（ciep banj 5）

Siz Ginbingz daegbied gangj daengz, raeuz aeu gaemmaenh aen cawjdaez coihawj yiengh hwngfat caetliengh sang neix guh baenaj, dawz saedhengz aen canloz gyadaih gij aeuyungh ndaw guek caeuq gyalaeg gaijgwz gij gezgou mbiengj gunghawj ndeindei giethab hwnjdaeuj, hawj aen loek ndaw guek baenqcienj de engq gag miz rengz bae baenq caemhcaiq baenq ndaej ndeindup, hawj aen loek seiqgyaiq baenqcienj de baenq ndaej ndei youh vaiq, gyavaiq laebguh aen ginghci dijhi yendaiva, roengzrengz daezsang gij swnghcanjliz sojmiz yausu, roengzrengz hawj diuzlienh canjnieb caeuq diuzlienh gunghawj engq naihniu caeuq engq ancienz, roengzrengz doinyoengx singz mbanj yungzhab caeuq gvaengxdieg doxdaengh hwngfat, doinyoengx ginghci guh daengz caetliengh hwnj mbaek caeuq soqliengh hableix demmaj.

It dwg cauhlaeb aen dijci yiengh hawciengz ginghci sevei cujyi suijbingz sang. Dingjmaenh caeuq laebndei gij ginghci cidu giekbonj sevei cujyi, mbouj doenghngauz saekdi bae gyamaenh caeuq hwngfat yiengh ginghci gunghyoujci, mbouj doenghngauz saekdi bae gujli、haeujcoengh、dazyinx gij ginghci mbouj dwg gunghyoujci haenx hwngfat, lailai hawj hawciengz bae gietdingh swhyenz ndaboiq, engq ndei langh gij rengz cwngfuj okdaeuj.

Ngeih dwg hwnqguh aen canjnieb dijhi habngamj seizdaih. Dingjmaenh lai cuengq rengz haeuj yiengh ginghci saeddaej bae hwngfat ginghci, doinyoengx gij gunghyezva yienghmoq guh baenaj, gyavaiq hwnqguh aen guek cauhguh ak、aen guek caetliengh ak、aen guek hangzdenh ak、aen guek gyaudoeng ak、aen guek vangjloz ak、aen Cungguek soqcih.

Sam dwg cienzmienh doicaenh guhhoengh lajmbanj. Dawzdingh guhhoengh nungzyez lajmbanj gonq, dawzdingh singz mbanj yungzhab hwngfat, hawj gij yausu singz mbanj riuzdoengh doengrat. Netsaed doinyoengx guhhoengh gij canjnieb、vunzcaiz、vwnzva、swnghdai、cujciz lajmbanj. Daj gak fuengmienh bae cuknet aen goekdaej haeuxgwn ancienz, soujmaenh diuz sienqhoengz cibbet ik moux reihnaz. Gyalaeg gaijgwz gij cidu diegdeih lajmbanj, hawj nungzminz miz gienzik caizcanj engq lai. Baujcang gij gienzik diegdeih habfap gyoengq nungzminz haeuj singz an’gya haenx, gujli ciuqfap gagnyienh soucienz le cienj- nyiengh.

Seiq dwg coihawj gvaengxdieg dox- daengh hwngfat. Haeujlaeg saedhengz aen canloz gvaengxdieg doxdaengh hwngfat、aen canloz hungnaek gvaengxdieg、 aen canloz cujdij gunghnwngzgih、aen canloz cwngzcinva yienghmoq, gaijndei gij baijbouh swnghcanjliz hungnaek, cauhlaeb yiengh baijbouh ginghci gvaengxdieg caeuq aen dijhi gyanghoeng diegguek ndaej dox bouj gijak、 caetliengh sang bae hwngfat haenx.

Haj dwg doicaenh yiengh doiq rog hailangh suijbingz sang. Yamqonj gyahung hailangh gij gveihcwz、gveihci、guenjleix、biucinj daengj doengh gij dangq cidu neix. Gyavaiq laebbaenz aen guekgya ak dajgai dajcawx. Caux ok gij vanzging ceiq hab guh seng’eiq dwg youz hawciengz dazyinx、ciuq faplwd guenjleix、ndaej hamj guek gaicawx haenx. Doinyoengx caez laeb “it rangh it loh” hwngfat engqgya ndei bae. Miz bouhloh doicaenh yinzminzbi hwnj gwnz gozci. Haeujlaeg caeuqfaenh daengx seiqgyaiq youq gwnz canjnieb guh faengoeng caeuq doxgap, henhoh yiengh ndabaij gozci ginghci caeuq gij gvanhaeh ginghci mouyiz lai yiengh onjdingh.

Siz Ginbingz daegbied gangj daengz, dawzmaenh gohgi dwg yiengh swnghcanjliz daih’it vunzcaiz dwg yiengh swhyenz daih’it cauhmoq dwg yiengh doenghlig daih’it

Siz Ginbingz youq ndaw aen baugau Ngeihcib Daih daegbied gangj daengz, itdingh aeu gaemmaenh aeu gohgi daeuj guh yiengh swnghcanjliz daih’it、aeu vunzcaiz guh yiengh swhyenz daih’it、aeu cauhmoq guh yiengh doenghlig daih’it, haeujlaeg saedhengz aen canloz baengh gohgyau hawj guek hwnghwnj、aen canloz baengh vunzcaiz hawj guek akrengz、aen canloz aeu cauhmoq doinyoengx hwngfat, ra aeu giz moq roen moq bae hwngfat, mboujduenh ganq ok geu rengz moq giz ak moq daeuj doinyoengx hwngfat.

De naeuz, aeu dawzmaenh banh ndei gyauyuz doekgonq、gohgi gag laeb gag ak、baengh vunzcaiz dazyinx, gyavaiq hwnqguh aen guekak gyauyuz、guekak gohgi、guekak vunzcaiz, dawzmaenh coengh Dangj ganq vunz、bang guek ganq caiz, hawj gaiq hong gag guhcawj gungganq vunzcaiz yienghyiengh raen ndei, roengzrengz ganq ok gij vunzcaiz cauhmoq ceiq ak, ciucomz gij vunzcaiz maenh’ak lajmbwn daeuj yungh.

Banh ndei yiengh gyauyuz beksingq habhoz. Aeu seizseiz humxheux yinzminz bae haibanh gyauyuz, gyavaiq cauhlaeb aen gyauyuz dijhi maenhndei, lai guh suciz gyauyuz, coihawj gyauyuz yied daeuj yied goengbingz. Gyavaiq yivu gyauyuz youh ndei youh bingzyaenx bae hwngfat caiqlij singz mbanj doxcaemh doengzcaez, engq ndei bae boiqceiq gij gyauyuz swhyenz ranghdieg, lai roengzrengz banh ndei gij gyauyuz duenh haeuj hag gaxgonq、gij gyauyuz daegbied ndeileih vunzlai haenx, laebdaeb youq duenh gauhcungh haibanh baenz lai cungj lai yiengh hagdangz, caezcienz aen dijhi daengx hagduenh bangcienz hagseng. Gyavaiq guhbaenz yiengh gyauyuz soqcih, hwnqguh aen biengz maij hag、aen guekhung gaenx hag miz daengxcungq yinzminz baenzciuh bae hag haenx.

Caezcienz aen dijhi gohgi cauhmoq. Dingjmaenh cauhmoq youq ndaw daihbuenz hwnqguh gij yendaiva guek raeuz dwg yiengh ceiq youqgaenj de. Laebndei aen dijci Dangjcunghyangh itcaez lingjdauj gaiq hong gohgi, laebcienz yiengh dijci moq daengx guek comzrengz daeuj guh, gya rengz hawj aen canloz gohgi guekgya, engq ndei bae boiqceiq gij swhyenz cauhmoq, hawj aen dijhi cauhmoq guekgya lai ndaej cingjdaej langh rengz. Lai caeuq guekrog guh gohgi gyaulouz doxgap, gyarengz caeuq guekrog cauhlaeb aen vanzging guh gohyenz, cauxbaenz yiengh swnghdai hailangh cauhmoq miz rengz youq gwnz seiqgyaiq beijak.

Gyavaiq saedhengz aen canloz aeu cauhmoq doinyoengx hwngfat. Gyavaiq youq ndaw gohgi maenh’ak guh daengz ndaej gag laeb gag ak. Aeu gij daengxbuenz aeuyungh guekgya daeuj dazyinx, comz rengz gung roengz yiengh gohgi cauhnduj lingxdaeuz, baenzlawz cungj aeu dawz roengz yiengh gisuz ceiq maenh ceiq youqgaenj. Gyavaiq saedhengz buek gohgi hanghmoeg hungloet guekgya ndaej dingh daengxbuenz nanangq daihbuenz caiqlij ndaej yinxlingx daengzcog ndeu, gyaak gij rengz gag guhcawj cauhmoq. Cauh ok aen vanzging haemq ndei ndeileih doengh aen giyez rauh iq saeq caixhangz gohgi haenx majhung, doinyoengx diuz lienhcauhmoq lienhcanjnieb lienhswhginh lienhvunzcaiz yungzhab haeuj laeg.

Haeujlaeg saedhengz aen canloz baengh vunzcaiz ak guek. Seizseiz cungj aeu gingqcungh guhhong、gingqcungh cihsiz、gingqcungh vunzcaiz、gingqcungh cauhnduj, saedhengz aen cwngcwz vunzcaiz engqgya ndeileih、engqgya hailangh、engqgya mizyauq. Roengzrengz cauxbaenz yiengh vunzcaiz youq gwnz gozci daxak raen lai ak lai rengz. Gyavaiq gung ok geu rengz vunzcaiz gwnz canloz guekgya aeu yungh. Gyalaeg gaijgwz gij dijci gihci hawj vunzcaiz hungmaj, giet- comz gij vunzcaiz maenhndei yienghneix yienghhaenx haeuj daengz ndaw saehnieb Dangj caeuq yinzminz daeuj.

Siz Ginbingz daezok, hwngfat yiengh yinzminz minzcuj ronzdoeng goekbyai, baujcang yinzminz dang- gya guhcawj

Siz Ginbingz youq ndaw aen baugau Ngeihcib Daih daezok, hawj yinzminz minzcuj ronzdoeng goekbyai dwg gij ndokngviz yiengh minzcuj cwngci sevei cujyi, dwg gij minzcuj ceiq gvangqlangh、ceiq caensaed、ceiq dingjyungh he. Itdingh aeu giendingh mbouj bienq byaij diuz roen cwngci fazcanj yiengh sevei cujyi miz gij daegsaek Cungguek, seizseiz aeu Dangj lingjdauj、yinzminz danggya guhcawj、ciuqfap guenj guek ndeindei dungjyiz.

De daegbied gangj daengz, aeu laeb caezcienz gij cidu dijhi yinzminz danggya guhcawj, lai hawj yinzminz ciuq bouhloh bae caeuqfaenh cwngci, baujcingq yinzminz ndaej ciuqfap bae guh minzcuj senjgij、minzcuj hezsangh、minzcuj gezcwz、minzcuj guenjleix、minzcuj gamduk, hawj yinzminz ginzcung lai maij guh、gagrox guh、cauhnduj bae guh, gyamaenh caeuq hwngfat yiengh cwngci gizmen sengdoengh hozboz、andingh doxgiet haenx.

（cienj banj 7）