11 nyied 7 hauh daengz 8 hauh, Bwzswz Si Sihlinz Yen guh buek hozdung geiqniemh ndaej swciyen dakdaih 30 hopbi. Vunzlai gak minzcuz sim’angq yawj langhbaij、 ngonz vwnzyi biujyienj、cimz doxgaiq ndeigwn daengj. Neix hawj vunz haeujlaeg roxnyinh, miz cwngcwz minzcuz Aendangj ciuqrongh, gij ginghci sevei vwnzva gak hangh saehnieb Sihlinz cungj guh ok cingzcik hungmbwk, vunzlai gak minzcuz caemh caezhoz huzndei、buekguh baenaj.

11 nyied 8 hauh daengz 9 hauh, Bwzswz Si Lingzyinz Yen caemh guh hozdung geiqniemh ndaej swciyen dakdaih 30 hopbi. Aen hoih yinhyoz baijok minzsug vwnzva、dwzcanj gingjsaek; doengh mbaw doz laeng aen langhbaij cingcik yienh’ok hawsingz lajmbanj bienqvaq hungloet; aen hoih codanz maeuzveh gij roen moq fuengfap moq doicaenh Lingzyinz youq seizdaih moq hwngfat youh ndei youh vaiq, langhbaij gij yiengh moq caeuq hoenghfwd Lingzyinz.

（Cau Vujlinz/赵武林 Liengz Cingz/梁 晴 Veiz Yingjcinh/韦颖琛 Vangz Yinz/黄 云）