Gaiq Daihhaj Cungguek Gozci Cingouj Bozlanjvei 11 nyied 5 hauh daengz 10 hauh youq Sanghaij banh. Gicej cam Swcigih Sanghvudingh cix rox, gaiq bozlanjvei neix, Gvangjsih ndalaeb le aen gvanj cwngzciu hai- langh caeuq aen gvanj binjbaiz geq caeuq feihyiz.

Ciuq vunz lwnh, 11 nyied 5 hauh, Aen Gvanj Langhbaij Cwngzciu Hai- langh Gvangjsih cingqsik hai gvanj, aen gvanj langhbaij neix gyonjcomz baijok gij cwngzciu Gvangjsih hai- langh lai bi doxdaeuj cix aeundaej haenx, aen gvanj neix guh’ok gij yiengh miz daegsaek Gvangjsih noengznwd. Gaiq denswjbingz baih- rog gvanj langhbaij aeu byaraemx Gveilinz guh diuhgoek, caiq gya gaiqranz yiengh vacuhginj, baihndaw gvanj guh langhbaij ndaej hawj vunz baengh dayawj 3D、daejniemh VR、canggya ciuq gangjgouj roujhwnj cangndei doxgaiq daengj gij gohgi ciuhneix, hawj bouxyawj miz yiengh daejniemh linghgag ndeu.

Aen Gvanj Langhbaij Binjbaiz Geq Caeuq Feihyiz Gvangjsi langhbaij le gij maezvunz gagdog conzdungj caeuq gij hwngfat cwngzgoj moq binjbaiz geq caeuq feihyiz Gvangjsih. Aen gvanj neix najdieg ciemq 180 bingzfanghmij, nda miz gih langhbaij caz Gvangjsih、gijgwn Gvangjsih、laeuj Gvangjsih、dinfwngz Gvangjsih、yw Gvangjsih, gungh miz 33 aen giyez binjbaiz geq caeuq feihyiz camgya langhbaij.

（Luz Yinhnanz）