（ciep banj 8）

Sam dwg laebcienz aen dijhi hawj yiengh baujcang ndawbiengz. Laebcienz aen dijhi hawj yiengh baujcang ndawbiengz lai mbaek bouxboux ndaejdaengz、singz mbanj doengz buenz、goengbingz doengzcaez、onjcaenz cingqgvi、lienzdaemh laebdaeb. Caezcienz aen cidu daengx guek doengz buenz vehsuenq yiengh baujyiemj ciengxlaux dakdaej, laebhwnj aen dijhi hawj yiengh baujyiemj ciengxlaux caengzmbaek lai、dieg baengh lai. Saedhengz aen cwngcwz cug bi ietraez aen nienzgeij duiyouh fapdingh. Gyalai gyoengqvunz ndaej daengz yiengh baujyiemj ndawbiengz, laebcienz aen gihci couzcienz hawj yiengh baujyiemj ciengxlaux dakdaej、yiengh baujyiemj ywbingh dakdaej caeuq diuzcingj gij dakdaih baujyiemj, doinyoengx sengjgaep daengxbuenz vehsuenq yiengh baujyiemj ywbingh dakdaej、yiengh baujyiemj duenhhong、yiengh baujyiemj hongsieng. Coihawj gij baujcang ywbingh lai mbaek haenx miz bouhloh hamzciep, caezcienz aen cidu baujyiemj binghnaek caeuq yihliuz gouqbang, guh daengz youq dieg wnq ywbingh cigsoh gietsuenq cienzyw, laebhwnj aen cidu yiengh baujyiemj ciengzgeiz ganqyawj, lai ok yiengh baujyiemj ywbingh sanghyez. Gyavaiq laebndei aen bingzdaiz caezcaemh yiengh fugsaeh baujyiemj ndawbiengz daengx guek doengzcaez. Laebcienz aen dijhi hawj sebauj gihginh mbouj bienqcienh、lai dijcienz caiqlij gamguenj onjcaenz. Laebcienz aen dijhi ndawbiengz banggouq faen mbaek faen loih. Gaemmaenh aen gihbwnj gozcwz saimbwk bingzdaengj, baujcang gij gienzik habfap mehmbwk lwgnyez. Caezcienz gij cidu baujcang ndawbiengz bouxndangcanz caeuq aen dijhi gvansim in’gyaez fugsaeh, coihawj saehnieb bouxndangcanz cienzmienh hwngfat. Dingj- maenh aen dinghvih ranz dwg aeu daeuj youq、mbouj dwg aeu daeuj cauj, gyavaiq laebhwnj yiengh cidu ranzyouq miz lai aen cawjdaej gunghawj、lai diuz miengloh baujcang caiqlij co cawx caemh ndaej.

Seiq dwg hwnqguh aen Cungguek cangqheiq caiq guh ndei baenaj. Aeu dawz baujcang yinzminz cangqheiq cuengq daengz gwnz canloz daeuj guh gonq, caezcienz gij cwngcwz hawj yinzminz engqgya cangqheiq. Gaijndei aen canloz hawj yinzgouj demlai dem ndei, laebhwnj aen cwngcwz dijhi haeujcoengh senglwg, gyangqdaemq gij bonjcienz senglwg、ganqciengx、gyauyuz. Hengzguh aen canloz guekgya lai rox lai ak wngqdoiq bouxgeq bienq lai, lai guh gij saehnieb ciengxlaux caeuq gij canjnieb ciengxlaux, engq ndei bae fugsaeh gyoengq bouxgeq gadog caeuq bouxgeq baenzmaiq, hawj daengxcungq bouxgeq cungj caenhvaiq ndaej daengz yiengh fugsaeh ciengxlaux dakdaej. Gyalaeg gaijgwz aen dijci yihyoz veiswngh, coihaeuj yihbauj、yihliuz、yihyoz ndaej doxgap guh ndei caeuq ceihleix. Vaiq hawj gij yihliuz swhyenz ndei gyalai demgvangq caiqlij baij yinz ndaw ranghdieg, gaemmaenh yawhfuengz guhgoek, gyarengz guenj ndei gij yienghsaeh hawj binghnaek binghmansing noixok caeuq ndeidauq, hawj gihcwngz engq ak fuengz bingh yw bingh engq rox bae guh ndei yiengh saeh ndangcangq. Aeu yiengh goeng’ik dazyinx gyalaeg gaijgwz gij yihyen goenglaeb, hawj gij yihyen biengzhai haeuj cingq haeuj soh hwngfat. Guhhung guhhoengh aendoih yihliuz veiswngh, comz- rengz comzhong haeuj lajmbanj、segih. Yawj- naek ndaw sim cangqheiq caeuq cingsaenz swnhsoeng. Coihawj cunghyihyoz ndaej cienzciep cauhmoq hwngfat. Cauhmoq aen gihci yw fuengz doxgap、yw fuengz yungzhab, laebcienz aen dijhi gunghgung veiswngh, gyaak gij bonjlingx caenhcaeux yawj ok binghraq yaek fat, gyarengz hwnqguh aen dijhi fuengzhaed gouqyw caeuq gij bonjsaeh gaenjgip wngqdoiq binghraq hungnaek, mizyauq bae naenxhaed gij binghlah hungnaek cienzlah. Haeujlaeg hengzguh gij yienghsaeh aen Cungguek cangqheiq caeuq gij yienghsaeh veiswngh gyaezguek, hemqheuh caezgya caemhcaiq lingxdaeuz bae gvaq yiengh saedceij cangqheiq vwnzmingz.

Siz Ginbingz daezok, doidoengh yiengh hwngfat loegsaek, coihawj bouxvunz caeuq swhyienz huzndei caemhyouq

Siz Ginbingz youq ndaw aen baugau Ngeihcib Daih daezok, doidoengh yiengh hwngfat loegsaek, coihawj bouxvunz caeuq swhyienz huzndei caemhyouq.

Siz Ginbingz vixok, vunz raeuz baengh daihswhyienz cijndaej lixyouq caeuq hwngfat. Gingqcungh swhyienz、swnh’wngq swhyienz、henhoh swhyienz, dwg gij iugouz ok laeng cienzmienh hwnqguh aen guekgya sevei cujyi yendaiva. Itdingh aeu laebmaenh caeuq saedhengz aen leixniemh raemx saw bya heu couh dwg bya gim bya ngaenz, ndwn youq vunz riengz swhyienz doxhuz caemhyouq gizsang yienghneix bae maeuzveh hwngfat.

Raeuz aeu nyoengxhaeuj gaiq hong hwnqguh aen Cungguek gyaeundei, gaem- maenh doiq bya raemx ndoeng naz huz nywj sa guh gyoepgyonj henhoh caeuq guh baenzroix ceihleix, doengbuenz couzveh bae diuzcingj aen gezgou canjnieb、ceihleix uqlah、baujhoh swnghdai、wngqdoiq dienheiq bienqvaq, doxgap doihaeuj gyangq danq、gemj uq、dem heu、demmaj, doihaeuj yiengh hwngfat hen swnghdai gonq、giemhmbaet gyonjconz、loegsaek danq- noix.

It dwg gyavaiq hawj yienghsik hwngfat cienjbaenz loegsaek. Gyavaiq doinyoengx diuzcingj gaijndei gij gezgou canjnieb、gij gezgou nwngzyenz、gij gezgou gyaudoeng daehyinh daengj. Hengzguh aen canloz yienghyiengh mbaetyungh, giemhmbaet gyonj- conz bae leihyungh gak loih swhyenz, gyavaiq laebhwnj aen dijhi sinzvanz leihyungh huqfeiq. Caezcienz gij cwngcwz caeuq gij dijhi biucinj caizsui、ginhyungz、douzswh、gyagwz ndaej haeujcoengh yiengh hwngfat loegsaek, lai guh gij canjnieb loegsaek danqnoix, laebcienz aen dijhi hawj hawciengz bae boiqceiq swhyenz vanzging yausu, gyavaiq yenzgiu haifat caeuq doigvangq wngqyungh gij gisuz senhcin mbaet nwngz gyangq danq, hemqheuh caezgya caiqlij lingxdaeuz guh yiengh siufeiq loegsaek, doinyoengx cauxbaenz loegsaek danqnoix bae guh swnghcanj caeuq gvaq saedceij.

Ngeih dwg haeujlaeg doihaeuj gaiq hong fuengzceih vanzging uqlah. Laebdaeb haeujlaeg bae dwk ndei ciengz ciengq henhoh mbwn lamz、raemx saw、namh seuq. Gyarengz gapdoih gaemhanh doxgaiq uqlah, daihdaej siucawz gij dienheiq uqlah youqgaenj. Doengbuenz dingh geiq ceihleix swhyenz raemx、vanzging raemx、swnghdai raemx, doinyoengx henhoh ceihleix gij swnghdai dah huz suijgu youqgaenj, daihdaej siucawz gij raemx ndaem raemx haeu hawsingz. Gyarengz fuengzre gaemhanh giz goek doemnamh uqlah, doenghfwngz ceihleix gij doxgaiq uqlah moq. Engq ndei bae hwnqguh gij sezsih giekdaej vanzging, doihaeuj cingjceih gij vanzging vunz youq hawsingz lajmbanj.

Sam dwg hawj swnghdai hidungj engq lai yiengh、engq onjdingh、engq lienzdaemh. Gyavaiq guh gaiq hongloet henhoh caeuq coihdauq gij swnghdai hidungj youqgaenj. Doihaeuj hwnqguh aen dijhi gizdieg henhoh swhyienz aeu guekgya gunghyenz guh goek de. Hengzguh gaiq hongloet henhoh doenghgo doenghduz lai cungj lai yiengh. Gohyoz dwk baenz ndoeng baenz benq bae ndaem heu diegguek. Gyalaeg gaijgwz aen cidu gienz- ndoeng cizdij. Lailai hawj diegnywj ndoengfaex nem dah huz diegcumx yietnaiq ciengx rengz, guh ndei gaiq hong youq Dahcangzgyangh gimq dwk cib bi, guhcaez aen cidu dingz raeq lwnz ndaem reihnaz. Laebhwnj aen gihci hawj gij canjbinj swnghdai canhcienz, caezcienz aen cidu boizbouj henhoh swnghdai. Gyarengz guenjleix swnghvuz ancienz, fuengzceih doenghgo doenghduz guekrog daeuj ciemqhaih.

Seiq dwg lai gaenx lai onj bae doihaeuj danqdaemxdingj danqcunghuz. Gaengawq gij nwngzyenz swhyenz ndeiyaez guek raeuz, hengzdingh sien laeb caiq buq, miz giva baen yamq bae guh danqdaemxdingj. Caezcienz aen cidu gaemhanh aen cungjliengh caeuq gij ndaetsoeng hauqsied nwngzyenz, comzrengz gaemhanh vasiz nwngzyenz siufeiq, cugyamq cienj yiengq gaemhanh aen cungjliengh caeuq yunghliengh danq baizcuengq “song yiengh caez hanh”. Doinyoengx nwngzyenz gwzming haeujlaeg, lailai cinghseuq caeuq engq mizyauq bae leihyungh meizdan, roengz rengzhung damqra haifat caeuq dem cwk canj ok youzheiq, gyavaiq gveihva laebhwnj aen dijhi nwngzyenz moq, doengbuenz vehsuenq bae haifat dienhraemx caeuq henhoh swnghdai, gaenxmaij onjcaenz miz bouhloh bae hwnqguh hwzden, gyarengz laeb ndei aen dijhi swnghcanj gunghawj cwkrom siugai nwngzyenz, saedbauj nwngzyenz ancienz. Laebcienz aen cidu gyoebsuenq haedsuenq danq baizcuengq, laebcienz aen cidu youq hawciengz gaicawx gij gienz baizcuengq danq. Lai hawj swnghdai hidungj ak bae sup danq. Lailai caeuqfaenh daengx seiqgyaiq ceihleix wngqdoiq dienheiq bienqvaq.

（cienj banj 10）