（ciep banj 6）

It、Gyarengz aeu cidu daeuj baujcang yinzminz danggya guhcawj. Haigvangq diuz miengloh minzcuj, gyalai gij yienghsik minzcuj, saedbauj yinzminz ciuqfap doenggvaq gak cungj miengloh caeuq hingzsik bae guenjleix hongsaeh guekgya, guenjleix ginghci caeuq saehnieb vwnzva, guenjleix hongsaeh ndawbiengz. Haeujcoengh caeuq baujcingq yinzminz doenggvaq yinzminz daiqbiuj daihhoih hengzsawj gienzlig guekgya, laebcaez aen gunghcoz gihci dingq yigen yinzminz、comz dungxcaiz yinzminz, laeb ndei giz lienzhaeh caengzgiek laebfap. Gyalaeg gaijgwz caeuq guh ndei gunghvei、gungcinghdonz、fulenz daengj ginzdonz cujciz, hawj gyoengqde lumj diuzgiuz diuzsai nei langh rengz okdaeuj. Seizseiz aeu byaij diuz roen fazcanj vunzgienz Cungguek, lailai caeuqfaenh daengx seiqgyaiq ceihleix vunzgienz, doinyoengx aen saehnieb vunzgienz cienzmienh guh baenaj.

Ngeih、Cienzmienh hwngfat yiengh minzcuj doxyaeng. Daengxbuenz maeuzveh doicaenh cwngdangj doxyaeng、yinzda dox- yaeng、cwngfuj doxyaeng、cwnghez doxyaeng、yinzminz donzdij doxyaeng、caengzgiek doxyaeng caeuq sevei cujciz doxyaeng, laebcaez gak cungj bingzdaiz doxyaeng miz cidu hanhhaed haenx, doicaenh yiengh minzcuj doxyaeng hwngfat engqgya gvangqlangh、lai caengz、baenz cidu. Dawzmaenh caeuq laebndei aen cidu lai dangj doxgap caeuq cwngci doxyaeng youz Cunghgoz Gungcanjdangj lingjdauj haenx, caezcienz gij cidu gihci yinzminz cwnghez guh minzcuj gamduk caeuq veijyenz lienzhaeh gyoengq ginzcung gyaiq- bied.

Sam、Lai bae hwngfat yiengh minzcuj caengzgiek. Laebcaez gij cidu dijhi caeuq gunghcoz dijhi caengzgiek cigsoh minzcuj. Laebndei aen cidu goenghai banhsaeh, haigvangq diuz miengloh hawj gak gyoengq caengzgiek ndaej miz bouhloh bae caez ceih caengzgiek, baujcang yinzminz ciuqfap guenjleix gij hongsaeh vunzlai caeuq gij saehnieb goeng’ik caengzgiek. Laebcaez gij cidu minzcuj guenjleix doengh aen giyez swyez danhvei aeu cizgungh daiqbiuj daihhoih guh hingzsik giekbonj haenx, henhoh gij gienzik habfap gyoengq cizgungh.

Seiq、Gyamaenh caeuq hwngfat aen gyaezguek dungjyiz cansen ceiq gvangqlangh haenx. Laebndei aen buenz hong daih dungjcan, gaemmaenh daih doxgiet daih lienzhab, dungyenz daengxcungq lwglan Cunghvaz hopheux guhbaenz aen loqsiengj Cungguek Cunghvaz Minzcuz fukhwng hungmbwk itheij naemj、itheij guh. Hawj gijndei yiengh cwngdangj cidu moq sevei cujyi guek raeuz ndaej fat okdaeuj, lai roengzrengz caeuq minzcuj dangjbai nem gij vunz mbouj haeuj dangjbai de doxgiet gapguh. Aeu couqmaenh gij eiqsik Cunghvaz Minzcuz ranz vunz ndeu guh cawjsienq, gyarengz caeuq gaijndei gij hong minzcuz Dangj raeuz. Dawzdingh aen fuengyiengq cunghgyau guek raeuz caeuq gij saedsaeh Cungguek dox giethab, lai bae dazyinx cunghgyau caeuq aen biengz sevei cujyi dox hab’wngq. Coicaenh gij ginghci mbouj dwg gunghyoujci de cangqheiq hwngfat caeuq doengh boux guh gij ginghci mbouj dwg gunghyoujci de cangqheiq hungmaj. Gyagiengz caeuq gaijndei gij hongsaeh nangqdaengz vazgyauz, giet baenz nga rengz hung itcaez vih minzcuz fukhwng bae okrengz.

Siz Ginbingz daegbied gangj daengz dawzdingh cienzmienh ciuq- fap guenj guek, coihawj hwnqguh aen Cungguek fapceih caiq guh baenaj

Siz Ginbingz youq ndaw aen baugau Ngeihcib Daih daegbied gangj daengz, dawzdingh cienzmienh ciuqfap guenj guek, coihawj hwnqguh aen Cungguek fapceih caiq guh baenaj.

Siz Ginbingz vixok, cienzmienh ciuqfap guenj guek dwg ciengz gwzming laegdaeuq mizgven ceihleix guekgya ndeu, gvanhaeh daengz Dangj gaemgienz hwng guek, gvanhaeh daengz lwgminz vuenyungz an’onj, gvan- haeh daengz Dangj caeuq guekgya ciengzgeiz andingh. Itdingh aeu doenggvaq fapceih engq ndei bae bauj ndaej maenh goekgaen、onj yawhgeiz、ik gyaeraez, youq gwnz roenloh fapceih cienzmienh hwnqguh aen guekgya sevei cujyi yendaiva.

Siz Ginbingz daegbied gangj daengz, raeuz aeu dawzdingh byaij diuz roen fapceih sevei cujyi miz gij daegsaek Cungguek, laebguh aen dijhi fapceih yiengh sevei cujyi miz gij daegsaek Cungguek、hwnqguh aen guekgya fapceih sevei cujyi, hopheux baujcang caeuq coicaenh ndawbiengz goengbingz cingqngeih, dawzdingh doengzcaez doicaenh ciuqfap guenj guek、ciuqfap gaemgienz、ciuqfap hingzcwng, dawzdingh doxcaez hwnqguh aen guekgya fapceih、aen cwngfuj fapceih、aen biengz fapceih, cienzmienh doicaenh gohyoz laebfap、yiemzgek caepfap、goengcingq dawzfap、boux- boux soujfap, cienzmienh doicaenh guekgya gak fuengmienh hongsaeh ciuq fap bae guh.

It dwg caezcienz aen dijhi faplwd sevei cujyi miz gij daegsaek Cungguek aeu yenfaz guh goek haenx. Lai roengzrengz saedhengz yenfaz caeuq doiq neix guh gamduk, laebcaez gij cidu dijhi baujcwng yenfaz ndaej cienzmienh saedhengz, gyagiengz gij lingjyiz cungdenj、gij lingjyiz ngamq hwng、gij lingjyiz nangqdaengz guekrog de laebfap, doengbuenz maeuzveh bae doicaenh gij fapceih ndawguek caeuq gij fapceih nangqdaengz rogguek, doicaenh gohyoz laebfap、minzcuj laebfap、ciuqfap laebfap, doengbuenz maeuzveh bae dinghlaeb、coihgaij、feiqcawz、cekgej、biensij faplwd, hawj laebfap engq baenz hidungj、engq baenz cingjdaej、engq dox boiqhab、 engq miz seizyauq.

Ngeih dwg netsaed doicaenh ciuqfap hingzcwng. Cienjbienq gij ciznwngz cwngfuj, gaijndei gij cizcwz dijhi caeuq gij cujciz gezgou cwngfuj, doicaenh gihgou、ciznwngz、gienzhanh、bouhloh、cwzyin hab fapdingh bae, hawj hingzcwng engq miz yauqlwd caeuq engq ndaej vunzlai saenqnyaemh. Gyalaeg gaijgwz gij dijci hingzcwng caepfap, cienzmienh doihaeuj gaiq hong yiemzgek gveihfan goengcingq vwnzmingz caepfap, gyarengz youq doengh aen lingjyiz youqgaenj nangq daengz leih’ik henzndang ginzcung haenx caepfap, caezcienz gij bouhloh hingzcwng caepfap, laebcaez gij biucinj hingzcwng buenqgiet cawqfad.

Sam dwg yiemzgek goengcingq dawzfap. Gyalaeg swhfaz dijci cunghab boiqdauq gaijgwz, cienzmienh cinjdeng doeksaed aen cidu doekdingh cwzyin swhfaz, gyavaiq cauhlaeb gij swhfaz cidu sevei cujyi goengcingq、yauqlwd sang、miz gienzvi haenx, roengzrengz hawj yinzminz ginzcung youq moix aen swhfaz anqgienh ndawde raen daengz goengbingz cingqngeih.

Seiq dwg gyavaiq hwnqguh aen biengz fapceih. Hwngcienz gij fapceih cingsaenz sevei cujyi, cienzciep gij faplwd vwnzva conzdungj maenhndei Cunghvaz, dazyinx daengxcungq yinzminz guh boux cungsaed aeueiq、boux gagrox ciuqsouj、boux giendingh henhoh gij fapceih sevei cujyi. Hwnqguh aen goenggungh faplwd fugsaeh dijhi hab yienhdaih guenj doh hawsingz lajmbanj haenx, haeujlaeg bae guh fapceih senhconz gyauyuz, hawj vunzbiengz bouxboux lai rox fap souj fap. Langh ok gij cozyung lingjdauj ganbu daiqdaeuz guh yienghndei, roengzrengz hawj daengx biengz hwnghwnj yiengh fungheiq gingq fap hag fap souj fap yungh fap.

Siz Ginbingz daezok, doihaeuj vwnzva gagsaenq gag’ak, hawj yiengh vwnzva sevei cujyi caiq couq baenz ronghlwenq moq

Siz Ginbingz youq ndaw aen baugau Ngeihcib Daih daezok, doihaeuj vwnzva gagsaenq gag’ak, hawj yiengh vwnzva sevei cujyi caiq couq baenz ronghlwenq moq.

Siz Ginbingz vixok, cienzmienh hwnqguh aen guekgya sevei cujyi yendaiva, bietdingh aeu seizseiz byaij diuz roen fazcanj yiengh vwnzva sevei cujyi miz gij daegsaek Cungguek, lai gagsaenq vwnzva bonjfaenh, hopheux yaengx fangeiz、comz simvunz、ganq vunz moq、hwng vwnzva、baij yienghsiengq bae hwnqguh aen guekak yiengh vwnzva sevei cujyi, fazcanj yiengh vwnzva sevei cujyi yiengqcoh yendaiva、yiengqcoh seiqgyaiq、yiengqcoh daengzcog, youh dwg gij minzcuz、hab gohyoz、vih vunzlai haenx, gikfat gij rengzhoengh cauhguh cauhmoq vwnzva daengx minzcuz, gyaak gij cingsaenz ligliengh guhbaenz Cunghvaz Minzcuz fukhwng hungmbwk.

（cienj banj 8）