Aucuj dwg ranznden gou, dou song ranz ngamq gek raeb ciengz ndeu.

Aucuj mbouj sang mbouj daemq, naengnoh gyaemqhoengz, ndang cangqcwtcwt. Gwnznaj de ciengz- ciengz riunyumnyum, yawj hwnjbae gig hozswnh, soqlaiz mbouj raen de najsaep gvaq.

Lij iq, gou gig gyaez caeuq gyoengq nyezdoih bae ranz Aucuj guhcaemz. Aucuj seizhaenx caeuq daxmeh de youq, caengz baenzgya, de caemh maij caeuq bang lwgnyez dou guhcaemz gangjgoj, miz maz doxgaiq ndeigwn, cungj faen di hawj dou cimzcimz.

Baez he, Aucuj daiq duz mahenj de haeuj ndoi bae dwknyaen, dwk ndaej duz douqndoi ndeu dauqranz. Aucuj muengz ndat raemx dangq saej, dou bang lwgnyez neix humx seiqhenz yawjngonz.

Aucuj naeuz:“Sou haemhneix mbouj bae ranz gwn caeuz lo, youq neix raeuz caez gwn noh douqndoi.”

Seizhaenx ranzranz cungj mbouj fouqmiz, ndwen daengz ciet cij ndaej gwn saekdi nohmou, dingq Aucuj baenzneix gangj, dou angq ndaej dopfwngz hwnjdaeuj.

Nohdouq rangfwtfwt hwnj daiz lo, dou caeux couh ndwnj myaiz gyoeg- gyoeg lo, Aucuj naeuz:“Gou cug boux faen hawj sou, gwn mbouj sat dawz bae ranz gwn.”

Mbouj rox dwg Aucuj simndei simsienh gaenx faen doxgaiq hawj dou gwn, roxnaeuz dou bang lwgnyez neix ndaej gwn gvenq duh de le, moix ngonz cungj daengz ranz de baenq geij hop. Gizsaed ceiq ciuyinx dou lij dwg ranz Aucuj miz gyaq Funghvuengzbaiz danci ngeihcib bet conq he.

Aucuj miz gyaq danci neix, dwg gai fwnz rom ndaej ngaenz cawx. Seizhaenx gyoengqvunz caengz rox okbae dajgoeng ra cienz, bouxboux youq ranz ngaemgyaeuj guh hongreih. Aucuj guh hongreih ndaejhoengq le, couh haeuj ndoi bae raemj fwnz rap bae haw gai, rom ndaej cienz cawx gyaq danci moq neix.

Aucuj ciengzciengz dawz danci uet ndaej seuqsaksak, mbouj hawj miz saekdi daeuh, hawj diuz lienh ci gya youz, genjcaz aen lingzgienh lawz aeu vuenh aeu coih. Aucuj naeuz, danci baujyangj ndaej ndei mbouj yungzheih vaih, cij yungh ndaej nanz.

Seizhaenx gyoengqvunz bae haw bae mbanj cungj dwg byaij loh, ndawmbanj cij miz ranz Aucuj miz gyaq danci neix, dou lwgnyez roxnyinh gig citgeiz, ngoenzngoenz guhdoih bae ranz Aucuj yawj gyaq danci neix, yawj sat lij iet fwngz gizneix lumhlumh, gizhaenx lumhlumh.

Aucuj naeuz:“Sou gaej bae gyawj lumh danci lo, laemx roengzdaeuj dimz deng vunz couh mbouj ndei lo.”

Dou dingq le, cijndei daj gyae soengz muengh gyaq danci haenx, mbouj caiq bae gyawj luenh lumh, ndawsim gag hozhaenz ndwi. Dou lwgnyez hozhaenz Aucuj miz gyaq danci neix, gyoengq vunz ndaw mbanj engq hozhaenz.

Gaxgonq Aucuj caeuq geij dah- sau doxcim gvaq, cungj mbouj raen baenz saek dah. Baezhaenx Aucuj youh bae doxcim lo, mbatneix de gwih gyaq danci moq haenx bae. Aucuj hag gwih danci caengz sug geijlai, cidaeuz gaemh caengz onj, nyeux gvaq mbiengjneix cix mbit gvaq mbiengjde bae, hoeng de lij dwg gwih bae lo.

Aucuj baezneix doxcim caen baenz lo. Gyoengq bouxgeq、 gyoengq hauxseng ndaw mbanj cungj nyinh- naeuz dahsau dwg yawj hwnj gyaq danci haenx gonq, caiq yawj hwnj Aucuj boux vunz neix. Mboujguenj gyoengqvunz baenzlawz lwnh, Aucuj couh yienghneix aeu ndaej Simjcuj lo.

Raen Aucuj aeu ndaej Simjcuj, ndawmbanj gij hauxseng hozhaenz raixcaix, cungj ciq gyaq danci Aucuj bae caeuq dahsau doxcim roxnaeuz doxlienh. Doeklaeng dauq hix baenz geij doiq gvanbaz, yienghneix gyaq danci Aucuj couh miz aen mingzcoh moq ndeu, heuhguh “cimoiz”.

Gyaq danci Aucuj boux rox naengh ciq bae gwih, boux mbouj rox naengh hix ciq bae gwih, moix baez ciq okbae, aen ndang danci mbouj dwg gizneix deng mboep, couhdwg gizde deng doed, haujlai giz youzcaet hix deng bungq lot bae lo, loh ok gij diet haumyanmyan.

Aucuj raen gyaq danci cihgeij vaih baenz yienghneix, hix mbouj ndatheiq, riu naeuz:“Couh suenq gyaq danci gou vaih ndaej sanq caez hix mbouj miz maz, mbanj raeuz baengh de aeu ndaej geij dahbawx, dij lo.” Simjcuj caeuq gyoengqvunz dingq le, cungj riuriu, mbouj guhsing.

Simjcuj daeuj daengz ranz Aucuj, bi daihngeih couh mbat ndeu hawj Aucuj seng le sam daeglwg. Baez seng couh miz sam daeglwg, Aucuj youh angq youh you, angq dwg de ndaej dang boh lo, you dwg ndawranz sawqmwh miz baenzlai lwgnyez, gwn lai yungh cienz lai, dan baengh youq ranz guh nazreih bae gyawz ciengx ndaej hwnj. Naemj bae naemj dauq, Aucuj gietdingh biek lwgyah ok rog bae dajgoeng ra cienz.

Aucuj mbouj rox geijlai saw, cijndei bae aen rincangj ndeu guh- hong. Rincangj guhhong sinhoj, ngoenznaengz buen rin、geuh rin caeuq cang rin hwnjci, daengz haemh souhong, Aucuj roxnyinh ndokmbaq、ndoksej in raixcaix, daengx ndang cungj yaek sanq lo, sim naemj: Guh hongnaek aeu ngaenz yienznaeuz mbouj ngaih, hoeng hix rom ndaej di cienz gaeuq daengx ranz vunz gwndaenj, daengzcog gou nyengh aeu soengq sam daeglwg bae doeg daihhag, rox saw lai guhhong soeng di.

Aucuj youq rincangj guhhong rom ndaej ngaenz lai le, couh mbouj caiq naemj bae rog dajgoeng lo, de youq ranz bau ndoi ndaem makbug.

Vunz bungz daengz seizdaih ndei, couh lumj yaek haeuj ninz seiz miz vunz soengq swiz hawj demh gyaeuj nei. Aucuj ndaem makbug, baihgwnz soengq vafeiz soengq yw, youh baij gisuzyenz daeuj son baenzlawz guenj mak dem, naeuz baenzlawz hix aeu bang de, bang de duetgungz baenz fouq.

Makbug ndaej gai le, aen daehngaenz Aucuj ciemhciemh bongz hwnjdaeuj. Vih fuengbienh caeuq vunz damz seng’eiq caeuq haeuj ndoi guhhong yawj mak, Aucuj cawx aen cimozdoz ndeu ma lawh danci, ngoenzngoenz buet bongh youq ndawmbanj caeuq benq ndoi ndaem makbug haenx.

Danci caeuq cimozdoz caez dwg aen ci song loek, danci mbouj beij cimozdoz buet ndaej vaiq ne, gyoengqvunz ndawsim youh gig hozhaenz Aucuj lo.

Daj Aucuj cawx aen cimozdoz neix le, cawz le fuengbienh de cihgeij, hix fuengbienh ndawmbanj gyoengq beixnuengx ok dou byaijloh, gyoengq- vunz miz saehgip lumj gyanghaemh gyanghwnz lwgnyez baenzbingh, cungj daeuj ciq aen cimozdoz neix naengh bae. Moix baez yienghneix, Aucuj cungj riuhoho ciq cimozdoz hawj gyoengqvunz, mbangj boux caengz hag gwih gvaq cimozdoz gag bae mbouj ndaej, Aucuj couh bang doz vunz bae daengz dieg dem.

Ndwenngoenz ciemhciemh bae- naj, sam daeglwg Aucuj ciemhciemh majhung lo, bouxboux bae hagdangz doegsaw, Simjcuj miz seizgan lo.

“Ndaem makbug daengz haemh cij miz baez souhaeuj ndeu, baenzlawz guh ne, lij guh yiengh maz dem ne? ” Aucuj hwnz naemj ngoenz naemj, uk gyaeuj baenq lumj mohhaeux. Seizneix baihgwnz miz vunz roengzdaeuj heuh de youq laj go mak ciengx gaeq, Aucuj fwt roq gyaeuj naeuz:“Deng lo, ciengx gaeq, gou baenzlawz cungj naemj mbouj daengz ciengx gaeq gienh saeh neix ne.”

Ciengx gaeq yiengh hong neix couh youz Simjcuj bae guenjleix.

Duzgaeq ciengx youq ndawbya ndaej langh fwed byaij doengh, youh ndaej coemj duzdaek duznengz gwn, noh engq sien engq ndeigwn, gij gyaqcienz gai ndaej beij gij gaeq wnq cungj bengz haujlai. Demlai gij souhaeuj neix, ndawdaeh miz cienz, Aucuj sam daeglwg gwndaenj doegsaw cungj mbouj you cienz yungh gvaq.

Ngoenzhaenx ndit ronghsagsag, aen ciiq moqsaksak he hai haeuj aen gyanghongh gvangqlumlum Aucuj daeuj, ndawmbanj youh goenjfoedfoed hwnjdaeuj lo, gyoengqvunz cungj humx gvaqdaeuj goenghoh. Aucuj saet roengz ci daeuj, riu naeuz:“Baengh dangj cwngcwz ndei, raeuz cij miz ngoenzneix, daihgya daeuj daengz neix couh mbouj bae ranz lo, haemhneix caez youq ranz gou gwn laeuj gangjgoj ba!”

Haemhhaenx, sing gangj sing riu goksadsad, rwenz doh mbanjranz.