Ngoenzneix dwg ngoenzndei, Augouj haeuj ranzmoq lo!

Augouj loq fangzhwnz hix siengj mbouj daengz, swhgeij lij ndaej youq ranzmoq! Bonjlaiz Augouj nyinhnaeuz swhgeij baenz ciuhvunz couh youq ndaw lueglungh neix gvaq ciuh lo, couh lumj Aubet Aucaet nei, baengh bya gwn bya, youq ndaw namhhenj caeuq geh rin ra gwn, geq le couh deq daengz ngoenz haem roengz ndaw- namh bae.

Ndawranz Augouj hoj, geq le guh hongnaek mbouj ndaej lo, miz daeg- lwg ndeu, bineix cungj ndaej seiqcib bi lo, lij caengz aeu yah dem.

Bi’gvaq, youq bakdou ranznaez Augouj gwnz de, couh ding gaiq baiz “laeb dangj laeb gaj”ndeu. Augouj mbouj roxyiuj neix miz maz yungh. Bangfuz ganbu Couh cujyin naeuz: “Miz gaiq baiz neix le, gvaqlaeng mwngz couhdwg gaiq naz cwzyin gou lo, mwngz mbouj ndaej duetgungz, gou couh mbouj soubing!”

Augouj dingq le mbouj roxyiuj:“Gou duet mbouj duetgungz, caeuq mwngz miz maz gvanhaeh ne? Mwngz mbouj dwg lawx gou ba!”

Couh cujyin dwg boux cujyin ndaw yienh, dwg boux vunz biq gaemz myaiz youq gwnz dieg, gij dieg cungj yaek doek roengzbae sam faen haenx, “Bouxlaux, gou mbouj yaeuh mwngz law!” Couh cujyin naeuz.

Augouj naeuz: “Mwngz rox, gou youq ndawlueg neix, rin lai, dieg noix, duetgungz mbouj ndaej ha!” “Dangh- naeuz mwngz ndaej youq yienhsingz roxnaeuz yanghcin gwnzgai hawj dauq ranz ndeu hawj gou, aiq ndaej duetgungz.”

Augouj daegdaengq hawj Couh cujyin hojnanz, bouxlawz daeuj bang- gungz lij aeu hawj dauq ranz ndeu ha? Ndawranz Couh cujyin youh mbouj dwg hai yinzhangz, caiq gangj lo, couhcinj hai yinzhangz, hix mbouj miz maz lijyouz bang vunz guh ranz ha!

“Ndei gangj! Cijaeu mwngz nyienh, raeuz doxyaeng couh ndaej lo!” Han naeuz.

Augouj laeglemx naeuz: “Mwngz gaej gangjboq ba! Mwngz lij ndaej hawj dauq ranz gou dem?”

Gienh saeh neix gvaqbae geij ngoenz lo, Augouj dawz gienh saeh neix dangguh gangj ndwi nei, yaep- ndeu couh lumz lo. Hoeng， Couh cujyin mbouj lumz, gingqyienz daiq biujgek bae ra Augouj ciemcih ha! Dwg gij saehcingz senjdeuz, ciuq gij byauhcunj Augouj, ndaej dauq ranz caetcib haj bingzfueng ndeu, couh youq gwnz hawcin.

“Boh’au, mwngz couh gangj coenz vah ndeu, mwngz buen roxnaeuz mbouj buen?” Couh cujyin cam.

“Buen! Itdingh buen ha! Gou maqmuengh dauq ranz moq haenx hawj daeglwg ra bawx ne!” Augouj naj hai riunyum lo.

Ciemcih vaen cihdoz, dauq ranz Augouj loq fangzhwnz cungj siengj haenx, couh cugciemh daj ndaw mok loh okdaeuj lo.

Augouj cij gyau di cienz ndeu,couh begbeg ndaej dauq ranz ndeu! Hawj vunz hozhaenz dangqmaz.

“Goengheij mwngz ha! Boh’au!” Ngoenzneix Couh cujyin hix daeuj lo, dawz haj roek gaen nohmou caeuq daeh haeuxmoq ndeu daeuj ranzmoq Augouj.

“Couh cujyin, gou miz gienh saeh ndeu cam mwngz.” Augouj rag Couh cujyin gvaq henz bae naeuz, “mwngz hawj gou ra dauq ranz ndeu, mwngz dwg boux vunz ak raixcaix ndeu! Ndaej mbouj ndaej hawj daeglwg gou hix gaisau dahsau ndeu ha!”

Couh cujyin dingq sat riuhaha hwnjdaeuj:“Gou caenhrengz ba! Gou caenhrengz!”

Augouj naeuz: “Seizneix couh ndei lai lo! Caen dwg ndei ha! Docih ha! Docih mwngz raixcaix!”

“Mbouj yungh docih gou, aeu docih baihgwnz, baihgwnz cijdauj ndaej ndei ha!” Couh cujyin naeuz.