（ciep banj 3）

Siz Ginbingz youq ndaw baugau vixok, gij bengwz hungmbwk seizdaih moq cib bi neix, youq gwnz lizsij Dangj raeuz、lizsij Cungguek moq、lizsij gaijgwz hailangh、lizsij hwngfat sevei cujyi、lizsij hwngfat Cunghvaz Minzcuz, miz yiengh eiqngeih dangq lohbaiz. Aen Cunghgoz Gungcanjdangj buekguh bak bi gvaqdaeuj neix youq mwh daj goek bae dizlienh bienq ndaej engqgya genq engqgya ndongj, Dangj raeuz gij bonjlingx lingjdauj cwngci、gij bonjlingx dazyinx swhsiengj、gij bonjlingx cujciz vunzlai、gij bonjlingx haucauh ndawbiengz cungj ndaej gyaak haujlai, Dangj caeuq yinzminz ginzcung seizseiz cungj gaenjmaed lienzhaeh, Cunghgoz Gungcanjdangj youq gwnz roen lizsij seiqgyaiq hingzseiq bienqvaq laegdaeuq, itloh cungj byaij youq baihnaj seizdaih, youq gwnz roen lizsij wngqdoiq ndaw guek rog guek gak cungj fungyiemj caeuq gaujniemh, itcig cungj baenz diuz ndoksaen daengx guek yinzminz, youq gwnz roen lizsij dawzmaenh caeuq hwngfat yiengh sevei cujyi miz gij daegsaek Cungguek, itloh baenz aen cehsim lingjdauj maenh’ak. Yinzminz Cungguek gij rengznyoengx yamqdin baenaj engqgya hungloet、gij cingsaenz buekguh engqgya rengzrwd、gij saenqniemh bietdingh ndaejhingz engqgya giendingh, gikfat hwnj yiengh cingsaenz engqgya haenqrem gagrox caeuq cawjdoengh bae rapdawz faenhhong lizsij, Cunghgoz Gungcanjdangj caeuq yinzminz Cungguek cingq aeu saenqsim bak boix bae doihaeuj yiengh bonghyat hungmbwk Cunghvaz Minzcuz daj ndwn hwnjdaeuj、fouq hwnjdaeuj daengz ak hwnjdaeuj. Gaijgwz hailangh caeuq hwnqguh sevei cujyi yendaiva haeujlaeg guh baenaj, raiz ok le bien sawfaenz moq ginghci fatmaj riengjvaiq caeuq ndawbiengz ciengzgeiz onjdingh song yiengh mbouj bingzciengz neix, guek raeuz hwngfat ndaej demhroengz gij giekdaej vuzciz engq maenhsaed、 gij cidu baujcwng engq caezcienz, guhbaenz Cunghvaz Minzcuz fukhwng hungmbwk haeuj daengz diuz roen baenaj mbouj doiq dauqlaeng haenx. Gohyoz sevei cujyi youq aen Cungguek ngeihcib it sigij fat ok rengzhoengh moq, yiengh yendaiva Cungguek vih vunzloih guhbaenz yendaiva daezhawj le genjleh moq, Cunghgoz Gung- canjdangj caeuq yinzminz Cungguek vih gaijgez gij vwndiz vunzloih caezcaemh bungzdaengz haenx daezhawj gij dungxcaiz Cungguek、 fueng’anq Cungguek、ligliengh Cungguek engq lai engq ndei, vih vunzloih hozbingz caeuq fazcanj aen saehnieb hungsang youh caiq ok goengrengz engq hung!

Siz Ginbingz gangj haiok aen diendeih moq Majgwzswh Cujyi habngamj Cungguek habngamj seizdaih

Siz Ginbingz youq ndaw aen baugau Ngeihcib Daih daegbied gangj daengz, mbouj- duenh raiz ok gij faenzcieng moq Majgwzswh Cujyi habngamj Cungguek habngamj seizdaih, dwg diuzrap naekgwg gyoengq vunz Cunghgoz Gungcanjdangj ciuhneix aeu rap hwnj ndeu.

De gangj, saedguh hawj raeuz ndaej rox, Cunghgoz Gungcanjdangj vihmaz baenz, aen sevei cujyi miz gij daegsaek Cungguek vihmaz ndei, gangj daengz daej dwg aenvih Majgwzswh Cujyi baenz, dwg aenvih gij Majgwzswh Cujyi habngamj Cungguek habngamj seizdaih de baenz. Baengh gij gohyoz lijlun Majgwzswh Cujyi dazyinx, Dangj raeuz cijndaej daj gaenbonj bae dawzdingh sinyangj saenqniemh mboujbienq、dawzcinj yiengh cawjdoengh cauhguh lizsij.

Siz Ginbingz youq ndaw baugau vixok, Cibbet Daih doxdaeuj, hingzseiq ndaw guek rog guek miz bienq caeuq saedguh miz iugouz moq, gaenj aeu raeuz daj lijlun caeuq saedguh giethab bae haeujlaeg hoizdap baenzroix goq- daez seizdaih hungnaek gvendaengz saehnieb Dangj caeuq guekgya hwngfat、Dangj baenzlawz guenj guek ceih biengz. Dangj raeuz gamj bae damqra caeuq cauhmoq lijlun, aeu yiengh lwgda moqsak caiq haeujlaeg bae nyinhrox gij gvilwd Gungcanjdangj gaemgienz、gij gvilwd hwnqguh sevei cujyi、gij gvilwd hwngfat aenbiengz vunzloih, lijlun cauhmoq aeundaej cwngzgoj hungnaek, comzgiet baenz Aen Swhsiengj Sevei Cujyi Miz Gij Daegsaek Cungguek Seizdaih Moq. Cibgouj Daih、Aen Cienzhoih Baez Daihroek Gaiq Cibgouj daezok “cib aen mingzbeg doekdingh”、“cibseiq aen dingj- maenh”、 “cibsam aen fuengmienh cingz- cik”, gyonjgangj le gij cujyau neiyungz aen swhsiengj neix, itdingh aeu ciengzgeiz dawzmaenh caemhcaiq mboujduenh gyalai caeuq hwngfat dem.

Dawzdingh caeuq hwngfat Majgwzswh Cujyi, itdingh aeu caeuq gij saedsaeh Cungguek dox giethab. Yienghyiengh cungj daj saedsaeh hwnjdin, daj gaijgez gij vwndiz saedceiq ok laeng gaijgwz hailangh caeuq hwnqguh sevei cujyi yendaiva seizdaih moq bae naemj, mboujduenh hoizdap gij vwndiz Cungguek、gij vwndiz seiqgyaiq、gij vwndiz yinzminz、gij vwndiz seizdaih, dawzok gij dapanq cingqdeng habngamj gij saedsaeh Cungguek caeuq gij iugouz seizdaih, ndaej daengz gij nyinhrox gohyoz hab gwzgvanh gvilwd, cauxbaenz gij lijlun cwngzgoj ndaej riengz seizdaih baenaj, engq ndei bae dazyinx Cungguek guh saeh.

Dawzdingh caeuq hwngfat Majgwzswh Cujyi, bietdingh aeu caeuq gij conzdungj vwnzva maenhndei Cunghvaz dox giethab. Cijmiz doek rag youq gwnz namhbiz lizsij vwnzva guekgya bonjfaenh、minzcuz bonjfaenh, Majgwzswh Cujyi caenleix go faexhung neix cijndaej rag laeg mbaw mwn. Bietdingh aeu giendingh gagsaenq lizsij、gagsaenq vwnzva, dingjmaenh aeu doxgaiq ndei ciuhgeq daeuj yungh、dauz gaeuq ok moq, dawz gij ceiq ndei aen swhsiengj Majgwzswh Cujyi caeuq gij ceiq ndei conzdungj vwnzva maenhndei Cunghvaz ronzdoeng hwnjdaeuj、caeuq gij gyaciz gvanhnen caezcaemh vunzlai haethaemh yungh cix mbouj roxnyinh de doxyungz hwnjdaeuj, hawj gohyoz lijlun yied daeuj yied miz gij daegsaek Cungguek, hawj Majgwzswh Cujyi ndaej habngamj Cungguek habngamj seizdaih engq miz giekdaej lizsij caeuq giekdaej ginzcung, hawj Majgwzswh Cujyi youq Cungguek doekrag onjdup.

Siz Ginbingz daegbied gangj daengz, mboujduenh raiz ok gij faenzcieng moq Majgwzswh Cujyi habngamj Cungguek hab- ngamj seizdaih, dwg diuzrap naekgwg gyoengq vunz Cunghgoz Gungcanjdangj ciuhneix aeu rap hwnj ndeu. Laebdaeb doicaenh doenggvaq saedguh bae cauhmoq lijlun, aeu dawzndei gij sigaigvanh caeuq fanghfazlun Aen Swhsiengj Sevei Cujyi Miz Gij Daegsaek Cungguek Seizdaih Moq gonq, dawz ndei、 yungh ndei gij lizcangz gvanhdenj fanghfaz ronzdoeng goekbyai de.

——Bietdingh aeu seizseiz cuengq yinzminz youq vih daih’it. Sojmiz gij lijlun duetliz yinzminz de cungj naiqnuek unqnyieg, sojmiz gij lijlun mbouj vih yinzminz cauhfuk de cungj mbouj hengz ndaej nanz. Raeuz aeu ndwn maenh youq mbiengj yinzminz、dawzcinj gij simmuengh yinzminz、 aeueiq gij dajcauh yinzminz、gyonjcomz gij coengmingz yinzminz, guhbaenz gij lijlun yinzminz gyaezmaij、nyinhdoengz、haeujuk haenx.

——Bietdingh aeu seizseiz gagsaenq gag’ak. Gyoengq yinzminz Cungguek caeuq Cunghvaz Minzcuz daj gwn gaeuq gij cainanh naekcaem ciuhgyawj doxdaeuj haenx byaij coh diuz roennaj ronghsag fukhwng hungmbwk, coengzlaiz mbouj miz saw son, engq mbouj miz dapanq gaenq baenz. Diuz roen Dangj raeuz buekguh bak bi guh ndaej baenz neix, dwg Dangj lingjdauj yinzminz gag ra ndaej gag guh ndaej okdaeuj, bien faenzcieng Cungguek ndaw Majgwzswh Cujyi dwg gij vunz Cunghgoz Gungcanjdangj baengh rengz bonjfaenh raiz okdaeuj, ndawde diemj daj goek daengz byai aeu guhdaengz ndeu couh dwg gij vwndiz Cungguek itdingh aeu daj gij guekcingz giekbonj Cungguek hwnjdin, youz vunz Cungguek gag gejdap.

——Bietdingh aeu seizseiz souj goek cauhmoq. Raeuz aeu yungh yiengh lwgda gohyoz bae doiqdaih gohyoz、yungh gij cingsaenz caenleix bae gyaepgouz caenleix, aeu gij cingsaenz gvaekgvaek bae doiqdaih sojmiz doenghyiengh moq, hawj nyinhrox yied daeuj yied gya laeg mbe gvangq, gamj gangj gij vah vunz ciuhgonq caengz gangj gvaq, gamj guh gij saeh vunz ciuhgonq caengz guh gvaq, yungh lijlun moq bae dazyinx raeuz guh gij saeh caengz guh gvaq.

——Bietdingh aeu seizseiz riengz vwndiz bae dazyinx hongsaeh. Lai comz rengz haeuj gij vwndiz moq mwh saedguh bungzdaengz、gij vwndiz caengzlaeg ok laeng gaijgwz hwngfat onjdingh、gij vwndiz gaenjgip hojnanz youheiq deqmuengh ok laeng yinzminz ginzcung、gij vwndiz hungnaek ok laeng seiqgyaiq boek- bienq、gij vwndiz haenqrem Dangj raeuz bienq ak bungzdaengz, mboujduenh daezok gij leixniemh moq lohnaemj moq banhfap moq ndaej caen gaijgez vwndiz haenx.

（cienj banj 5）