（ciep banj 10）

Siz Ginbingz youq ndaw baugau biujsiq, bingdoih yinzminz ciengxlwenx dwg aen bingdoih yinghyungz Dangj caeuq yinzminz baenzlawz cungj saenq ndaej gvaq haenx, miz saenqsim、miz bonjsaeh henhoh cawjgienz、dungjyiz guekgya caeuq diegguek caezcingj, miz saenqsim、miz bonjsaeh vih guhbaenz Cunghvaz Minzcuz fukhwng hungmbwk guh canloz cengjdingj, miz saenqsim、miz bonjsaeh vih seiqgyaiq hozbingz caeuq hwngfat ok goeng- rengz engq daih!

Siz Ginbingz daegbied gangj daengz, dawzmaenh caeuq laebndei “aen guekgya ndeu song cungj cidu”, doicaenh guekcoj dungjyiz

Siz Ginbingz youq ndaw aen baugau Ngeihcib Daih daegbied gangj daengz, dawzmaenh caeuq laebndei “aen guekgya ndeu song cungj cidu”, doicaenh guekcoj dungjyiz.

Siz Ginbingz vixok, “aen guekgya ndeu song cungj cidu” dwg hangh cauhguh hungmbwk yiengh sevei cujyi miz gij daegsaek Cungguek, dwg yiengh cidu anbaiz ceiq ngamj hawj Yanghgangj、Aumwnz gvidauq le ndaej itcig hoenghhwd onjdingh, bietdingh aeu ciengzgeiz guh roengzbae.

Cienzmienh cinjdeng、giendingh mbouj bienq gvancez diuz fuengcim “aen guekgya ndeu song cungj cidu”、“vunz Yanghgangj guenj Yanghgangj”、“vunz Aumwnz guenj Aumwnz”、gagguenj lailai neix, dawzmaenh ciuqfap ceihleix Yanghgangj ceihleix Aumwnz, henhoh aen yenci cizsi dwzbez hingzcwnggih youq ndaw Yenfaz caeuq Gihbwnjfaz gaenq doekdingh haenx. Dawzmaenh caeuq laebndei aen cidu dijhi “aen guekgya ndeu song cungj cidu”, doeksaed aen gienzlig cunghyangh cienzmienh ceihleix dwzbez hingzcwnggih, hengz ndei aen yenzcwz “bouxgyaezguek guenj Yanghgangj” “bouxgyaezguek guenj Aumwnz”, doeksaed gij faplwd cidu caeuq gij gihci caephengz dwzbez hingzcwnggih henhoh guekgya ancienz. Baujciz yiengh cidu swhbwnj cujyi Yanghgangj、Aumwnz caeuq gij fuengsik gvaq ndwenngoenz gyoengqde ciengzgeiz mbouj bienq, coicaenh Yanghgangj、Aumwnz ciengzgeiz mwnhoengh onjdingh.

Haeujcoengh Yanghgangj、Aumwnz guh- hoengh ginghci、gaijndei gwndaenj beksingq、buqgej gij doxdawz caeuq vwndiz caengzlaeg mwh ginghci sevei fazcanj miz ok haenx. Leihyungh gij ndei caeuq gij daegdiemj Yanghgangj、Aumwnz, gyamaenh caeuq daezswng aen diegvih Yanghgangj、Aumwnz youq gozci ginhyungz、mouyiz、hangzyin hangzgungh、gohgi cauhmoq、vwnzva lijyouz daengj lingjyiz haenx, hawj Yanghgangj、Aumwnz caeuq gak guek gak digih baedauq doxgap engqgya hailangh、engqgya gaenjmaed. Hwnjheiq bae hwnqguh Yez Gangj Au Davanhgih, haeujcoengh Yanghgangj、Aumwnz engq ndei yungzhaeuj aen daihbuenz guekgya fazcanj bae, vih Cunghvaz Minzcuz ndaej fukhwng hungmbwk lai ok goengrengz.

Siz Ginbingz youq ndaw baugau daegbied gangj daengz, gaijgez aen vwndiz Daizvanh、guhdaengz guekcoj cienzbouh dungjyiz, dwg aen lizsij yinvu Dangj raeuz dinghsim mbouj bienq, dwg aen simmuengh caezcaemh daengxcungq lwglan Cunghvaz, dwg guhbaenz Cunghvaz Minzcuz fukhwng hungmbwk bietdingh aeu baenzneix guh. Hengzdingh aen cungjdaej fanghloz Dangj raeuz youq seizdaih moq gaijgez gij vwndiz Daizvanh haenx, gaemndaet gaem- maenh gij gienz dazyinx caeuq gienz guhcawj cawqleix song hamq gvanhaeh, giendingh mbouj bienq bae doicaenh guekcoj dungjyiz.

Diuz fuengcim “hozbingz dungjyiz、aen guekgya ndeu song cungj cidu”, dwg aen fuengsik ceiq ndei coibaenz song hamq dungjyiz, doiq gyoengq beixnuengx song hamq caeuq Cunghvaz Minzcuz ceiq ndei. Raeuz hengzdingh gij yenzcwz aen Cungguek ndeu caeuq “gij nyinhrox doxdoengz goujngeih nienz”, aeu neix guh giek, caiq bae caeuq Daizvanh gak dangjbai、 gak gyaiqbied、gak gaihcwngz yinzsw gvangqlangh haeujlaeg bae doxyaeng gij vwndiz song hamq gvanhaeh caeuq guekgya dungjyiz, doengzcaez doidoengh song hamq gvanhaeh hozbingz fazcanj、gyavaiq yamqdin guekcoj hozbingz dungjyiz. Raeuz laebdaeb comzgiet gyoengq beixnuengx Daizvanh, giendingh haeujcoengh gij ligliengh gyaezguek dungjyiz ndaw Daizvanh, doengzcaez gaemndei aen fuengyiengq lizsij baenaj, soujmaenh gij cingqngeih minzcuz, giendingh fanjdoiq “Daizduz” coicaenh dungjyiz. Aen guekcoj hungmbwk raeuz ciengxlwenx ndaej vih sojmiz gyaezguek dungjyiz ligliengh cengjhwet rengzrwd!

Gyoengq beixnuengx song hamq lwed- meg doxrangh, dwg ranz vunz caemh goetyiet ndeu. Raeuz seizseiz gingqcungh、gvansim、hohfuk gyoengq beixnuengx Daizvanh, laeb- daeb roengzrengz bae coicaenh song hamq ginghci vwnzva gyaulouz doxgap, coihawj song hamq youq gak aen lingjyiz yungzhab fazcanj haeujlaeg, laebcaez gij cidu caeuq cwngcwz hawj beixnuengx Daizvanh ndaej fukfaenh engq lai, doidoengh song hamq caezcaemh hwngcienz Cunghvaz vwnzva, coicaenh song hamq beixnuengx simhoz doxngamj.

Siz Ginbingz youq ndaw baugau vixok, Daizvanh dwg aen Daizvanh Cungguek. Baenzlawz gaijgez aen vwndiz Daizvanh dwg gij saeh vunz Cungguek bonjfaenh, youz vunz Cungguek daeuj gietdingh. Raeuz dingjmaenh yungh gij caensim ceiq laux、caenh gij rengz ceiq hung bae ceng’aeu hozbingz dungjyiz, hoeng baenzlawz cungj mbouj wngqcingz mbouj yungh cungqbauq bae hoenx, caemhcaiq baujlouz gij gienzlig sawjyungh sojmiz banhfap noix mbouj ndaej haenx, gijneix dwg cimdoiq gij seiqlig rogguek capfwngz caeuq gig siujsoq “Daizduz” faenmbek fwnswj nem gij guhfap faenmbek gyoengqde, nyengh mbouj dwg cimdoiq gyoengq beixnuengx Daizvanh. Aen loekci guekgya dungjyiz、minzcuz fukhwng gingj baenaj foedfoed, guekcoj cienzbouh dungjyiz itdingh aeu guhbaenz, hix itdingh ndaej guhbaenz!

Siz Ginbingz daezok, coicaenh seiqgyaiq hozbingz caeuq fazcanj, doidoengh cauhlaeb aen minghyinh caezcaemh vunz lajmbwn

Siz Ginbingz youq ndaw aen baugau Ngeihcib Daih daezok, coicaenh seiqgyaiq hozbingz caeuq fazcanj, doidoengh cauhlaeb aen minghyinh caezcaemh vunz lajmbwn.

Siz Ginbingz youq ndaw baugau biujsiq, seizneix, seiqgyaiq、seizdaih、lizsij cungj cingqcaih fatseng bienqvaq, gij bienqvaq yienghsik de doenghbaez caengz raen gvaq. Aen fuengmienh ndeu, gij lizsij cauzliuz hozbingz、fazcanj、doxgap、caezhingz baenzlawz cungj dangj mbouj ndaej, simvunz maqmuengh、seizseiq baenaj, gietdingh diuzroen baihnaj vunzloih bietdingh yaek doeng haeuj giz ronghsagsag bae. Lingh aen fuengmienh, baengh ak haep nyieg、yaeuh aeu dued aeu、guh yiengh doxdax mbouj hingz couh baih daengj yienghsaeh hengzak hengzmanz hengzyak sienghaih gig laeg, doengh yiengh yungh lai haeuj noix cauhbaenz hozbingz yiemqsoq、fazcanj yiemqsoq、ancienz yiemqsoq、ceihleix yiemqsoq yied daeuj yied naek, aen biengz raeuz seizneix bungzdaengz gij diuhcan doenghbaez caengz miz gvaq. Seiqgyaiq caiq baez ndwn youq bakroen camca, yaek hawj lizsij byaij coh baihlawz, aeu youz gij yinzminz gak guek bae genjleh.

Cungguek itcig dawzmaenh aen vaigyauh cwngcwz aeu henhoh seiqgyaiq hozbingz、coicaenh doengzcaez hwngfat guh simmuengh codaeuz haenx, roengzrengz doidoengh cauhlaeb aen minghyinh caezcaemh vunz lajmbwn.

Siz Ginbingz youq ndaw baugau vixok, Cungguek giendingh ciuqhengz aen hozbingz vaigyauh cwngcwz doglaeb gag guhcawj, itcig yawj saehcingz bonjndang dwg deng dwg loek bae gietdingh gij lizcangz caeuq cwngcwz swhgeij, henhoh gij gihbwnj cunjcwz gozci gvanhaeh, henhoh gozci goengbingz cingq- ngeih, laemxsim bae fanjdoiq doengh gij bagenz cujyi caeuq giengzgienz cwngci sojmiz hingzsik, fanjdoiq gij swhveiz lwngjcan, fanjdoiq capfwngz luenh guenj gij saeh baihndaw guekwnq, fanjdoiq gienh saeh ndeu dingh song aen biucinj. Cungguek ciengxlwenx mbouj baengh gienzseiq heifouh guekwnq、ciengxlwenx mbouj ciemqaeu gij diegdeih guekwnq.

Siz Ginbingz youq ndaw baugau vixok, Cungguek dawzdingh youq aen giekdaej hozbingz caemhyouq haj hangh yenzcwz bae caeuq gak guek doxndei doxgap, doidoengh cauhlaeb gij gozci gvanhaeh yienghmoq, ciuq bingzdaengj、hailangh、gapguh bae riengz daengx biengz gapdoih, roengzrengz bae gyalai gij leih’ik guek raeuz caeuq gak guek doxgap doxrangh haenx. Coicaenh guek hung doxdaengh caeuq doxcoi hwngfat, doidoengh ndalaeb aen gvaenghgaq yiengh gvanhaeh guekhung hozbingz caemhyouq、cungjdaej onjdingh、bingzyaenx hwngfat. Dawzmaenh aen vaigyauh fuengcim caensim doxndei doxik bauyungz nem caeuq gij guekgya gekleiz doxndei、caeuq gij guekgya gekleiz guhdoih, gyalaeg caeuq doengh aen guekgya seiqhenz doxndei doxsaenq、leih’ik doxyungz. Dawzdingh gij leixniemh caensaed caensim caeuq gij gvanhnen gvendaengz cingqngeih leih’ik cingqdeng bae caeuq doengh aen guekgya cingqcaih fazcanj haenx lailai doxgiet gapguh, henhoh gij leih’ik caezcaemh doengh aen guekgya cingqcaih fazcanj de.

Cungguek dawzmaenh aen gihbwnj gozcwz doiq rog hailangh neix, giendingh ciuqhengz aen canloz hailangh doxleih caezhingz, mboujduenh aeu gij hwngfat moq Cungguek daezgung seizgei moq hawj daengx seiqgyaiq, doidoengh guhhwng yiengh ginghci mienhdoiq daengx seiqgyaiq hailangh haenx, hawj gak guek yinzminz ndaejleih ngoenz beij ngoenz lai. Cungguek dawzmaenh aen fuengyiengq cingqdeng ginghci lajmbwn doxning doxrangh, nyoengx hawj mouyiz caeuq douzswh bienq ndaej swyouz bienhleih, doicaenh song mbiengj、ranghdieg caeuq lai mbiengj doxgap, coihawj gij cwngcwz gozci hungzgvanh ginghci boiqhab habngamj, doengzcaez cauh’ok gij gozci vanzging doiq hwngfat mizleih haenx, doengzcaez ganqfat gij rengznyoengx moq hawj seiqgyaiq cungj ndaej hwngfat de, fanjdoiq gag guh baujhoh, fanjdoiq “cuk ciengz lanz loh”、“duet ngaeu daet lienh”, fanjdoiq mbiengj dog gag ceihcaiz、atnaenx daengzdaej bae. Cungguek nyienh gyalai douzcienz haeuj gij swhyenz ndaej coihawj seiqgyaiq hwngfat gapguh haenx, roengzrengz bae sukiq Namz Baek cengca, giendingh haeujcoengh caeuq bangcoh gij guekgya cingq- caih fazcanj de gyavaiq hwngfat.

（cienj banj 12）