Bihaenx, Dahmeiz haq hawj Daeggyangz le. Mwh gezvwnh, cijmiz song doiq labcuk hoengz. Yawj gij rongh yaebyaeb, Daeggyangz naeuz: “Dahmeiz, gaen gou gwn haemz souh hoj lo!” Ahmeiz riu naeuz: “Gij swnghhoz vuenyungz dwg baengh song fwngz roengzrengz vuenh ndaej daeuj! Gou mbouj ienqhoij!”

Seizhaenx, Daeggyangz youq ndaw gvanggih vat meiz, Dahmeiz youq ndawranz ciengx mou, saedceij yienznaeuz mbouj fouq, hoeng rox- nyinh vuenyungz. Buenq bi gvaqbae le, youq haemh laepcupcup ndeu, Daeggyangz hai aen mozdozceh mbouj miz daeng ndeu daj ndaw- gvangq dauqma, aenvih yawj mbouj raen roen, hai roengz laj bo bae lo. Mbwn rongh le cij deng vunz fatyienh, soengq bae yihyen, va bae haujlai cienz, cungjsuenq gip dauq diuz mingh ndeu, hoeng bouxvunz cix gyad lo! Dahmeiz enj aen dungx hung haj ndwen, youq ndawfwn daej le baenzngoenz bae! Yawj Daeg- gyangz cungj gyad dwk doengh mbouj ndaej lo, naengbak Dahmeiz cungj yaek haeb byoengq lo! Miz vunz ra Dahmeiz naeuz:“Dahmeiz ha, mwngz boux ndeu, hoj gvaq lai, caiq ra bouxvunz ndeu ba!” Ahmeiz mbouj doengzeiq:“Sou caiq gangj cungj vah neix, baezlaeng gaej daeuj ranz gou lo!”Ahmeiz mieng naeuz itdingh ciuqgoq aen ranz neix ndei bae, hoeng gangj cix yungzheih ne!

Ngoenz ndeu, gaiq baiz laeb dangjanq laeb gaj ndeu nem youq bakdou ranz Ahmeiz. Yawj gaiq baiz saek aeuj neix, Dahmeiz naeuz: “Gaiq baiz neix miz maz yunghcawq ne?” “Yungh daeuz bw, seizneix ranz mwngz dwg ranzhoj lo, raeuz aeu daeuj bang mwngz duetgungz bienq- fouq!” Bouxvunz daeuj haenx gangj, gig miz saenqsim gangj. “Gou mbouj aeu sou rex, gou cijaeu ngaenz ciengx mou couh ndaej lo! Gou yaek ciengx bak duz mou!” Ahmeiz nyinhcaen naeuz. “Mwngz dwg gangj caen dahraix ha? Mwngz rox gisuz lwi? Mwngz aeu geijlai bonjcienz?” Bouxvunz daeuj haenx gangj. “Sam fanh maenz ngaenz bonjcienz couh gaeuq lo, mwngz ndaej ciq hawj gou lwi? Gou itdingh boiz hawj mwngz!” Ahmeiz naeuz. “Seizneix mwngz dwg bangfuz duisieng lo, ndaej caeuq saenqyunghse daigvanj haj fanh bouj leihsik daigvanj!” Bouxvunz daeuj haenx laebdaeb naeuz. “Caen lwi? Caen lwi? Miz gij saehcingz baenz- neix ndei ha? Ndei lai la!” Haujlai bi mbouj riu saekdi, dauqdaej riu hwnjdaeuj lo. “Gou dwg gangj caen ha!” Bouxvunz daeuj haenx gazgwd naeuz.

Mbouj geij nanz, Ahmeiz couh bae saenqyunghse ndaw yangh ciq haj fanh maenz ngaenz, yienghneix couh ndei lo. Dahmeiz aeu haj fanh maenz ngaenz neix, caep aen diengz- mou ndeu, youh cawx bak duz moulwg, couh ndei lo. Daeggyangz gyad youq ndawranz, yawj ndaw da, gangj mbouj okdaeuj, hoeng raemxda lae okdaeuj lo.

Buenq bi gvaqbae lo, gij mou Ahmeiz ciengx haenx youh hung youh biz, Dahmeiz baenz boux conhyezhu cienmonz ciengx mou ndaw yangh! Raen duzmou rim riengh buet bae buet dauq, Dahmeiz caeuq Daeggyangz angq ndaej raemxda lae roengzdaeuj lo. Dahmeiz naeuz Daeggyangz：“Langh mbouj miz gij cwngcwz ndei banggungz, raeuz baenzlawz miz ngoenzneix ha? Raeuz cungjsuenq haemz bae diemz daeuj lo!”