It

“Mbouj ndaej!” Meh Yez Siu rongx dahlwg, gij sim’angq coux dahlwg daj gizgyae dauqdaeuj fwt siu bae lo.

“Vihmaz ha? Meh! Mwngz mbouj dwg cungj coi gou ra daegyoux vaiqdi lwi? Daegyoux gou couhdwg daeglwg Lij saefouh ha!” Dahlwg gig geizheih cam.

“Cingq aenvih dwg de cij mbouj baenz!”Meh Yez Siu mbouj nyienh nyiengh saekdi.

“Gou rox lo, mwngz couhdwg mbouj nyienh cuengq gou ‘go faex canh ngaenz’ neix! W, www……” Yez Siu daejfwtfwt bongh ok dou bae, coh diuz dah iq naj mbanj buet bae.

Vahsug naeuz “daegmbauq aeu yah, dahsau yaek haq”, neix dwg gij maqmuengh bohmeh gwnzbiengz. Hoeng, dah neix mbouj rox……

Siengj daengz gaxgonq…… Danghnaeuz seizneix gyoengq lwgnyez doxaeu, mbouj dwg hawj gyoengq vunzmbanj gangjriu ha? Meh Yez Siu sim lumj deng duzmoed ndat, simnyap dangqmaz.

Dauqngeix gij saeh song lwg neix dox roxnaj, de yied naemj yied roxnyinh mehmbwn loengh de……

Ngeih

Bide ndwenlab haet ndeu, youq ngoenz ndit raeujrubrub ndeu, Yez Siu hwnq ndaej caeux, bae laj gorenh gyaeujmbanj caj ci bae haw dajcawx.

Buenq ngoenz cij caenx hwnj aen ci Vujlingz bae. Aen ci neix lumj youq gwnz roenbya bibi buengqbuengq hai dwk. Saenq- daenh cibgeij goengleix le cij daengz gwnzhaw. Gyoengqvunz deng ngauz ndaej dungx saej yaek rueg okdaeuj.

Ci baez dingz onj, Yez Siu couh deng gyoengqvunz nyoengx roengz ci daeuj.

De daemh din gyaengj, mbouj dingz nu song faj fwngz, Siengj hawj daengx ndang nit gyaengj ndaej youq laj ndit menhmenh raeujrub hwnjdaeuj.

Haw Mbanjcunegh neix mbouj hung, cij miz diuz haw ndeu gai doxgaiq. Henzhaw song mbiengj dwg gij ranzlaeuz gag hwnq.

Yez Siu daengx din yawj coh ndaw haw. Gyawj ndwencieng lo, cij raen gwnzhaw engq nauhyied lo. Gyoengqvunz byaij hwnj byaij roengz, ndaetndetndet, ci yaek baedauq cungj nanz. Gij dan caeuxcaeux cungj baij rim gij huq gvaqcieng, vi gyoengq vunzmbanj daeuj haw cawx huq.

Yez Siu coh gizgyae muenghyawj, raen aen diemq gyasei le, couh byaij coh gizde bae.

Baezneix hwnj haw, Yez Siu aeu cawx dauq sahfaz faex doq ndeu dauqbae.

Mboujnex, gvaqcieng seiz, gyoengq caencik beixnuengx daeuj baiqnienz gangjgoj cungj naengh eij dog, yakyawj lai.

Sam

Aen diemq gyasei huq gig lai, gak cungj gak yiengh, Yez Siu byaij youq ndawde, yawj ndaej dava caez.

“Cawx dauq sahfaz doq neix ba, dwg faexrenh doq baenz, daegbied duzlungz duzfungh neix dwg Lij saefouh gwnz haw raeuz deugaek, huq ndei gyaq cienh bw!” Lauxbanj gaisau naeuz.

Yez Siu yienznaeuz mbouj rox yawj gyasei, hoeng, vanzlij rox gij mingzdaeuz Lij saefouh. De couh cawx dauq sahfaz faexrenh neix lo.

Hawj ngaenz le, lauxbanj heuh Yez Siu vaiq bae ra cidaehhuq daeuj, de bang anbaiz buen sahfaz hwnj ci.

Boux bang buen sahfaz dwg daegmbauq Bouxgun ndeu, nienzgeij caeuq Yez Siu ca mbouj geijlai. De ndang daenj buhmienz saekloeg vaq saekndaem, din daenj haizgaijfang, baenz mbauq youh seuqcingh. Aiq dwg ciengzseiz dingj rumz fwn soengq huq, saeknaj miz di hoengzndaem. De cungj maij riunyumj, hawj vunz roxnyinh simsienh dangqmaz.

“Yawj mwngz mbouj dwg boux ciengzseiz daeuj haw, seizneix cingq nyaengq, mbouj ndei ra ci bw! Gou bae bang mwngz ra ba.” Daegmbauq riu naeuz.

Yaep he, de couh hai aen cidaehhuq gvaqdaeuj lo. Baez dingz ci couh cang huq.

“Mwngz swnhbienh naeng ci daiq roen.” Daegmbauq neix naeuz.

Yez Siu roxnyinh daegmbauq neix couh lumj boux baengzyoux simsoh ndeu, guh saeh gangj vah cungj hawj de simsoeng.

Hoeng, Yez Siu ndawsim gag ngeix: Danghnaeuz dan gou caeuq daegmbauq neix caez naengh ci baema, gyoengq vunzmbanj gangj sam gangj seiq baenzlawz guh?

Daegmbauq neix lumj yawj ok gij simsaeh Yez Siu, riu naeuz:“Gou mbouj rox ranz mwngz youq gyawz, hix mbouj rox coh mwngz, gou baenzlawz soengq huq ne?”

Yez Siu najhoengz lo:“W, raeuz couh itheij bae ba.”

Caj Yez Siu hwnj ci naengh ndei, cidaehhuq couh hai doengh lo.

Youq gwnzci, Yez Siu rox daegmbauq neix heuhguh Lij Swjging.

Seiq

Cidaehhuq itloh hai, ndonj gvaq geij aen ndoi iq ndaem oij, couh byaij daengz diuz dah iq henz mbanjranz Yez Siu lo.

Lij Swjging hai cidaehhuq gvaq giz rin lai caemhcaiq raemx noix, baenzneix ndei gvaq dah. Yez Siu naengh youq gwnz ci bibuengq, sim diuq bubbub.

Siengj mbouj daengz, doiqnaj dwg boux goenglaux doiqdaeuz ranz Yez Siu. De cingq yien duz vaiz laux youq henz dah gwn raemx.

Goenglaux neix simyak dangqmaz, ciengz caeuq vunzmbanj doxndaq doxhoenx. De maij gwn laeuj, laeuj feiz le moeb yah de, baenzneix yah de couh buetdeuz lo, seizneix swhgeij ciengx daeglwg huk ndeu. Daihgya cungj mbouj haengj gyawj de.

Boh Yez Siu daibingh seiz, meh Yez Siu ngamq seiqcib lai bi. Goenglaux neix raen meh Yez Siu baenz maiq, engq hangz ranz de.

Ngoenzneix raen Yez Siu bae haw cawx sahfaz dauqma, vanzlij miz daegmbauq ndeu bang soengq daeuj, da’nding yaek dek bae.

“Ba” sing ndeu, goenglaux fad caekhaex duzvaiz mbat he, duzvaiz laux doeksaet yat diuq hwnjdaeuj, ngeuxgyaeuj couh bongh coh mbiengj dah cidaehhuq daeuj.

Dingjlingz Lij Swjging dinfwngz vaiq, sikhaek van gvaq henz bae, youh riengjret hai ci daengz haenz dah bae.

“Bum” sing he, gwnz ci aen daizcaz ndeu doek roengz ndawraemx bae lo.

“Liux lo, daizcaz doek raemx lo!” Yez Siu sing hemq hwnjdaeuj, haemz goenglaux de dahraix.

“Gaej simgaenj, caj ci dingh ndei le, gou roengz bae lauz hwnjdaeuj, caiq cug ndei di.” Lij Swjging nai de naeuz.

Goenglaux de riuhaha, youh “bi” biq gaemz myaiz ndeu roengz dah bae, da caengzraurau song bouxcoz, lumj yaek gwn vunz nei.

Lij Swjging aiq rox ndaek neix dwg maz vunz lo. Hoeng, seizneix de mbouj oksing, daengx ci maenh, roengz dah bae lauz aen daizcaz hwnjdaeuj, youh laebdaeb hai ci soengq huq daengz ndaw ranz Yez Siu bae.

Haj

Ci ngamq hai haeuj gyanghongh ranz Yez Siu, Lij Swjging couh ganjgip bang buen sahfaz haeujbae cuengq ndei, daengx ndang ok hanh、heiq baegfofo. Yez Siu gig gyo’mbaiq de, sikhaek cienq ndang bae aeu raemxcaz hawj de gaijhawq.

“Haiz mwngz dumz liux lo, mwngz vaiqdi vuenh roengzdaeuj lo……” Baez haeuj ranz cuengq ndei huq, Yez Siu couh heuh Lij Swjging duet mad haiz roengzdaeuj, youh aeu gouh haiz daegnuengx hawj de vuenh. Youh heuh daeg- nuengx dawz haiz mad dumz daengz gumzfeiz bae gangq hawq bae.

Lij Swjgging doq gwn caz doq cimyawj ndaw ranz Yez Siu.

Ranz neix dwg ranzcien, hoeng seiqlengq cungj baet ndaej seuqyupyup, gij doxgaiq cuengq ndaej cingjcaez dawzbanj. Aen gyanghongh gig gvangqlangh, aen ranz dajcawj caeuq ranzding doxdoiq; song mbiengj ciengzcab cungj aeu cien daeb, miz giz aenvih deng fwn rumz cung, louz miz rizraemx.

Gogut roz na’nwtnwt bu youq gwnz ciengz, gij namh goemj youq gogut roz gwnz de, lij ndaem miz vadaengngoenz dem. Hawj seizdoeng baihnamz neix dem miz haujlai hoenghhwd.（1）