（ciep banj 7）

Raeuz aeu dawzmaenh aen cidu gaenbonj youq ndaw lingjyiz yisiz hingzdai yungh Majgwzswh Cujyi daeuj cijdauj, dawzmaenh fugsaeh yinzminz、fugsaeh sevei cujyi, dawz- maenh bak va caez hai、bak gya caez lwnh, dawzmaenh doenggvaq dajcauh bae cienjvaq、cauhmoq bae fazcanj, aeu aen hwzsinh gyacizgvanh sevei cujyi daeuj dazyinx, fazcanj yiengh vwnzva senhcin sevei cujyi, hwngcienz gij vwnzva gwzming, cienzciep gij vwnzva conzdungj maenhndei Cunghvaz, hawj gij cingsaenz vwnzva yinzminz aeuyungh ngoenz beij ngoenz demlai haenx ndaej gaeuq yungh, gyamaenh aen giekdaej swhsiengj caezcaemh daengx Dangj daengx guek gak cuz yinzminz caemh dungxsim buekguh, mboujduenh daez- swng gij vwnzva saedlig’unq guekgya caeuq gij rengzyingjyangj Cunghvaz vwnzva.

It dwg cauhlaeb yiengh yisiz hingzdai sevei cujyi miz rengzgietcomz caeuq rengz- dazyinx hung’ak haenx. Gaemndaet aen gienz Dangj lingjdauj gij hong yisiz hingzdai, cienzmienh guh ndei aen cidu doekdingh faenh hong yisiz hingzdai, gyamaenh guh’ak aen swhsiengj yizlun dazgoek buekhaeuj seizdaih moq. Laeb caezcienz gij gunghcoz dijhi yungh gij lijlun cauhmoq aen Dangj daeuj cangndei daengx Dangj、son’gyauq yinzminz、dazyinx guh saeh. Dawz gij hongsaeh hung yenzgiu caeuq guhndei Majgwzswh Cujyi lijlun guh baenaj, gyavaiq cauhlaeb gij yozgoh dijhi、gij yozsuz dijhi、gij gangjvah dijhi yiengh cezyoz sevei gohyoz miz gij daegsaek Cungguek haenx, gungganq cauhhung aendoih vunzcaiz cezyoz sevei gohyoz. Lai roengzrengz cauhlaeb aen dijhi cenzmeizdij cienzboq, dajcauh aen gapgyaq moq yiengh baklinx lingxdaeuz. Laebcaez aen dijhi gyoebhab ceihleix vangjloz, coihawj vangjloz cangqheiq hwngfat.

Ngeih dwg gvangqlangh hengzguh aen hwzsinh gyacizgvanh sevei cujyi. Hwngcienz yiengh cingsaenz megloh vunz Cunghgoz Gungcanjdangj aeu gij cingsaenz laeb Dangj hungmbwk guh goek haenx, yungh ndei gij swhyenz hoengzsaek, lai guh gaiq hong cienzboq son’gyauq aen hwzsinh gyacizgvanh sevei cujyi, lai son’gyauq aigoz cujyi、cizdij cujyi、sevei cujyi, roengzrengz gungganq gij vunz moq ndaej dawz diuz rapnaek minzcuz fukhwng hab seizdaih aeuyungh. Coihawj gij hong son’gyauq lijsiengj saenqniemh bienq- baenz cidu ciengzseiz bae guh, laebdaeb ca ndei gij hong cienzboq son’gyauq lizsij aen Dangj、lizsij Cungguek moq、lizsij gaijgwz hailangh、lizsij hwngfat sevei cujyi, dazyinx yinzminz rox lizsij gyaez aen Dangj、rox lizsij gyaez guekcoj, mboujduenh dinghmaenh gij lijsiengj caezcaemh sevei cujyi miz gij daegsaek Cungguek.

Sam dwg hawj daengx biengz vwnzmingz caiq hwnj mbaek sang. Bae guh hangh hong hung daudwz ganq vunz, hwngcienz gij conzdungj meijdwz Cunghvaz, gyarengz guh ndei gyadingz gya’gyauq gyafung, gyaak caeuq gaijndei bouxcaengzhung swhsiengj daudwz gensez, doihawj cungqvunz hwngcienz daudwz hung、souj daudwz caezcaemh、yungh daudwz haed yiemz bonjfaenh, hawj yinzminz engq rox dauhlaex caeuq engq gangj vwnzmingz. Doengbuenz bae guh ndei gij saeh gungganq vwnzmingz、saedguh vwnzmingz、cauhlaeb vwnzmingz, coihawj hawsingz lajmbanj cing- saenz vwnzmingz gensez ndaej yungzhab guh baenaj, youq daengx biengz hwngcienz gij cingsaenz guhhong、gij cingsaenz buekguh、gij cingsaenz gunghawj、gij cingsaenz dajcauh、gij cingsaenz gaenxgiemh mbaetyungh, gungganq yienghndei yienghmoq ciuhneix.

Seiq dwg guhhoengh guhhwng aen saehnieb vwnzva caeuq aen canjnieb vwnzva. Dawzmaenh cungj yinxyiengq dajcauh cozbinj aeu yinzminz guh goek, cauh ok gij cozbinj maenhndei hawj yinzminz miz rengz cingsaenz engq lai haenx, rungx ok buek canghcaiz vwnzyoz yisuz sawmaeg lai youh rox laexhung ndeu caeuq aendoih vunzcaiz vwnzva vwnzyi lailai daihdaih haenx. Laebcaez aen dijhi yiengh fugsaeh vwnzva vunzlai caezcaemh, cauhmoq saedhengz gij hong hung vwnzva ndeileih beksingq. Laebcaez aen dijhi canjnieb caeuq aen dijhi hawciengz nangq daengz vwnzva ciuhneix, hengzguh aen canloz aeu vwnzva canjnieb hanghmoeg hungnaek bae daiqdoengh. Gya rengz baujhoh vwnzvuz caeuq vwnzva yizcanj, youq mwh hwnqguh hawsingz lajmbanj bae baujhoh ciepswnj lizsij vwnzva, hwnq ndei yungh ndei gij vwnzva gunghyenz guekgya. Gyarengz bae guh gij hong dijyuz bouxcoz nyezrauh, coihawj cungj dijyuz vunzlai guh caeuq cungj dijyuz doxdax doxcaez fatmaj, gyavaiq hwnqguh aen guekak dijyuz.

Haj dwg hawj Cunghvaz vwnzmingz cienzboq engq gyae yingjyangj engq hung. Dawzmaenh aen sim nyinh Cunghvaz vwnzva, dizlienh baij ok gij maigeiq cingsaenz caeuq gij ukngviz vwnzva Cunghvaz vwnzmingz, gyavaiq cauhlaeb aen dijhi gangjvah Cungguek caeuq lwnhsaeh Cungguek, gangj ndei gojgaeq Cungguek、cienzboq ndei singyaem Cungguek, baij ok gij yienghsiengq simsoh、dwggyaez、habgingq Cungguek. Gyarengz guh ak gij rengzlig cienzboq bae rogguek, hawj cienzboq bae rogguek guh ndaej engq riuz, coengh guek raeuz baengh gij cunghab gueklig caeuq diegvih guekgya youq gwnz seiqgyaiq ndaej gangj lai gangj gok. Hawj vwnzmingz gyaulouz doxhag yied guh yied lai, coihawj Cunghvaz vwnzva engq ndei byaij coh seiqgyaiq.

Siz Ginbingz daezok, demlai fukfaenh hawj yinzminz, hawj saedceij yinzminz gvaq ndaej engq ndei

Siz Ginbingz youq ndaw aen baugau Ngeihcib Daih daezok, demlai fukfaenh hawj yinzminz, hawj saedceij yinzminz gvaq ndaej engq ndei.

Siz Ginbingz naeuz, guekgya couh dwg yinzminz, yinzminz couh dwg guekgya. Cunghgoz Gungcanjdangj daiqlingx yinzminz dwk biengzdeih、souj biengzdeih, dwg souj aen sim yinzminz. Guenj guekgya miz lohsoq, leih yinzminz dwg goekgaen. Vih yinzminz caux fuk dwg gij bonjcaet iugouz laeb Dangj vih vunzlai、gaemgienz vih lwgminz. Itdingh aeu dawz- maenh youq mwh hwngfat baujcang caeuq gaijndei gwndaenj yinzminz, gujli doxcaez haenqrengz dajcauh gij gwndaenj gyaeundei, mboujduenh guhbaenz gij siengjmuengh yinzminz gvaq saedceij gyaeundei.

Raeuz aeu saedyienh ndei、 henhoh ndei、 fazcanj ndei gij gaenbonj leih’ik gyoengq yinzminz ceiq lai, gaemndaet doengh gij vwndiz nanangq gij leih’ik yinzminz ginzcung ceiq gvansim ceiq cigciep ceiq yienhsaed haenx, seizseiz aeu caenhrengz bae guh、aenq rengz bae guh, haeuj gyang ginzcung bae、roengz daengz caengzgiek bae, yungh engq lai banhfap ndaej leih yinzminz、raeuj simvunz haenx, roengzrengz bang yinzminz ginzcung gaijgez ndei gij saeh gaenjgip、hojnanz、youheiq、deqmuengh haenx, laebcaez aen dijhi yiengh fugsaeh vunzlai caezcaemh ceiqnoix, engq ndei bae fugsaeh vunzlai, hawj de engqgya bingzyaenx caeuq engq heih guhdaengz, maenhsaed doihaeuj yamqdin doengzcaez fouqmiz.

It dwg laebndei aen cidu faenboiq. Dawzmaenh ciuq hong faenboiq guh goek、lai yiengh faenboiq fuengsik caemhmiz, cauhlaeb gij cidu dijhi baez faenboiq daih’it、baez faenboiq daihngeih、baez faenboiq daihsam doxdaengh boiqdauq haenx. Roengzrengz hawj aen cingzsoq gihminz souhaeuj youq ndaw gozminz souhaeuj faenboiq bienq sang, hawj aen cingzsoq guhhong aeundaej youq ndaw baez faenboiq daih’it bienq sang. Dawzmaenh guh lai ndaej lai, gujli gaenxguh ndaej fouq, coicaenh gihvei goengbingz, demlai gij souhaeuj doengh boux souhaeuj noix, gyalai gyoengq vunz souhaeuj gaepgyang. Gveihfan gij bouhloh faenboiq souhaeuj, gveihfan aen gihci cwkrom cienzcaiz, baujhoh gij souhaeuj habfap, diuzcez gij souhaeuj sang gvaqbouh, gimqcawz gij souhaeuj mbouj habfap.

Ngeih dwg saedhengz aen canloz couhnieb baiz youq gonq. Aeu lai dawznaek gij cwngcwz couhnieb guh youq gonq, laebcaez aen gihci coicaenh couhnieb, hawj couhnieb guh ndei guh maenh. Laebcaez aen dijhi yiengh fugsaeh vunzlai couhnieb, caezcienz aen dijhi haeujcoengh gyoengqvunz cungdenj rahong, lai bangcoengh gyoengqvunz gungzhoj rahong baujdaej. Doengbuenz nda ndei aen cwngcwz dijhi couhnieb hawsingz lajmbanj, buqcawz gij dijci caeuq cwngcwz mbouj gaeuq ndei gazngaih bouxguhhong、vunzcaiz riuzdoengh haenx, siucawz gij hanhhaed mbouj hableix caeuq gij couhnieb yawjsiuj gazngaih bingzdaengj couhnieb haenx, hawj bouxboux cungj ndaej doenggvaq gaenx guhhong hawj bonjfaenh yied gvaq yied ndei. Laebcienz aen cidu baenzciuh sonrox gij dinfwngz ciknieb, doinyoengx gaijgez yiengh doxdawz couhnieb ok laeng gezgou. Caezcienz gij cidu baujcang hawj cauhnieb ragdoengh couhnieb, bang- coengh haeujsoh bae gyalai yiengh hong moq couhnieb. Laebcienz gij faplwd fapgvi guhhong, caezcienz gij gihci caezyaeng diuzndei gij gvanhaeh guhhong, caezcienz aen cidu bauj- cang gij gienzik bouxhong, gyarengz baujcang gij gienzik bouxhong yawj giz genj hong couhnieb caeuq youq ndaw yiengh hong moq couhnieb.

（cienj banj 9）