,

Saenzcou doenghdoengh vunz sim hai;

Angqhoh Dangj Raeuz Ngeihcih Daih,

Guengjsae fwenhaij langh fubfab.

Dangj Ngeihcib Daih youq Ging hai,

Siusik ndeilai cienz roengzdaeuj;

Youq naj densi raeuz caez gaeuj(yawj),

Eu fwen hwnjdaeuj caen angqyangz.

Baekging Yinzminz Daveidangz,

Daibyauj hwnjcangz(ciengz) angqvauvau;

Dangj cungjsuhgi guh baugau,

Vahgawq dijbauj lumj gim rongh.

Baugau coenzcoenz raeuj haeuj sim,

Daibyauj yied dingq yied najhai;

Bouxboux ndaej daengz gujvuj lai,

Bek fwngz yiengj hai lumj byaj raez.

Gyoengqraeuz doxcomz yawj cizbo,

Yied yawj simhoz cix yied maij;

Raeuz miz saenqsim riengz dangj byaij,

Mbanjcuengh fwenhaij goksasa.

Youh byaij lohmoq bae mbouj dingz,

Dangj vih bouxminz caux fuk lai;

Haenqrengz gvancez Ngeihcib Daih,

Seiqfueng betbaih loh ronghsag.

Cunghyangh ciuhai Ngeihcib Daih,

Yaeng saeh seiqbaih hwng biengz raeuz;

Lumj ci haeuj camh bae gya youz,

Youz cuk gyoengqraeuz youh hwnjdin.

Mbawgeiz daegsaek yaengx hwnj sang,

Daihhoih dingh gang dingh cawjdaez;

Youq seizdaih moq raeuz doengzcaez,

Haenqrengz doxbae hai buenz moq.

Loh cingq cauxmoq cij guh baenz,

Laebdangj cingsaenz ndaej hungzyangz;

Genhciz gagsaenq caeuq gaggiengz(ak),

Lajmbwn gwnzbiengz ok yienghmoq.

Cunghvaz Minzcuz geij cien bi,

Ngoenzneix lizsij youh hai moq;

Sawjmingh gvanghyungz youh hoengzoq(hungmbwk),

Rap naek byaij loh bongh baenaj.

Mbouj lumz simnduj caeuq sawjmingh,

Roengzrengz sim dingh bae cengqaeu;

Giemhaw onjsim guh fwndou,

“Sam aen dingh aeu” mbouj ndaej lumz.

Aen Seizdaih Moq Daih Bengwz

新时代的大变革

Dauqngeix haj bi yawj cib bi,

Fwnrumz fozviz(ci haenq) ciencien fanh;

Mienhdoiq gihyi caeuq diuhcan,

Naengh ruz onjdanqg youq gwnzhaij.

Haj bi doxdaeuj mbouj bingzciengz,

Lajmbwn gwnzbiengz saehhung lai;

Dangj daeuj lingjdauj dawz loh hai,

Youq gwnz seiqgyaiq miz najmienh.

Gwnzhaij hai ruz Dangj dawz dox,

Hengzguh canloz ndaej hwnjmbaek;

Giendingh Cungguek loh daegsaek,

Ngiengx gyaeuj enj aek bae mbouj dingz.

Laebguek onjdingh guh saeh haenq,

Cienzmienh doicaenh fap ceih guek;

Gwnzbiengz gizgiz ndaej onjduep(dup),

Guekgya onjdingh minz angqyangz.

Genhciz bouxminz guh cungsim,

Daengx guek bouxminz ndaej minzcuj;

Dangj vih bouxminz maeuz hingfuz,

Gaij ndei guh ndei gwndaenj moq.

Sengmingh ceiq sang minz ceiq sang,

Gangqhoenx sinhgvanh yw bingh sieng;

Doenghdaih cing lingz souj daejsienq,

Vunzlai caep ciengz fanh leix raez.

Dauqngeix haj bi caen mbouj sung(soeng),

Cingcinj duetgungz gunggenq hoj;

Cungguek daegsaek seizdaih moq,

Siujgangh swnghhoz haeuj daengz ranz.

Gaijgwz hailangh raen cingzyauq,

Giekdaej hunglaux(hung) youh onjmaenh;

Baenzgoeng gingniemh vunz caez haenh,

Youq mwh ceiq haenq ok fap moq.

Swnjciep fwndou dwg sawjmingh,

Gij vah dangj dingh bouxboux maij;

Yaengx sang mbawgeiz riengz dangj byaij,

Yaek guh seizdaih bouxgyaepmoengh.

Swnjciep fwndou dwg haenqdingj,

Lumj vaiz buekmingh dawz ek rag;

Guh saeh cauxnieb dang bouxak,

Hojnanh hix cak(cengq) bae guh caez.

Ciepswnj fwndou dwg genhciz,

Couh lumj raemx rih(roh) conq ndaek rin;

Couhcinj saetbaih mbouj gamsim,

Daisanh ap dingj mbouj fug saw.

Ciepswnj fwndou dwg guhhawj,

Bae daengz gizlawz hix hai sim;

Seizseiz guh saeh vih beksingq,

Hawj biengz riuzmingz cienfanh daih.

Gohyoz vanzcingj daeuj naemjngeix,

“Haj vih it daej” cungj bugiz;

“Seiq aen cienzmienh” daeuj dingh dij(daej),

Fukhwng miz ngoenz baenz yienhsaed.

Gvancez hwngfat leixniemh moq,

Gwih max hwnj loh buekrikrik;

Canjciz mauhgvaq bakfanh ik,

Bouxlaeng nyengh dik hwnjbae gonq.

Caux ruz daiq vunz mbin hwnj mbwn,

Youq gwnz ronghndwen ra duzbyaj;

Sae dienh doeng soengq lienz dienyah,

Diuzgiuz cix gyaq namzbaek caez.

Cinwngz dingh vih hoemq bae rim,

Bwzdouj veisingh daeuj daujhangz;

Sinhben gisuz duzbo gvangq,

Fuengzbingh yimyauz daeuj ciepcungj.

Cungguek daegsaek dingh diuh bengz,

Cungqvunz miz rengz yiengq naj bae;

Guekgya dijhi guh ndei caez,

Naengzlig ceihleix daih daezsang.

“It rangh it loh” geiz mbinfo,

Gozci hozcoz bingzdaiz hung;

Doengzcaez ndaej leih hwngfat mungj(hung),

Baengzyoux riunyumj guh seng’eiq.

Sevei baujcang dijhi lengj,

Bouxlaux ndaej ciengx miz ranz youq;

Ngoenzngoenz vanzlij miz souhaeuj,

Gwn noh gwn laeuj riu cwxcaih.

Raemxloeg bya heu dwg gimngaenz,

Swnghdai leixniemh haeuj sim dawz;

Hidungj gunghcwngz daeuj ceiqcawq,

Raemx engq saw le mbwn engq lamz.

Caihaih hungloet miz yi’an,

Gvancez guekgya ancienz ndei;

Sauq laep sauq yak guh hwnjbae

Cungguek biengz ndei youh bingzonj.

Majlez Cujyi Cunghgozva

马列主义中国化

Daegsaek swhsiengj ceiq habhoz,

Dacwng fanghloz daeuj haenqca(cagaenj);

Majlez Cujyi Cunghgozva,

Onjbiengz ceih gya goekgaen maenh.

Majlez Cujyi Cunghgozva,

Ra cinj guekcingz caiq hwnjdin;

Gaenxguh haenqguh bak bi rim,

Faex bungz seizcin va hai lengj.

Cungguek daegsaek swhsiengj hung,

Haedsim neiyungz lumj feiz oq;

“Cib aen genhciz” lumj bauj moq,

“Cib aen mingzgoz” ronghsagsag.

Lijlun damqra caeuq cauxmoq,

Hai gvangq daihloh bae hwnjdin;

Veizvuz cujyi daeuj benqcingq,

Dwg luengz(doengz) dwg gim baengh sizcenj

Sizcenj ciengxlwenx mbouj dingz din,

Genhciz soujcingq daeuj cauxmoq;

Daujyang vwndiz lumj dawz dox,

Bouxminz habhoz goekgaen maenh.

Bouxminz ceiq sang yaek genhciz,

Duzbya mbouj liz raemx ndaw dingh(daemz);

Dangj caeuq Bouxminz gungh minghyinh,

Mbouj hawj heuj vingq hangz youh vauq.

Bouxminz nyienhmuengh ciengzseiz gangj,

Bouxminz lizcangz yaek genhciz;

Bouxminz dajcaux aeueiq ndi(ndei),

Bouxminz civei(coengmingz) dwg doenghlig.

Cidu gagsaenq sim vunz maenh,

Lijlun gagsaenq cingsaenz sangj;

Vwnzva gagsaenq ok hanzyangj,

Lohgvangq(diuzloh) gagsaenq bongh baenaj.