（ciep banj 9）

Siz Ginbingz daegbied gangj daengz, doinyoengx aen dijhi caeuq gij bonjlingx guekgya ancienz yamq haeuj yendaiva, laemxsim henhoh guekgya ancienz caeuq ndawbiengz onjdingh

Siz Ginbingz youq ndaw aen baugau Ngeihcib Daih daegbied gangj daengz, doinyoengx aen dijhi caeuq gij bonjlingx guekgya ancienz yamq haeuj yendaiva, laemxsim henhoh guekgya ancienz caeuq ndawbiengz onjdingh.

Siz Ginbingz vixok, guekgya ancienz dwg aen goekdaej hawj minzcuz fukhwng, ndawbiengz onjdingh dwg aen diuzgen ndaej hawj guekgya hwnghoengh. Itdingh aeu giendingh mbouj bienq bae hengzguh aen swhsiengj daengxbuenz guekgya ancienz, gij hongsaeh Dangj caeuq guekgya fuengfueng mienhmienh daj goek daengz byai cungj aeu sien hawj guekgya ancienz, saedbauj guekgya ancienz ndawbiengz onjdingh.

Raeuz yaek seizseiz aeu yinzminz ancienz guh moegdik、aeu cwngci ancienz guh gaenbonj、aeu ginghci ancienz guh giekdaej、aeu ginhsw gohgi vwnzva sevei ancienz guh baujcang、aeu coihaeuj gozci ancienz guh dakbaengh, doengbuenz vehsuenq baihrog ancienz caeuq baihndaw ancienz、diegguek ancienz caeuq guekminz ancienz、yiengh ancienz doenghbaez caeuq yiengh ancienz mbouj lumj doenghbaez、yiengh ancienz bonjndang caeuq yiengh ancienz doengzcaez, doengbuenz vehsuenq bae henhoh dajcauh yiengh ancienz guekgya, cuknet aen giekdaej gihcwngz hawj guekgya ancienz caeuq ndawbiengz onjdingh, laebcaez aen gihci caeuqfaenh ceihleix gij ancienz daengx seiqgyaiq, hwnq baenz aen Cungguek bingzan daengz mbaek engq sang, aeu aen buenz bingzan moq bae baujcang aen buenz hwngfat moq.

It dwg laebcienz aen dijhi guekgya ancienz. Gaemmaenh aeu Dangjcunghyangh gyonjcomz lingjdauj gaiq hong hawj guekgya ancienz, caezcienz aen dijci lingjdauj guekgya ancienz engq mizyauq youh miz gienzvi. Dawzrem aen gihci gapfwngz caez guh gaiq hong hawj guekgya ancienz, caezcienz aen dijhi fapceih、aen dijhi canloz、aen dijhi cwngcwz、aen dijhi gamcaek yawhgingj fungyiemj、aen dijhi guenjleix dangqhaenq guekgya ancienz, cauxlaeb aen dijhi daengx buenz gapfwngz、aen daeb aen gig mizyauq bae fuengzre henhoh guekgya ancienz.

Ngeih dwg dem’ak gij bonjlingx henhoh guekgya ancienz. Mbouj doengh mbouj ngauz bae henhoh guekgya cwnggenz ancienz、cidu ancienz、yisiz hingzdai ancienz, gyaak gij bonjsaeh hawj gij lingjyiz cungdenj ancienz, saedbauj haeuxgwn、nwngzyenz swhyenz、diuzlienh canjnieb diuzlienh gung’wngq youq- gaenj mbouj ok saeh, gyaak gij bonjsaeh baujcang youq rog guek ndaej ancienz, henhoh gij gienzik habfap doengh boux gunghminz、fazyinz guek raeuz youq rog guek haenx, henhoh gij gienzik haijyangz, baenzbaenz cungj aeu henhoh gij cawjgienz、ancienz、leih’ik hwngfat guekgya. Cienzmienh gyarengz sonrox baenzlawz hawj guekgya ancienz, hawj gak gaep lingjdauj ganbu lai rox doengbuenz bae maeuzveh hwngfat caeuq ancienz, hawj daengxcungq yinzminz lai rox baenzlawz guhbaenz guekgya ancienz, cukmaenh faj ciengz baengh yinzminz henhoh guekgya ancienz.

Sam dwg gyaak gij bonjlingx ceihleix doengh gij ancienz caezcaemh. Gaemmaenh ancienz daih’it、yawhfuengz guhdaeuz, laebhwnj aen gvaenghgyaq daih ancienz daih dangq- haenq, caezcienz aen dijhi yiengh ancienz caezcaemh, doinyoengx yiengh guhfap guenjleix gij ancienz caezcaemh cienj baenz yawhfuengz doekgonq. Lai ak baujcang fuengz cai gemj cai gouq cai caeuq cawqceq gij saehgaenj saehnanz saehyiemj caezcaemh sawqmwh miz ok, lailai gyaak gij rengz dangqhaenq guekgya caeuq ranghdieg. Gyahaenq gamguenj gijgwn gijyw ancienz, laebcienz aen dijhi gamguenj yawh- gingj fuengzhaed swnghvuz ancienz. Gyarengz henhoh gij saenqsik gagboux.

Seiq dwg caezcienz aen dijhi ceihleix ndawbiengz. Laebcienz aen cidu ceihleix ndawbiengz baenz yiengh caezlaeb caezguenj caezyungh, hawj ceihleix ndawbiengz raen ndei engq lai. Guh doeng roenloh hawj beksingq haeuj cingq haeuj soh bae gangj ok iugouz、hezdiuz leih’ik、baujcang gienzik, ciuqfap yiemzfad gak yiengh famhfap famhcoih cungq- vunz fanjyingj haenqrem haenx. Lai gya vunz daeuj caeuqfaenh caez fuengz caez guenj, cauhbaenz yiengh heiqfaenh raen saeh cingqngeih gamj bae guh, hawj gij rengz ceihleix ndawbiengz gapbueng baenzgyoengq, guh daengz bouxboux dawzrap、vunzvunz caenh- rengz、caez ndei caez ndaej.

Siz Ginbingz daezok, guhbaenz aen moegbiu buekguh laebbaenz bingdoih bak bi, hai ok aen gizmen moq gozfangz caeuq bingdoih yendaiva

Siz Ginbingz youq ndaw aen baugau Ngeihcib Daih daezok, guhbaenz aen moegbiu buekguh laebbaenz bingdoih bak bi, hai ok aen gizmen moq gozfangz caeuq bingdoih yendaiva.

Siz Ginbingz youq ndaw baugau vixok, ciuqseiz guhbaenz aen moegbiu buekguh laebbaenz bingdoih bak bi, gyavaiq dawz aen bingdoih yinzminz hwnqbaenz aen bingdoih lajmbwn ceiq ak, dwg aen canloz cienzmienh hwnqbaenz aen guek sevei cujyi yendaiva iugouz baenzneix guh. Itdingh aeu gvancez aen swhsiengj ak bing seizdaih moq Dangj raeuz, gvancez diuz canloz fuengcim bingsaeh seizdaih moq, dawzmaenh seizseiz yienghyiengh aeu Dangj lingjdauj aen bingdoih yinzminz, dawzmaenh baengh cwngci laeb bing、baengh gaijgwz ak bing、baengh gohgi ak bing、baengh vunzcaiz ak bing、baengh faplwd guenj bing, dawzmaenh doq doucwngh、doq bwhhoenx、doq hwnq ndei, dawzmaenh gihgaiva sinsizva cinwngzva yungzhab hwngfat, gyavaiq hawj gij lijlun bingsaeh、gij cujciz hingzdai bingdoih、doengh boux guh bingsaeh、vujgi canghbei cungj gaen hwnj seizdaih, gyarengz hawj bingdoih ak daj gwnz canloz bae henhoh gij cawjgienz、ancienz、leih’ik hwngfat guekgya, dawz ndei diuz rap aen bingdoih yinzminz seizdaih moq.

Siz Ginbingz youq ndaw baugau daegbied gangj daengz, cienzmienh gyarengz youq ndaw bingdoih yinzminz guhhung guh’ak aen Dangj, saedbauj bingdoih ciengxlwenx dingq Dangj cijveih. Laebcienz gij dijci gihci gvancez aen cidu ginhveij cujsiz fucwz. Gyalaeg aeu gij lijlun cauhmoq daeuj gyaak Dangj raeuz, bae guh gij yienghsaeh sonrox saedguh “hagsib aen swhsiengj ak bing、laebgoeng aen saehnieb ak bing”. Gyarengz hagsib sonrox lizsij bingdoih, guhhoengh gij vwnzva ak bing, roengzrengz ganq ok gij cingsaenz ak hoenx. Laebhwnj guh’ak gij cujciz dijhi Dangj raeuz nda youq ndaw bingdoih yinzminz haenx, nyoengxhaeuj gaiq hong cwngci guenj bing lienh bing ndaej baenz cidu ciengzseiz bae guh, mbouj dingz mbouj duenh cingq fungheiq yiemz gijliz fanj nduknaeuh.

Cienzmienh gyarengz bae lienh bing bwh hoenx, hawj bingdoih yinzminz ak dwk ak hingz. Yenzgiu gaemdawz gij lohsoq caeuq daegdiemj baengh sinsiz cinwngz dwkciengq, guhmoq ginhsw canloz cijdauj, lai ok gij canloz cansuz yinzminz cancwngh. Dajcauh aen dijhi gij ligliengh canloz haephwk hung’ak, gyalai aen faenhliengh gij ligliengh lingjyiz moq singqcaet moq hoenxciengq, gyavaiq hwngfat gij ligliengh cinwngz hoenxciengq mbouj yungh vunzhaenx, doengbuenz vehsuenq hwnqguh caeuq yinh- yungh aen dijhi vangjloz saenqsik. Haeujlaeg ciuq gij biucinj caensaed hoenxciengq bae lienhbing, dawz gij hongsaeh lienzhab lienhbing、doiqdingj lienhbing、gohgi lienhbing guh haeujlaeg bae. Roengzrengz hawj ligliengh bingsaeh ndaej ciuqciengz youh doenggvaq lai yiengh bae yungh, giendingh youh lingzvued bae guh ginhsw doucwngh, cauh’ok yiengh seiq- daeuz ancienz, atnaenx goekhux haeddingz dox- dawz, hoenxhingz gij ciengq mbangj giz mbangj dieg.

Cienzmienh gyarengz ceihleix bingsaeh, gyamaenh gyahung gij cwngzgoj gaijgwz gozfangz caeuq bingdoih, laebcaez gij gezgou caeuq cujciz benhci aen ligliengh bingsaeh, daj cingjdaej baenzroix bae gaijndei gij cwngcwz cidu bingsaeh. Gyarengz coengz hoenx、laeb、bwh doengbuenz bae maeuzveh gaiq yinvu hungnaek guh’ak gozfangz caeuq bingdoih, gyavaiq guhbaenz gij houginz ndaej gaen hwnj seizdaih, guh gij gunghcwngz hungnaek gozfangz gohgi caeuq vujgi canghbei, gyavaiq gohyoz gisuz cienjbaenz ligliengh hoenxciengq. Gyalaeg gaijgwz gij yenyau bingdoih, laebmaenh aen dijhi gungganq gij vunzcaiz bingsaeh yiengh- moq, yungh banhfap moq bae guenjleix gij vunz ndaw bingdoih. Gyarengz laeb caez guh ndei aen gihci ciuqfap guenj bing caeuq guh canloz gveihva, caezcienz aen dijhi ciuqfap guenjleix bingsaeh miz gij daegsaek Cungguek haenx.

Gyamaenh gyaak aen dijhi caeuq gij bonjlingx guekgya itcaez maeuzveh hongsaeh daengxbuenz. Gaij ndei caeuq nda ndei gozfangz gohgi gunghyez, gyarengz guh ak gozfangz gohgi gunghyez. Son hawj vunzlai bouxboux cungj rox gij saeh gozfangz. Gyarengz guh ndei gozfangz dungyenz caeuq nda’nduengq gij rengz bwhlaeng, nyoengx haeuj gaiq hong guhmaenh gij henzguek、dieghaij、gwnzmbwn、gozfangz ciuhneix. Gyarengz aeu mingzdaeuz bae gikcoi caeuq baujcang gij gienzik bouxbing nem gij vunz ndaw ranz de, guh ndei gij hong fugsaeh baujcang bouxbing duiyiz. Gyamaenh gyalai bingdoih caeuq cwngfuj、bouxbing caeuq beksingq doxgiet.

（cienj banj 11）