Roek

Seizneix, meh Yez Siu ngamq bae raemj oij sou hong dauqma lo.

Dauq sahfaz moq dahlwg cawx, gaenq baij ndei lo. De roxnyinh ndawranz aenvih dauq sahfaz moq neix cungj bienq ronghsag liux lo!

Seizde, de gingqyienz lumz ndang baeg, sikhaek bae cimyawj dauq sahfaz moq neix lo.

Sawqmwh, de fwt raen doiq “lungzfung” gwnz sahfaz gig najsug. Daegbied dwg gij fap gaek neix, ciuh vunz de cungj nanzlumz.

De angq haenh dahlwg naeuz:“Dahsiu, mwngz lij caen rox genj, dauq safaz neix wnggai dwg Lij saefouh mizmingz gwnz haw gaek okdaeuj ne! Dahlwg gou da caen soem!”

“Meh gou, gou hix dwg dingq lauxbanj gejgangj le cij genj aeu ne. Siengj mbouj daengz caen dwg huq ndei bw!” Yez Siu raen daxmeh haenh mbouj dingz bak, sim angqvauvau, doq uet hanh najgemj, doq riu naeuz.

Raen meh lwg de baenz angq, Lij Swjging ndawsim hix vuenheij raixcaix. “Mehsimj, mwngz caen rox huq bw! Neix couhdwg Lij saefouh guh lo, caen dwg huq ndei!” De nyaenx mbouj ndaej cab bak gangj.

Meh Yez Siu roxnyinh aen sing gangj vah neix gig sug rwz. De ngiengx da baez yawj—— Aya, daegmbauq neix gingqyienz hix miz di najsug……

“Mwngz dwg byawz?” Meh Yez Siu geizheih cam de.

“Mehsimj, gou couhdwg daeglwg Lij saefouh lo! Lauxbanj caeuq boh gou aeu huq, youh cingj gou soengq huq, mbouj hawj bungq vaih gij gyasei.” Lij Swjging riu gangj.

“O, yenzlaiz dwg yienghneix.” Yez Siu cungjsuenq mingzbieg de vihmaz baenz ndatsim bang soengq huq, laxlawz dwg aenvih aeu bauj mingzdaez gyasei ranz de ha.

“Gvaiq ndaej……” meh Yez Siu yaek gangj youh mbouj gangj, sim’angq lumj naemj maz nei.

“Mehsimj, sou yietnaiq lo, gou baema gonq nw.” Lij Swjging ndwn hwnj bae vuenh haiz, yaek baema lo.

“O, mbouj ndaej bw! Bouxcuengh raeuz aeu gangj laex. Ngoenzneix mwngz bang dou dwg daihsaeh, aeu gwn ringz le caiq baema ha. Muengh mwngz gaej yiemz ranzgungz dou bw.” Meh Yez Siu gipmuengz iucingj.

Yez Siu hix bouj gangj:“Dwg vei, dwg vei, daj cang huq、soengq huq、gej huq, itloh cungj baengh mwngz, sinhoj lai lo, cingj mwngz louz roengzma gwn donq haeux caiq baema!”

Lij Swjging rox doi mbouj gvaq, cijndei lingxcingz gwn haeux ringz.

Song meh lwg nyaengq hwnjdaeuj, boux gaeb gaeq, boux coemh feiz, gaenjgip guh dajcawj……

Lij Swjging hix cagaenj bae bang genj byaek、swiq byaek、cauj byaek……

Yez Siu youq henz cauq coemh feiz, Lij Swjging dajcawj din fwngz gig vaiq, daj ndawsim haenh de lo——ndawmbanj, cungj dwg mehmbwk haeuj bakcauq, noix raen bouxsai guh dajcawj……

Lij Swjging hix laeglemx haeujsim yawj Yez Siu. De rox dah neix simsoh gaenxguh…… Siengj daengz neix, de roxnyinh gwnz naj ndatfwdfwd lo.

Caet

Seizgan gvaq ndaej gig vaiq, baez yaepda ndwencieng couh gvaq buenq lo.

Mboengq ndwencieng, Yez Siu coh beix- nuengx caencik baiqnienz gvaq le, couh youq gij singbauq nauhyied cibngux ndawde sousib hingzlij, ngoenz daihngeih yaek okbae dajgoeng lo.

Ndwencieng cibroek banhaet, Yez Siu gwn geij gaemz haeux, couh aemq hwnj daeh hung, biek daxmeh caeuq daegnuengx okdou lo. De lij aeu byaij caet bet leix cij ndaej dapci hwnj ndawsingz, daengz singz youh aeu cienj ci.

Youq mwh de cienq ndang seiz, raemxda hix doekdetdet roengzdaeuj lo.

Danghnaeuz mbouj dwg bae ra cienz ciengx ranz, byawz nyienh daengx bi cungj youzlangh diegrog ne?

Mbouj geij nanz, Yez Siu ciep ndaej denva Lij Swjging. Hawj gij swnghhoz dajgoeng de miz di saek, miz muengh lai lo.

Daj seizde hwnj, song bouxcoz youq ndaw dienhvah gangjgoj, song aen sim yied byaij yied gaenh.

Mbouj rox mbouj nyinh, bi lai couh gvaqbae lo, song bouxcoz cungj siengj ndei lo, baezneix maranz gvaqcieng seiz, couh naeuz vunz ndaw ranz songde damzyoux. Danghnaeuz song ranz bohmeh cungj habhoz, couh dajsuenq baenzranz lo.

Lij Swjging naeuz bohmeh de cingq coi de baenzranz, cijaeu meh Yez Siu doengzeiq, saeh neix couh baenz lo.

Yienghneix, couh miz saeh hainduj haenx lo.

Bet

Vahnaeuz meh Yez Siu yawj dahlwg boengh dou ok rog bae, ndawsim hix gig mbouj onj. Hoeng, dah neix cungj aeu ciepsouh cij ndaej, mboujnex, couh hawj vunz riu baenz seiq bae lo.

Dahlwg daj iq couh gig roxsoq, sim’in swhgeij ngoenznaengz cungj gungj hwet youq ndaw geij moux reih oij sinhoj lai, lai bi daeuj cungj boux dog youq baihrog dajgoeng ra cienz hawj daegnuengx doeg saw. Meh Yez Siu naemj: Ai! Danghnaeuz seizde, gou mbouj rox Lij saefoux geijlai ndei ha, seizneix couh mbouj yungh haih Dahsiu baenzneix hojsouh lo!

Siengj daengz neix, meh Yez Siu sim’in ndaej raemxda doeksubsub.

Daj de hwnj, Yez Siu okrog bae dajgoeng geij bi cungj mbouj dauqma gvaqcieng lo. Hix itcig caengz damzyoux gvaq.

Meh Yez Siu moix baez dwk denva cungj coi de ra youx baenzgya, Yez Siu cungj mbouj oksing.

Moix bi haemhndaep, meh de cungj yawj coh bakmbanj, de gig muengh yawjraen aen ngaeuz Dahsiu daj ndaw saekhaemh byaij haeuj mbanj haeuj ranz.

Yez Siu mbouj mingzbeg, Lij Swjging vunz ndei, daxmeh hix haengj de, vihmaz mbouj doengzeiq ni? Ndawde itdingh miz laizyouz.

Miz geij baez caeuq daxmeh gangj denva, de cungj siengj haibak cam mbat he. Hoeng de youh lau loengh daxmeh raemxda lae mbouj dingz.

Caiq gangj, geij bi neix, youq baihrog raen saeh lai lo, hix menhmenh siengj doeng lo: Cijaeu vunzranz swhgeij bouxboux ndangdaej ndei, saedceij gvaq ndaej bae couh baenz lo, haq mbouj haq vunz hix mbouj youqgaenj. Daxmeh ciuh neix dwgrengz lai, gawqyienz daxmeh mbouj doengzeiq, couh swnh sim de ba. Yienghneix, de couh gietdingh cuengq roengz duenh ganjcingz neix.

Doeklaeng, de naeuz Lij Swjging, simsingq songde mbouj ngamj, heuh de lingh ra vunz baenzranz lo. Hix mbouj caiq lienzhaeh de lo.

Vahnaeuz Lij Swjging, de itcig sim venj Yez Siu, ndigah hix cungj mbouj damzyoux gvaq.

Yawj daeglwg yied daeuj died hung, bohmeh hix simgip lumj feiz coemh.

Bohmeh de ra goek caz daej cam Lij Swjging vihmaz cungj mbouj siengj aeu yah? De cij naeuz daxmeh:“Gou gaxgonq couh miz dahyoux lo. Hoeng, daxmeh de mbouj doengzeiq, dah de okbae dajgoeng, doeklaeng couh mbouj caiq lienzhaeh gou lo. Gou dajdingq le, de seizneix hix itcig mbouj damzyoux gvaq. Meh, cawzliux de, gou byawz cungj mbouj aeu!”

Gvaqlaeng, meh Lij Swjging cij dajdingq rox, daxmeh dahsau de couhdwg ngeihcib bet bi gaxgonq dah “nyiengh” swhgeij.

De mingzbeg vihmaz mbouj doengzeiq dahsau de caeuq lwg bonjfaenh damzyoux lo, mwhde bonjfaenh naeuz caeuq Lij saefoux daj iq couh youq gwnzhaw, caez majhung, doxgyaez doxdaengh, heuh de gaej daeuj gaz…… Meh Lij Swjging naemj: Gou itdingh bae nyinhloek cij ndaej!

Vihliux nyinhloek, doengzseiz, hix gouz de hawj song lwgnyez ndaej baenzranz, vuenyungz gvaq saedceij, meh Lij Sijging couh yawj ngoenzndei, banh rap huqnaek he, bae ranz Yez siu.

Seizneix, song lwgnyez couh yaek baenzgya lo. Yez Siu caeuq Lij Sijging cungj siengliengz ndei lo, doxaeu cingj hek seiz, couh ciuq gij fungsug Bouxcuengh bonjdieg daeuj guh.

Meh Yez Siu doq cingjleix gyaqcang Bouxcuengh dahlwg, doq unqswnh yawj mbaw siengq dahlwg caeuq lwggwiz, sim mboeng lumj faiq.

Gij nit seizdoeng gaenq gvaq, gij raeuj seizcin yaek daengz. Ngoenz dahlwg okhaq couh dingh youq ndaw sam nyied seizcin. Rog cueng, gij varenh cingq baenzcaz baenzcaz venj rim gwnz nga, aeujgywggywg, ronghsagsag.（2 sat）